Read lokele Tomo Ya Batomomu 5 Bible Online

Tomo Ya Batomomu 5 - lokele bible

Tomo Ya Batomomu 5

¹Nde oto ɔmɔi, lina liande liko Anania, iyo la wali wande ako Safila loungesa elanga.

²Inde loisa botüku wa bolïli, ani wali imɔ akulyi nde, inde loesha e-botüku, inde loyata wao oso wa Batomomu.

³Nde Petelo loonga mbo— ¿Anania, monito Satana asotumesa botema waɛ mbo olimbeke Bolimo Botanu la lolanga la ndoisa botüku wa bolïli wa elanga?

⁴¿Ayaliki yao angotaungesomo, elanga etiyaleke eyaɛ? ¿Aungesomu yao, etiyaleke imɔ nda isosha shaɛ angɛnɛ? ¿Monito osoisa loasɔ-lo nda botema waɛ? Otilimbe bato la lolanga, kangä Mungu.

⁵Okakä Anania ebaoi-ba, inde lokwa se, inde lowa. Limɔ bɔwa wa likama loundesa bato batotina ebokakä loasɔ-lo.

⁶Baemba to loemala, iyo lolingela bolyo la bisinda, iyo loömba wao.

⁷Etaka saa isatɔ, wali wande lɔɔtɔ ina ani atiluweke elokelomu.

⁸La Petelo loonga lande mbo— ¿Kambesaka’mi, mbo ino boungesiki elanga ko la bolïli-bo? Otomali mbo— Eingo, la bolïli-bo.

⁹Petelo mbo— ¿Monito osokulyana ndososhela Bolimo Wa Ngɛnɛ Mungu? Toka, batindi ba ebaömbiki olome waɛ bakɔɔtɔ bome la batotola aɛ lousa.

¹⁰Kwaamao otomali lokwa se nda bakolo ba Petelo, inde lowa la ɔtɔkɔ̈ baemba, iyo loosh’inde oko ani asowa, lamao iyo loila bolyo, iyo loömba wao tina la olome wande.

¹¹Limɔ bɔwa wa likama loundesa batotina ba Etanda la batotina ebokakä loasɔ-lo.

¹²Ko la Batomomu ndembe ya bisisho wike lokelomo sisi ya bato la iyo losɔngɔkɔmɔ nda lilɛlɛ lia Solomo,

¹³nde angwɛnɛ wasi wotendela ndowatema lau, nde bato angɛnɛ loinakel’iyo finɛ,

¹⁴la bato boeta eba oso lolendelo Ngɛnɛ, la batolome la batomali.

¹⁵Eokao iyo loeshaka eba kambo ango nda mboka, iyo loingekes’iyo nda tange la tokala mbo, aketeke Petelo ango elimi yande ekweke ende bamɔi bau.

¹⁶Ongoma bokamu wa bato ba kenge ebitimbi Yelusaleme, iyo loeshakana l’eba kambo la ebawaka la belimo ya bɔwɛwɛ, la batotina bana louwesomo.

¹⁷Kongo ko Kanga eyeti losoma finɛ, inde la batotina ebaaka lande, bako botuka wa BaSadoke, iyo lotuma la lisiela, iyo loundesa Batomomu,

¹⁸iyo lot’iyo nda bɔnyɔlɔlɔ wa bokenge.

¹⁹Nde la bocho, bokitomo wa Ngɛnɛ loliola biome ya bɔnyɔlɔlɔ, inde lɔkɛs’iyo lousa,

²⁰inde mbo— Kɛndɛkɛ, emalaka nda Ndakɔ ya Mungu, kambesaka bato wɛndi bototina wa Liwawi-li.

²¹Okak’iyo ongoma, iyo lɔɔtɔ nda Ndakɔ ya Mungu la bonyanya, iyo loekesa bato. Ayaka Kanga eyeti la ebaaka lande ndoyasɔngɔmɛsɛ ikumbɛ la benyafala ya bana ba Isalaele, iyo lotoma wɛndi nda bɔnyɔlɔlɔ ndokɔsɔ Batomomu.

²²Kongo ko iyaka ba-polisi omao, batiɛnɛkɛ imɔ iyo nda bɔnyɔlɔlɔ; ainwak’iyo, iyo loonga mbo—

²³Tooshiki ndakɔ ya bɔnyɔlɔlɔ eliakami biome ngwi, la betingani bemakali nda biome, kongo ko aliol’iso wao, angoosha boto ina.

²⁴Okakä to Komanda wa ba polisi ba Ndako ya Mungu la kanga ebieti ebaoi-ba, iyo lowa toloi nda loasɔ-lo, la mbo loni lokayeke nda loao.

²⁵Nde ɔmɔi loya oyaluwes’iyo mbo— Tɛnɛ ngo, bato ana ebaɔtɛsɛk’ino nda bɔnyɔlɔlɔ, iyo ana nda Ndako ya Mungu, bemali ani batoekesa bato.

²⁶Lamao Komanda la polisi amamwito, iyo lɔkɛ okaesha Batomomu, nde inga to la bolengi, eoka bawangaka mbo bato batakushak’iyo batalɛ.

²⁷Aeshak’iyo batomomu, iyo loemes’iyo oso wa ikumbɛ, limɔ Kanga eyeti lofel’iyo mbo—

²⁸¿Toisoimak’ino la itinjo mbo otaekesa bato nda e-lina-li? Nde, tɛnɛ ngo, osotumesa Yelusaleme la liekesi lianu, la ososanga mbo bakila ba e-boto-yo baomaneke oko end’iso.

²⁹Petelo la Batomomu lomutola mbo— Loengani nde ndotalitesa ko Mungu, inga bato.

³⁰Mungu wa batata basu afaka Yesu isosha, nde ino nd’asɛɛsɛlɛsɛkɛ Inde ko ndokakames’Inde nda isandu.

³¹Mungu nd’asotalia ko Inde kongo, mbo ayaleke Bokota la Bouwesi nda bosamba wande wa olome mbo afeke BaIsalaele fofe ya likalangani la limɛsɛli lia batwanelo;

³²la iso nd’ale baɛni ba njasɔ-bi, imɔ ko la Bolimo Botanu oyasofomo ko la Mungu ende ebatolites’Inde.

³³Okak’iyo ongoma, iyo lotwaka belengi ya likama la basangaka ndoola Batomomu;

³⁴kongo ko ɔmɔi wa BaFalusi, ako Ngamaliele, boekesi wa Bikela, oyatɛmyɔmɔkɔ ko la bato batotina, inde loemala nda ikumbɛ, inde loonga mbo Batomomu bumesomoko lousa sumbu.

³⁵Limɔ inde loonga l’ikumbɛ mbo— Bato ba Isalaele, la wɛlï-o nda yao ebikakelek’ino ende ebato-ba,

³⁶Eoka sumbu oso wa mbile-ye, oto ɔmɔi ako Teudayo loya, inde lotakema mbo ende wana wa oto la bato kwa mia inɛi lowatema lande. Kongo ko inde loolomo la batotina ebalendeloko inde lomelesomo, angolonga ango sinyo.

³⁷Mbisa yande Yuda wa Ngalilai loya nda mbile ya lotango loa bato, inde loengokolesa bato mbo batutek’inde, inde imɔ loolomo, la batotina ebalendeloko inde lomelesomo mia.

³⁸La kwani ko ongoma, imi mbo, sɛnyanaka la ebato-ba, machak’iyo, eoka eyambo e-kuko-ye la bakeli-ba bende ya bato, ani bitiangolonga; nde beyala eya Mungu,

³⁹ani ino angokɔkɔlɔ ndokwesa yao, ango eyata mbo otooshomo mbo osonana ngo ko la Mungu. Ikumbɛ loimela lioi liande.

⁴⁰Limɔ iyo lota Batomomu lioi, iyo lokuchak’iyo, iyo loim’iyo mbo bataong’imɔ liasi nda lina lia Yesu, limɔ iyo lota Batomomu se.

⁴¹Limɔ iyo losokwa nda ikumbɛ, iyo loomala finɛ eoka mbo batangomu mbo baondu ndookesomo sɔni loasɔ loa lina-li.

⁴²Kongo ko la lise la lise nda Ndakɔ ya Mungu la nda ndakɔ ya oto la oto, batiamachaka ndoekesa la ndonangola Mboli Ilau ya Yesu Masiya.