Read lokele Tomo Ya Batomomu 2 Bible Online

Tomo Ya Batomomu 2 - lokele bible

Tomo Ya Batomomu 2

¹Limɔ ayaka lise lia Pentekosete, liko lise lioücha buka wa eula, beoto bayalaka amamwito nda elela ɛmɔi.

²Futuku elundi efi losokwa nda use kwa mbo fömba bitoeta, yao lotumesa ndakɔ etotina olo ayalak’iyo.

³La iyo lɔɛnɛ ndame kwa eya bösä ebisokaelakana, lɔmɔi lɔmɔi loaa se ende boto la boto wau,

⁴la batotina lotumesomoko la Bolimo Botanu, la iyo yaatotina loakola ndoonga la baoi ba kanda yasi kwa afaefaka Inde ofaef’iyo baölo boonga.

⁵BaYuda to balimelaka nda Yelusaleme, balitesi ba Mungu ebasokwaka nda biese bitotina ya wenda.

⁶Okanakä to etondo-ye iyo losɔngɔmɔ etanda efi ya bato, iyo loeyaeya finɛ ani okak’iyo beoto batoonga ngɔlu ya oto la oto,

⁷la iyo lowa liena, iyo lɔmwaala, iyo loonga mbo— ¿Tɛnɛ ngo, ebatoonga-ba bati ba Ngalilai?

⁸¿Monito iso totooka boto la boto ngɔlu eyande eyaotomoko lande?

⁹Twende BaPalatia, BaMedea, BaElama, la ebayali nda yese ya Mesopotamia, BaYudea, BaKapodokia, l’Eba Ponto la Asia,

¹⁰BaFulugia, la bato ba Pamfulia, ba Ejipeto, ba yese ya Libwe tina la Kulene, la bato ba fɛtɛti ba Loma la BaYuda la eba ndimela,

¹¹la bamɔi ba Kulete, la BaAlaba, iso yaatotina tosooka iyo batoonga la baoi basu angɛnɛ ko tokesa twa Mungu.

¹²Iyo lowa to liena batotina, iyo lowa toloi, iyo lofelakana mbo— ¿Litina moni nda loasɔ-lo?

¹³Nde bamɔi lomuchamucha, iyo mbo— Basookanelo la bänä bayai.

¹⁴Kongo ko Petelo loemesana l’eba liu la ɔmɔi, inde lokusola limiki liande, inde loonga lau baölo mbo— Ino bato ba Yudea la batotina ebaingali Yelusaleme kwani, eloasɔ-lo loluwaneke lanu la ɔtɛsɛkɛ baoi bami ko nda batoi banu,

¹⁵eoka ebato-ba batiwe bänä, kwa atoenyel’ino, eoka ele ko bonyanya oku;

¹⁶kongo ko löle ngo ko loao eloatɔndɔlɔkɔ Yoele ewa Bɔtɔndɔli mbo— Mungu asoonga mbo,

¹⁷Nda bacho ba liko, yɛwɛlɛkɛ Bolimo wami ende balomboki batoti; La bana banu batolome la batomali bɛtɔndɔlɔkɔ, La tosenge twanu bɛnɛkɛ baɛni, La biuwa yanu betaka saki;

¹⁸Eingo, yewɛlɛkɛ Bolimo wami la bacho bana Ende bɛkɔwa yami batolome la batomali, la betɔndɔlɔkɔ.

¹⁹Yetambaka tokesa nda use likolo, La ndembe ya bisisho nda nyɛlɛ ose, Bakila la bösä la ngungu ya bölïlya.

²⁰Liso lia use likinjwaka nde lilima La tengai etufaka kwa bakila, Oso wa loyo loa lise lina lifi lia Ngɛnɛ Mungu elitoɛnɛlɛ swa.

²¹Nde oyakasingweke lina lia Ngɛnɛ, inde kouwesomoko.

²²Ino BaIsalaele, okaka ebaoi-ba mbo Yesu wa Nasaleta Inde oyalembeelesaka Mungu elembeeles’ino ko la tokesa la befoka ya bisisho la ndembe eyakelaka Mungu ko lande sisi yanu, kwa aluw’ino angɛnɛ,

²³Inde kongo, oyawambomokö la likomyi la loluwo loa Mungu, ino nd’awachak’Inde nda lieka, ososɛɛsɛlɛs’Inde ko la besamba ya bato ebatilitese bikela;

²⁴Mungu asotɛmwɛs’Inde nda liwa, asofaikola tokängë twa liwa eoka atikɔkɔlɛ ndokanjomo la liao.

²⁵Dawidi loonga loasɔ loande mbo— Yɛnɛkɛ̈ Ngɛnɛ oso wa baiso bami bacho batotina, Eoka ayali nda bosamba wa olome wami mbo italɛlɛlɛlɛ;

²⁶Eokao botema wami bosoomala la lolame loami losoyaimwa la limɛngɔ, La lokomba loami imɔ lotoyalaka l’iyeli sha liwawi,

²⁷Eoka oitomacha bolimo wami nda ewelo, La oitomacha oyasamomu laɛ mbo ɛnɛkɛ liɔli lia liwa.

²⁸Osɔɛnɛsɛ’mi mboka ya liwawi, Ototumesa botema wami la linɛngina oso wa baiso baɛ.

²⁹Beoto, isokɔkɔlɔ oonga lanu fololo loasɔ loa Dawidi ngau wasu mbo awaka la aombomoko la losai loande lokoyali ono eyasu konda eweuse.

³⁰Kongo ko ayalak’inde bɔtɔndɔli la eoka mbo aluwaka mbo Mungu atinyaka ekanɔ yosɛlɛ ɔmɔi wa lioti liande Bɔkɔta,

³¹ongoma Dawidi lotaluwa la atɔndɔlɔ̈kɔ̈ eoka ya losokwo loa Yesu nda liwa, mbo atiamachaka bolimo wande nda ewelo ango mbo bindo yande ndoɛnɛ liɔli lia liwa.

³²Yesu-yo kongo nd’asokusolomo la Mungu nda liwa ko la liwawi la iso-ba nd’ayali ebɛnɛkɛ̈ loasɔ-lo.

³³Ataliomoko Inde tala ko la bosamba wa Mungu, atikelomöko lisakä lia Bolimo Botanu ko la Sango, eokao asowɛlɛ kwani loao elosɔɛnɛ la elosok’ino.

³⁴Dawidi atiakɛndɛkɛ likolo nda use, nde inde angɛnɛ loonga mbo— Bɔkɔta Mungu loonga la Bɔkɔta wami mbo— Yalaka se Nda fangi ya bosamba wami wa olome,

³⁵kond’akateke Imi Baiyani laɛ kwa esolo ya batindi baɛ.

³⁶Eokao tukela etotina ya BaIsalaele baluweke fololo mbo Mungu asotalia ngo ko Yesu-yo, oyaolak’ino nda lieka mbo Ngɛnɛ la Masiya.

³⁷Okaka bato ebaoi-ba, iyo lokaka betema wäle finɛ, iyo loonga la Petelo la batomomu ebamɔi mbo— ¿Tokeleke to moni?

³⁸Petelo loonga lau mbo— Kalanganaka la lufiomoko ino yaatotina nda lina lia Yesu Masiya eoka ya limɛsɛli lia batwanelo banu limɔ bɔɔlɔkɔ lifaefi liko Bolimo Botanu,

³⁹eoka lisakä lile lianu la elia bana banu la elia batotina ebayali esika ebatotaka Mungu wanu ot’iyo lioi.

⁴⁰Ko la baölo basi wike inde lokambes’iyo la inde lofumbes’iyo mbo— Uwesomoko nda fɛtɔ-ye ya bato ebatiengane.

⁴¹Ongoma ebimelaka inango shande, iyo lolufiomo, la nda lise lina bato bilɛfu isatɔ lowatema lau,

⁴²Iyo lokɔkɔmɔ kɔkɛ ko la liekesi lia Batomomu la lisukani lia beoto la nda liuni lia lituma la nda basomboli.

⁴³Bato batotina lokwelo bɔwa la ndembe ya bisisho wike yakelomoko ko la Batomomu.

⁴⁴Batotina ba liimeli losɔngɔkɔmɔ la iyo lokaana bieto yau bitotina,

⁴⁵la bilanga la biengo yau, iyo loungekesa yao, iyo lokaana la basi batotina kwa aenoko oto.

⁴⁶Lise la lise iyo lɔɔtɔkɔkɔ nda Ndakɔ ya Mungu amamwito, iyo lounaka lituma la ndakɔ la ndakɔ yau olo alak’iyo bieka la bɔfɔɔmu la limɛngɔ nda betema;

⁴⁷iyo loinakela Mungu, la bato batotina loyalana lau la booto. La Ngɛnɛ lowatekemesa lau ko ebatouwesomo lise la lise.