Read lokele Tomo Ya Batomomu 9 Bible Online

Tomo Ya Batomomu 9 - lokele bible

Tomo Ya Batomomu 9

¹Kongo ko Saulo loyowayowaka nganyä yosingesa baeki ba Ngɛnɛ, inde lɔkɛ ende Kanga eyeti,

²okafel’inde kasa ende eba bisɔngɔmɛlɔ nda Damaseke mbo eosha ebimeli Mboka ya Liuwesi, kwa batolome ango batomali imɔ, inde koesh’iyo nda bɛnyɔlɔlɔ konda Yelusaleme.

³Nda lɔkɛndɔ loande, iyak’inde tina la Damaseke, futuku liangangi lia ibalibali sha use loangangel’inde la inde lokwa se kwu nda nyɛlɛ,

⁴la inde looka limiki elitoonga lande mbo— ¿Saulo, Saulo, otokongolaka’mi monito?

⁵Inde mbo— ¿Bwana, wende to ndai? Inde mbo— Imi yende Yesu oyatokongolomo laɛ.

⁶nde emalaka, ɔtɔkɔ nda okenge, limɔ lona elokakeleke aɛ kokambesomo aɛ.

⁷Kongo ko ebakɛndɛni lande loemakala ko tau; bokakä nde limiki, batiɛnɛkɛ nde boto.

⁸Saulo loemala ani ayalaka nda nyɛlɛ, nde aliolak’inde baiso, atiɛnɛkɛ yeka, limɔ iyo lounda inde la osamba okakɛs’inde nda Damaseke.

⁹La ko la becho esatɔ atiɛnɛkɛ, atialaka la atiamwaka yeka.

¹⁰Boeki ɔmɔi ayalaka nda Damaseke, lina liande liko Anania; la Ngɛnɛ loonga lande nda liɛni mbo— Anania! Inde mbo— Imi-yo, Ngɛnɛ.

¹¹Limɔ Ngɛnɛ mbo— Emalaka, kɛndɛkɛ nda mboka eyetangomu mbo Mboka ya fii la felaka nda ndakɔ ya Yudasi loasɔ loa boto ako Saulo wa Talusu, akosombola ko kwani,

¹²la asɔɛnɛ nda liɛni mbo boto ako Anania asoya oyatel’inde besamba mbo ɛnɛkɛ liasi.

¹³Anania lomutola mbo— Ngɛnɛ, isoka ko ende bato wike, njasɔ ya eboto-yo, njasɔ ibe finɛ eyakelaka’inde ende bato baɛ nda Yelusaleme;

¹⁴la eyamaya ale la isosha sha Kanga eyeti shokandaka batotina ebatosingwaka lina liaɛ.

¹⁵Ngɛnɛ loonga lande mbo— Kɛndɛkɛ, eoka ale ɛɛngɔ yami eyesoaa’mi yotolaka lina liami ende tukela ya wenda, la ende bɛkɔta la bana ba Isalaele.

¹⁶Eoka Imi nd’atoluwes’inde biale bifi ebikokek’inde ko l’eoka ya lina liami.

¹⁷Anania lɔkɛ, inde lɔɔtɔ nda ndakɔ, inde lotalia besamba ende Saulo inde mbo— Saulo etungani yami, Ngɛnɛ Yesu oyɛnɛliki ende aɛ nda mboka ani ayiki aɛ, asotoma’mi mbo wɛnɛkɛ liasi la mbo otumesomoko la Bolimo Botanu.

¹⁸Kwaamao yeka kwa mboso losokwa nda baiso bande, limɔ inde lɔɛnɛ liasi; inde loemala, inde lolufiomo.

¹⁹Limɔ alak’inde bieka, inde lowangema bindo.

²⁰Saulo loyala bacho bamɔi amamwito la baeki ba Damaseke la inde lonangoela Yesu nda bisɔngɔmɛlɔ ko la mbile-ao, mbo Inde nd’ale Wana wa Mungu.

²¹Batotina ebokak’inde lomwaala, iyo mbo— Oyo ati inde oyabebesaka bato ebatosingwaka e-lina-li? ¿Atiyeke eya mbo akɛsɛkɛ iyo ende Kanga ebieti ani basokandakomo bɔnyɔlɔlɔ?

²²Kongo ko Saulo lokɔkɔmɔ la bofoka, Inde lolonga BaYuda ebayalaka nda Dameseke la tonango twande, ani aesak’inde batina se mbo Oyo ako Yesu ende Masiya.

²³Mbisa ya bacho sumbu wike, BaYude lɔɔtɔ ikumbɛ shool’inde,

²⁴Kongo ko Saulo lokambesomo kuko yau; iyo lolamba biome ya okenge iyɔlɛ, la löwa la ocho, mbo bolek’inde.

²⁵Nde baeki bande lɔɔs’inde la ocho, iyo losulol’inde se k’olikolo lia likula nda bofalo.

²⁶Iyak’inde nda Yelusaleme, inde lokota ndowatema la baeki, nde iyo batotina lowang’inde, eoka batiimelaka mbo ale boeki wewe.

²⁷Nde Balanaba loesh’inde ende Batomomu, inde lokambes’iyo ani ɛnɛkɛ Saulo wɛnɛ Yesu nda mboka la ani aongaka Yesu lande, l’ani anangolaka inde la lotendela nda lina lia Yesu nda Damaseke.

²⁸Limɔ Saulo loyalaka lau, inde lɔkɛ lau l’olo l’olo ani atonangokole fololo nda lina lia Ngɛnɛ,

²⁹la inde lowalana la BaHela, nde iyo lokota ndool’inde.

³⁰Nde aluwaka beoto ongoma, iyo loesh’inde konda Kaisalia, limɔ iyo lotom’inde nda Talusu.

³¹Ongoma Etanda nda Yudea la Ngalilai, la nda Samalia, nda biese bitotina-bi, yao loyala la lilatɛmi, yao lokɔkɔmɔ kɔkɛ, yao lɔkɛ la oso yowanga Mungu nda lilitesi la ko la lisungi lia Bolimo Botanu yao loulwaka.

³²Akɛndɛkɛndɛkɛ Petelo inde loiya ende beoto ya Etanda nda Luda,

³³la omao inde loosha boto ɔmɔi lina liande liko Ainea oyaingaelaka tange ko miaka bonanɛi la loo loa lonyango.

³⁴Petelo loonga lande mbo— Ainea, Yesu Masiya asosäsol’aɛ, emalaka, komiaka tange!

³⁵Inde loemala lisasaya. Batotina ebayalaka nda Luda la Shalona, iyo lɔɛnɛ inde la iyo lokikwa ende Ngɛnɛ.

³⁶Nda Yopa botomali ɔmɔi oyaaka boeki, lina liko Tabita (litina mbo Dokase ako Kenge) la aaka botomali wa bofiimbi wokelaka tomo ya booto la bolau.

³⁷Nda bacho ana inde loaelo loo, limɔ inde lowa. Asoolak’iyo bolyo, iyo loingesa wao nda litenya olikolo lia ndakɔ.

³⁸Kwa ayalaka bokenge wa Luda tina la Yopo, okakä baeki mbo Petelo ale nda Luda, iyo lotoma bato ambale end’inde okat’inde lioi mbo— Olenjëke oya end’iso mangu.

³⁹La Petelo loemala okakɛ amamwito lau. Iyak’inde nda ndakɔ, iyo lɔkɛs’inde nda litenya olikolo lia ndakɔ, la eba tika ya olome batotina loemakala ndolingela bolyo ani batolela, iyo lotambaka kanjo la bisinda eyakelaka Dokase ani ayali inde oko amamwito lau.

⁴⁰Kongo ko Petelo lokusola batotina lousa, limɔ inde loswa balui se ndosombola. Limɔ inde lokikwa ende bolyo, inde loonga mbo— Tabita, emalaka! Otomali loliola baiso, limɔ ɛnɛkɛ̈ inde Petelo, inde loemesa bɔkɔngɔ.

⁴¹Petelo lof’inde bosamba la inde loemes’inde fii. Limɔ ani asota ebaimeli la eba tika ya olome lioi, inde loemes’inde oso wau oko la liwawi.

⁴²E-loasɔ-lo loluwana nda bokenge bototina wa Yopa la bato wike loimela Ngɛnɛ.

⁴³La Petelo lotikala bacho wike nda Yopa la boto ako Simona oyaaka wömesi wa kofo ya nyama.