Read lokele Tomo Ya Batomomu 20 Bible Online

Tomo Ya Batomomu 20 - lokele bible

Tomo Ya Batomomu 20

¹Aɔngɔkɔ bosho, Paulo lota baeki lioi, limɔ aongak’inde baoi bofumbes’iyo, inde losɛnyana lau, inde lɔkɛ konda Makedonia.

²Limɔ etetak’inde nda biese bina, inde lofumbekesa bato la tonango wike, limɔ inde loiya nda yese ya Hela,

³inde loyala omao ko tengai isatɔ, nde atwanaka BaYuda kuko youndes’inde ani asiakaɔkɛ la watɔ wa lofofo nda Sulia, limɔ inde losanga ndoinwa liasi la mboka ya Makedonia.

⁴Sopatelo wana wa Pulo, boto wa Beloya la Alisitaluko la Sekundu ba Tesalonika, Ngayo wa Delube, la Timoteo la Tukiko la Tulofimo ba Asia, ito yaatotina lɔkɛsɛnɛ lande,

⁵iyo loetel’iso oso ndoumbakel’iso nda Tuloa.

⁶Nde iso lokwa nda watɔ wa lofofo nda Filipoi mbisa ya bacho ba Elambɔ ya lituma, la nda bocho wa bɔɔmwi iso lotowana lau nda Tuloa; iso lotikala omao bacho bosambale.

⁷Nda lise lia Yenga, asɔngɔmɔkɔ iso ndouna lituma, Paulo loongana lau eoka inde losanga ndosokwa la nɔngɔ, ongoma inde loumwesa inango ko nda ɛsɔkɔ ya ocho.

⁸Yaaka nde faka wike yoanesa litenya lia likolo olo asɔngɔmɔkɔ iyo.

⁹Isenge simɔi loyala se omao nda lililisa, lina liande liko Eutuku; eoka ya linangoli lia Paulo liumwaka, inde lokwa ilɔ, limɔ eoka ilɔ lolongak’inde, inde lokwa ko nda ekala ya isatɔ ko nda nyɛlɛ, la inde loilomo oko ani asowa.

¹⁰Nde Paulo lɔkɛ se ko end’inde, inde lɔlɔlɔnɔ lande, inde lotukumel’inde, inde mbo— Ofichëke etondo, liwawi likoyali nde lande!

¹¹Limɔ Paulo lolila likolo liasi, inde louna lituma, inde lola, inde loongana lau liasi konda yombe, limɔ inde lɔkɛ.

¹²Iyo lɔkɛsɛ wana eyau oko la liwawi, la betema yau lɔɔngɔ hɔngila.

¹³Iso loetel’iyo oso ndɔkɛ ko la watɔ nda Aso, eoka iso losanga ndota Paulo nda watɔ omao, eoka inde lokomia ongoma, mbo inde angɛnɛ loeta la boili.

¹⁴Limɔ atowanak’inde lasu nda Aso, iso lot’inde nda watɔ, iso loiyela Mitulene.

¹⁵Asokwak’iso omao la watɔ, lɛlɛngɔ iso loiya nda Kio, limɔ yose iso loleka nda Samo, la yose yambale iso loiya nda Mileto.

¹⁶eoka Paulo losanga ndoeta Efeso fwa eoka atialɛmbɛkɛ ndoumwaka nda yese ya Asia, kangä ndoendesa, mbo ɛkɔkɔlɔ, inde koiya nda Yelusaleme la lise lia Elambɔ ya Pentekosete.

¹⁷Nda Mileto Paulo lotoma wɛndi ende biange ya Etanda nda Efeso, mbo bayeke,

¹⁸limɔ ayak’iyo end’inde, inde loonga lau mbo— Ino nd’aluwi mbo konda lise lia oso eliatelaka’mi litindi nda yese-ye ya Asia boyaeli ewayalaka’mi sisi yanu ko mbile bitotina;

¹⁹yakuwelaka Ngɛnɛ la liikami se, la foo nda baiso, la biale eyayaka ende’mi eoka ya tɔɔlɛ twa BaYuda;

²⁰itiakufaka ndokambes’ino loasɔ ango lɔmɔi losungak’ino, la itiamachaka ndoekekes’ino fololo nda baiso ba bato, la nda ndakɔ la ndakɔ yanu,

²¹la ndosanokoela la BaYuda la BaHela likalangani ende Mungu la liimeli lioimela Ngɛnɛ wasu ako Yesu.

²²Tɛnɛ ngo, kwani isoundomo la Bolimo mbo ikɛkɛ nda Yelusaleme, la itiluwe elokakelomoko ende’mi omao;

²³sakolo ko mbo nda kenge bitotina Bolimo Botanu asoluwesa’mi mbo bɔnyɔlɔlɔ la tokange bikoumbakela’mi.

²⁴Kongo ko, eya mbo yekɔkɔlɔ ndosilesa lɔkɛndɔ loami la ndɔɔlɔlɔ likuwa eliafaefaka Ngɛnɛ Yesu ofa’mi, liko ndokanangokole Mboli Ilau ya booto wa Mungu, ongoma ani iitotanga liwawi liami mbo liende la loketi mbo ikɛsɛlɛkɛ liao iyɛli.

²⁵Tɛnɛ ngo, kwani imi angɛnɛ nd’aluwi mbo ino ba bekenge eyakɛndɛlɛkɛ’mi ndotaka boekï wa Bɔkɔta wa Mungu, otiɛnɛkɛ imɔ bɔmbɔ wami liasi.

²⁶Eokao, isotel’ino tele louse-lo mbo iti ango la loasɔ loa liwawi lia boto ango ɔmɔi wanu,

²⁷eoka itiakufaka ndokambes’ino lisangi litotina lia Mungu.

²⁸Tinganaka la betema yanu angɛnɛ la wɛli, imɔ la batotina ba liyasa elisɛli Bolimo Botanu ɛsɛl’ino betingani mbo ino boleseke Etanda ya Mungu bieka, Etanda eyaɔlɔkɔ Inde ko la bakila ba Ewande angɛnɛ.

²⁹Imi nd’aluwi mbo mbisa ya losokwo loami, ngɔi ya funo bitɔɔtɔkɔ sisi yanu angökela liyasa ngandi,

³⁰la bamɔi banu angɛnɛ bemalaka ndoonga tofenya toengolesa baeki mbo batutelek’iyo.

³¹Eokao, lambaka; enyelaka mbo ko la miaka isatɔ, itiamachaka ndofumbes’ino oto la oto la ocho la löwa ko la foo nda baiso.

³²Kwani to isotik’ino ende Ngɛnɛ Mungu la nda lioi lia booto wande, elitokɔkɔlɔ ndokɔkɔmɛs’ino la ndosangoles’ino botiko amamwito la batotina ebasoüchomo ende Mungu.

³³Itialolaka kwa pata kwa falanga kwa bisinda ya boto ango ɔmɔi;

³⁴ino angɛnɛ nd’aluwi mbo bangasa-ba bami bakuwelaka beeno yami la yao ya ebayalaka lami.

³⁵Nda bitotina yɛnɛsɛk’ino mbo ko la likuwa angɛnɛ lole lasu ndosungaka eba bɛlɛmbu, ndoenyakela baoi ba Ngɛnɛ Yesu ani aongaka Inde mbo— Limɛngɔ liofaka yeka, litolongakela elioɔlɔkɔ.

³⁶Aongaka Paulo ongoma, inde loswa balui se, inde losombola amamwito lau batotina.

³⁷Limɔ iyo yaatotina lolela finɛ, iyo lokusamela Paulo kingo, iyo loumb’inde bɔnɔkɔ la losamɔ,

³⁸nde loasɔ eloafak’iyo ikɛnɛnɛ shoeta, loaka lioi eliaongak’inde mbo batiɛnɛk’imɔ bɔmbɔ wande liasi. Limɔ iyo lɔkɛ okatik’inde nda watɔ.