Read lokele Tomo Ya Batomomu 26 Bible Online

Tomo Ya Batomomu 26 - lokele bible

Tomo Ya Batomomu 26

¹Limɔ Agulipa loonga la Paulo mbo— Wende la yose yota inango shaɛ. Limɔ Paulo loninɔlɔ bosamba wande, inde loakola ndotungesela bawanjeli ko la limutoli liande,

²inde mbo— Bɔkɔta Agulipa, yende la limɛngɔ finɛ louse ndota inango shami oso waɛ shotungelesa bawanjeli ba BaYuda owanjela’mi,

³simbi to eoka mbo beyaeli la tofenya twa BaYuda bisoluwomo laɛ fololo; eokao itolɔmbɔkɔl’aɛmbo olaileke’mi ko la boliliya.

⁴Ongoma to, boyaeli wami ko nda isenge shami, kwa ayaläka’mi sisi ya ebami angɛnɛ ko nda liotomu, la nda Yelusaleme, bosoluwana la BaYuda batotina.

⁵Basotaluwa ko oso, bekulia ndoluwes’aɛ ongoma, mbo isolitesa boyaeli wa BaFalusi ebole botükä eboeti la finɛ nda liimeli la lilitesi lia Mungu.

⁶La kwani isoemala ono nda likomyi lia liwanjeli ko l’eoka ya iyɛli sha lisakä eliatikaka Mungu ende batata basu,

⁷lisakä elisosemokola tukela yasi liu la imbale la löwa la ocho mbo bosheke liao. E Bɔkɔta, isowanjelomo la BaYuda ko l’eoka ya iyɛli-si.

⁸¿Monito ino otangi nde mbo lotiloimelomo mbo Mungu atokusola ebasowa nda liwa?

⁹Ongoma to imi angɛnɛ loenyela nda botema wami mbo loengani mbo ikeleke njasɔ wike yotwana la lina lia Yesu wa Nasaleta. Yakelaka ko ani nda Yelusaleme;

¹⁰imi nd’akandaka wike wa ebaimeli nda bɔnyɔlɔlɔ ko la isosha eshafomoko’mi ende Kanga ebieti, la nda Ikumbɛ imɔ yakuliaka mbo baolomoko.

¹¹Yakuchakak’iyo nda bisɔngɔmɛlɔ bitotina, imi lokota ndosɛɔlɛs’iyo lina lia Yesu, yawɛlɛk’iyo luno loa likama, yakongolak’iyo imɔ ko nda bekenge ya yese yasi.

¹²Akɛndɛkɛ’mi ongoma nda mboka ya Damaseke, ko la isosha sha Kanga ebieti ebatomaka’mi,

¹³la ifitika, Bɔkɔta, nda mboka imi lɔɛnɛ liangangi elisolongela elia liso lia use, elisosokwa imɔ nda use, liao loangangela’mi fangi la fangi imɔ ko ebakɛndɛnɛkɛ amamwito lami.

¹⁴Akwak’iso yatotina kwu nda nyɛlɛ, imi looka limiki litoonga lami la lioi lia BaEbele mbo— ¿Saulo, Saulo, otokongokola’mi monito? Oisoka lobaba ndosibiaka bokolo nda bosiki?

¹⁵Limɔ imi loonga mbo— ¿Bwana, wende ndai? Limɔ Ngɛnɛ loonga mbo— Imi yende Yesu oyatokongolomo laɛ.

¹⁶Kongo ko emalaka nda bakolo baɛ, eoka isɔɛnɛlɛ end’aɛ litina lia mbo isɛlɛk’aɛ bokuwi wami la bonangoli wa yao ebisɔɛnɛ aɛ la yao imɔ ebikɛnɛsɛkɛ’mi wɛnɛs’aɛ mbisa;

¹⁷itosokol’aɛ nda besamba ya bato baɛ angɛnɛ la ende eba biese yasi, olo akatomeke’mi otom’aɛ,

¹⁸mbo olioleke baiso bau, la mbo basokweke nda lilima ndokɛnɛ liangangi lia löwa, mbo basokweke nda bofoka wa Satana ndokakwa nda bofoka wa Mungu mbo bamɛsɛlɔmɔkɔ batwanelo, bafomoko botiko amamwito l’ebasotanesomo ko la liimeli lioimela’mi.

¹⁹Eokao, Bɔkɔta Agulipa, itiafekaka ndolitesa liɛni eliɛnɛlɛkɛ nda use,

²⁰nde oso imi lotanangola ende bato ba Damaseke la mbisa ende eba Yelusaleme la nda yese ya Yudea etotina la ende eba biese yasi mbo bakalanganeke ndokikwa ende Mungu la mbo bakelakeke ko yao ebiengani la likalangani liau.

²¹Eoka ya njasɔ-bi, BaYuda lokuwamela’mi nda Ndakɔ ya Mungu, la iyo lokota ndoola’mi.

²²Konda eweuse isosungomo la Mungu, eokao ikoemala eyamaya ndonangoela bato, l’ebafi l’ebakɛkɛ, nde iitoonga lioi angolimɔi, sakolo ngo ko eyaongaka Mɔsɛ la batɔndɔli mbo yao bilayaka mbisa,

²³biko mbo, loengani nde la Masiya mbo okeke tokange, limɔ eoka Inde atɛmwaka oso nda liwa, Inde akoluwesa la BaYuda la bato ba biese yasi mbo löwa losoangangel’iyo.

²⁴Anangolaka Paulo inango shande, Feseto loamama la limiki lifi mbo— Paulo osowa loseka! Wɛli wa kasa bosoola’aɛ loseka!

²⁵Nde Paulo mbo— Itiwe loseka, aɛ Feseto Oyalongeli, nde baolo ebakoonga’mi bende ko wewe la wɛli;

²⁶eoka Bɔkɔta nd’aluwi njasɔ-bi, itoonga oso wande la lotendela, eoka itienyele mbo njasɔ-bi bisoisomo end’inde, eoka bitiakelomoko wisisa.

²⁷¿Bɔkɔta Agulipa, oisoimela Batɔndɔli? Iluwi nde mbo osoimela!

²⁸Limɔ Agulipa loonga la Paulo mbo— Ko la sinyo sha lioi osotinja’mi mbo iyaleke boto wa Masiya?

²⁹Paulo mbo— Ango la sinyo ango ko la yumwa, imi kosombokola Mungu mbo inga aɛ angɛnɛ kongo, kanga imɔ ko batotina-ba ebatoka’mi louse, bayaleke kwa ayali nde’mi, sakolo ngo ko bɛnyɔlɔlɔ-bi.

³⁰Lamao Akulipa loemala amamwito la Gouverneur la Belenike l’ebayalaka se amamwito lau.

³¹Iyo lɔkɛ okaongana mbo— E-boto-yo atikeleke loasɔ loengana la liwa, ango ko bɔnyɔlɔlɔ.

³²Agulipa loonga la Feseto mbo— Aenaka e-boto-yo afelaka mbo akomyomoko la Kaisala, ani asofaikolomo.