Read lokele Tomo Ya Batomomu 7 Bible Online

Tomo Ya Batomomu 7 - lokele bible

Tomo Ya Batomomu 7

¹Limɔ Kanga eyeti loonga mbo— ¿Loasɔ lole ngo ko ani?

²Setefano mbo— Beoto la batata, toka kɔni, Mungu Oyalongeli lɔɛnɛlɛ ende tata wasu ako Abalayama ani ayalak’inde nda yese ya Mesopotamia oso ani akalimel’inde nda Halana, Inde loonga lande mbo—

³Sokwaka nda yese yaɛ la bofindi waɛ, yauku nda yese eyetɔɛnɛs’mi wɛnɛs’aɛ.

⁴Lamao inde losokwa nda yese ya Kaladea, inde lolimela nda Halana, limɔ mbisa ya liwa lia sango wande, Mungu losokol’inde omao konda yese olo ayali ino kwani.

⁵Nde atiafak’inde botiko nda yao, ango litaka limwitɔ lia bakolo; kongo ko atikelak’inde lisakä liof’inde yese ena yoyaela, end’inde la ende lioti liande mbisa yande, ani atiyaleke kɔni ango la wana.

⁶Mungu loonga ani, mbo lioti lia Abalayama liyalaka nde beenda nda yese ya bato basi ebatoundesa iyo bɛkɔwa la ebatokongol’iyo la obe ko miaka mia inɛi.

⁷Mungu loonga imɔ ko mbo— Imi nd’atofa bato ana se ebatoundes’iyo kwa bɛkɔwa, la mbisa iyo belasokolomoko ina la belasemolaka Imi nda elela-ye.

⁸Limɔ Mungu lofaef’inde ngɛla ya itombe, ongoma Abalayama loota Isaka la inde lotena inde itombe nda lise lia bonanɛi, Isaka loota Yakobo, Yakobo loota bangau basu liu la ambale.

⁹Limɔ bangau basu loungesa Yosefa nda Ejipeto ko l’eoka ya lisiela, kongo ko Mungu loyalaka lande;

¹⁰Inde louwes’inde nda bifembi yande bitotina, Inde lofaef’inde elame la wɛlï oso wa Falao, Bɔkɔta wa Ejipeto, oyataliaka Yosefa Komanda nda Ejipeto la nda bokulu wande bototina.

¹¹Kongo ko londo lofi lokwa nda yese etotina ya Ejipeto la Kanana la bifembi ya likama, ongoma batata basu batiaoshaka bieka omao.

¹²Nde okakä Yakobo mbo befonga yaaka nda Ejipeto, inde lotoma batata basu litoma lia oso.

¹³Limɔ nda lɔkɛndɔ loa imbale, Yosefa loluwesa baloo bande mbo ale to inde angɛnɛ, la bofindi wa Yosefa loluwana fololo ende Falao.

¹⁴Limɔ Yosefa lota sango wande ako Yakobo la eba bofindi wande batotina lioi, baaka bato kama bosambale la bɔɔmwi, mbo baɛkɛ end’inde,

¹⁵la Yakobo lɔkɛ konda yese ya Ejipeto, Inde la batata basu lowela ko omao,

¹⁶iyo lotolomo ko omao nda yese ya Shekeme, iyo loingesomo nda losai eloasombaka Abalayama la bieto ende bana ba Hamola nda Shekeme.

¹⁷Kongo ko ayaka mbile yokɔkɔmɛsɛ lisakä tina, lisakä lina eliatikaka Mungu ende Abalayama, bato loulwa wike, iyo losɛngɛ nda Ejipeto,

¹⁸konda mbile eyaɔlɔkɔ Bɔkɔta wasi isosha, oyatialuwaka Yosefa.

¹⁹Nde inde lokelaka tukela yasu ko bɔlɔwänɛ, inde lokongola batata basu mbo bakusheke banaoli bau tungi mbo batauwa.

²⁰Mɔsɛ aotomoko nda mbile ena, inde lɔɛnɛlɛ litutuku ende Mungu; ko la tengai isatɔ inde loongolomo nda ndakɔ ya sango wande.

²¹Nde inde lokushomo tungi, lamao boseka wa Falao loil’inde, la inde lokɔsɔl’inde kwa wana wande angɛnɛ.

²²Ongoma Mɔsɛ loekesomo biɛlï bitotina ya BaEjipeto la ayalaka fɔti ya lioi la elalaka nda likuwa liande.

²³Akondak’inde otowange wa miaka kama inɛi, botema wande losanga ndɔkɛ fɛtɛti ende beoto yande bako bana ba Isalaele.

²⁴Limɔ ɛnɛk’inde oto ɔmɔi wau atokongolomo, inde losungak’inde, inde lokundela oyakongolomu likundo, inde looma ewa Ejipeto kwu.

²⁵Mɔsɛ loenyela mbo beoto yande baluwi mbo Mungu asouwes’iyo ko la bosamba wande, kongo ko batialuwaka ongoma.

²⁶Limɔ lɛlɛngɔ, inde lɔkɛ liasi end’iyo ani batonana, inde lokota ndɔɔngɛsɛ bolengi wau, inde loonga mbo— Batolome, ino wende beoto; ¿Monito otolukana bɔfi?

²⁷Kongo ko inde ona oyalukaka wina lande bɔfi, inde mbo— ¿Ndai asɛli aɛ bɔkɔta la bokomyi wasu?

²⁸Oisɔlɛmbɛ ndoola’mi kwa oliki aɛ ewa Ejipeto lɛlɛngɔ? Okaka Mɔsɛ e-lioi-li inde lokwa botili, inde lokayala ndimela nda yese ya Midiana, la omao inde loota bana batolome bambale.

²⁹

³⁰Asilaka miaka kama inɛi, bokitomo lɔɛnɛlɛ ende Mɔsɛ nda liɔmbɛlɛ lia löngo loa Sinai, nda isasandu esiafyaka la wambe wa bösä.

³¹Enɛkɛ̈ Mɔsɛ ongoma, inde lomwaala liɛni lina, la asishanak’inde tina mbo aluweke litina, limiki lia Ngɛnɛ Mungu lookana mbo—

³²Imi yende Mungu wa batata baɛ, Mungu wa Abalayama, la wa Isaka, la wa Yakobo; Mɔsɛ loilima la bɔwa, atitendel’imɔ ndotichaka;

³³Limɔ Mungu loonga lande mbo— Sokolaka tokwaka nda batindi baɛ, eoka elela olo emali aɛ ende nyɛlɛ itanu.

³⁴Isɔɛnɛ ndwɛnɛ bobe ebosokelakomo bato bami nde Ejipeto la isooka besumo yau la isoya se ndɔɔnɔkɔl’iyo omao. Yauku kwani, itotom’aɛ nda Ejipeto.

³⁵E-Mɔsɛ-ao oyafekak’iyo oso mbo— ¿Ndai asɛli aɛ bɔkɔta la bokomyi? Mungu nd’atomaka ko inde ndoyala la bɔkɔta la boendoli ko la isosha sha bokitomo oyɛnɛlɛkɛ end’inde nda isasandu.

³⁶Ende inde oyatolak’iyo oso, oyakelaka ndembe ya bisisho nda Ejipeto la nda Eliya ya Balia batelu, la nda liɔmbɛlɛ ko la miaka kama inɛi.

³⁷Ende ko e-Mɔsɛ-yo oyaongaka la bana ba Isalaele mbo— Mungu atotaliela ino Bɔtɔndɔli, ambo ɔmɔi wa beoto yanu kwa ataliaka Inde imi.

³⁸Ende ko inde oyaaka la etanda nda liɔmbɛlɛ amamwito la bokitomo oyaongaka lande nda löngo loa Sinai amamwito la batata basu; inde lofomo baölo ba loiko bofaef’iso.

³⁹Batata basu batialɛmbɛkɛ ndok’inde, iyo loiliak’inde, iyo lokikwa nda betema yau kiko nda Ejipeto,

⁴⁰ani batoonga la Alana mbo— Keelak’iso mungu oyatokɛndɛl’iso oso, eoka e-Mɔsɛ-yo oyasokolak’iso nda Ejipeto, totiluwe ani esokelomo lande.

⁴¹Nda bacho bana, iyo lokela bɔfɔɔnɔ wa efembeli ya mbolo, iyo lotamba nyama yofechomo ende bɔfɔɔnɔ ona, limɔ iyo loomala eoka ya likuwa lia besamba yau angɛnɛ.

⁴²Nde Mungu loemboel’iyo bɔmbɔ wande, Inde lomach’iyo ndosemola tolonge twa use, kwa atomoko nda lokasa loa Bɔtɔndɔli mbo— ¿Mbo watambaka’mi nyama yoolomo la yotumbomo kwa lifaefi Ko miaka kama inɛi nda liɔmbɛlɛ, ino bɔkɔ̈kɔ wa Isalaele?

⁴³Mba, nde waswaka kumbo ya Moloko la ilonge sha mungu eko Lefana, La tokwelo etwakelak’ino okasemokola twao, Limɔ yeundolak’ino omao okakɛs’ino fangi eyɛmɔi ya Babela.

⁴⁴Batata basu baaka la hema olo asɔngɔmɔk’iyo ndokambesomo bikela nda liɔmbɛlɛ kwa aongaka inde oyakambesaka Mɔsɛ mbo akeleke yao ko la bɔfɔɔnɔ ewɛnɛsɔmɔkɔ inde.

⁴⁵Batata basu loaelakanaka hema ena, iyo lotola yao ani iyo amamwito la Yoshua loyɔsɔ e-yese-ye ani basayaka tukela yasi oso wau. Loaaka ongoma ko nda mbile ya Dawidi,

⁴⁶oyaɔlɔkɔ booto wa Mungu la oyaomba isosha shoswela Mungu eyaelo eoka ya bɔkɔ̈kɔ wa Yakobo,

⁴⁷nde aaka Solomo oyaswelaka Inde ndakɔ angɛnɛ.

⁴⁸Kongo ko Mungu Oyalongeli aitoyala nda ndakɔ eyekelomu la besamba ya bato, kwa aongaka Bɔtɔndɔli mbo—

⁴⁹Buse wende këka yami, Wenda bole esolo ya batindi bami; Ngɛnɛ Mungu mbo— ¿Boni bɔfɔɔnɔ wa ndakɔ botokeel’ino Imi; Bosamba wami angɛnɛ boisokela bitotina-bi?

⁵⁰Ino bato ba kingo ya betakwa, la ba betema la batoi ba bɛtɛkɔ, ongoma ko fɛtɔ la fɛtɔ ino nd’atofekaka Bolimo Botanu kwa batata banu, ko ino imɔ ko ongoma.

⁵¹

⁵²¿Boni Bɔtɔndɔli atiakongolomoko la batata banu? Baolaka imɔ ebataka boekï wa loyo loa Wengani, ako Inde oyasowamb’ino la oyasool’ino oko kwanikwani,

⁵³ino kongo ebafomoko Bikela ko la bakitomo ba isosha, nde otilitese yao.

⁵⁴Okak’iyo e-baoi-ba iyo looka betema wale finɛ, iyo lonyangakelesa Setefano bainyo bau.

⁵⁵Nde atumesomoko inde la Bolimo Botanu, inde lotichaka nda use, inde lɔɛnɛ tala ya Mungu la Yesu oyemali nda fangi ya olome ya Mungu,

⁵⁶inde loonga mbo— Tɛnɛ ngo, isɔɛnɛ buse boliolomu la Wana wa Boto emali nda fangi ya olome ya Mungu.

⁵⁷Nde iyo loamama la limiki lifi, iyo loliaka batoi mbo bataoka la batotina losungamel’inde limbilititi,

⁵⁸iyo lokushak’inde lousa loa bokenge, iyo loakola ndokushak’inde batälɛ, la ebawanjel’inde losɛlɛkɛ bisinda yau se nda bakolo ba liɛmba ako Saulo.

⁵⁹Akushak’iyo batälɛ, ani Setefano atosombola mbo— Ngɛnɛ Yesu, aelaka bolimo wami.

⁶⁰Limɔ inde loswa balui se, inde loamama la limiki lifi mbo— Ngɛnɛ, otangelek’iyo e-likeli-li libe. Aongak’inde ongoma, inde lokwa ilɔ. Nde Saulo lokulya liolomu liande.