Read lokele Baloma 15 Bible Online

Baloma 15 - lokele bible

Baloma 15

¹Iso to ebale la bosangwu nda lilendelu tosungeke eba bɔlɛmbu ndotolaka belito ya fee ebile lau angoluka fofe yoomala ko iso angɛnɛ;

²nde oto la oto wasu aomaleseke boyalani nda njasɔ bilau ndokɔkɔmɛsɛ Etanda.

³Eoka Masiya atiaomalesaka Inde angɛnɛ, nde lole kwa asɔnɔmɔkɔ nda Lokasa, mbo— Baɛngɔ ebafomoko end’aɛ, basokwa ko ende Imi.

⁴Eoka eyasɔnɔmɔkɔ kwala, losɔnɔmɔ eoka ndoekes’iso mbo ende ko la likɔkɔmɛlɛ la lisungi lia Kasa ya Mungu mbo toyaleke la iyɛli angɛnɛ.

⁵Mungu to oyale Ngɛnɛ wa bɔkɔkɔmu la lisungi lia otema afek’ino fofe yoyalaka la botema ɔmwito kwa alɛmbi ko Masiya Yesu,

⁶mbo ko la botema ɔmwito la limiki limwito ino kotaliaka Mungu tala, ako Sango wa Ngɛnɛ wasu Yesu Masiya.

⁷Eokao nyangelanaka kwa asokela imɔ ko Masiya ndonyangel’ino mbo Mungu ataliomoko tala.

⁸Imi mbo Masiya ayaka to ende BaYuda eba iongo sha itombe nda boyaeli wa bosungi ndokɔkɔmɛsɛ wewe wa Mungu la ndokɔkɔmɛsɛ imɔ basakä ebafomoko batata,

⁹la mbo eba tukela yasi baineleke Mungu eoka ya booto wande end’iyo, kwa asɔnɔmɔkɔ nda Lokasa mbo— Eokao, itoaolaka lina liaɛ la liineli ende eba wenda bototi, La itotwa bɔɛlɛ woinela lina liaɛ.

¹⁰Liasi imɔ mbo— Omalaka la limɛngɔ, ino ba wenda bototi, Amamwito l’eba tukela ya Mungu.

¹¹Liasi imɔ mbo— Inelaka Yawe, ino ba wenda, Ino bato batotina yaimweselak’Inde.

¹²La Yesaya imɔ mbo— Oyaotomökö nda bofindi wa Yese eyaka nde, La oyatotaliomo atokakalesa eba wenda; Iyɛli sha tukela bitotina sile ko end’Inde.

¹³Mungu to Ngɛnɛ wa iyɛli shasu, atumesek’ino la bootaota la lilatemi ko la lilendelu mbo ofoteke la iyɛli shanu ko la bofoka wa Bolimo Botanu.

¹⁴Bitungani yami, iluwi to ndoluwa imi angɛnɛ loasɔ loanu mbo ino angɛnɛ osotuma fuu la bolau, la liluwani la wɛli la mbo otokɔkɔlɔ imɔ ndoekesa basi.

¹⁵Isosɔnɛl’ino la lotendela nda botüku ɔmɔi ko ndoenyakeles’ino njasɔ bimɔi ko la booto ebosofomo’mi ko la Mungu,

¹⁶oyasota’mi lioi ndoyala wɛndi wa Masiya Yesu ende tukela ya wenda; yende sumbu kwa kanga wa Mboli Ilau ya Mungu oyatotambela Inde eba wenda kwa lifaefi elitokuliomo olau la elitoüchomo ko la Bolimo Botanu.

¹⁷Yende to la litina liomala la bɔmɛtɔ sumbu loasɔ loa likuwa liami lia Mungu ko l’eoka ya Masiya Yesu.

¹⁸Iitotendela ndoonga loasɔ loasi, sakolo ngo ko nda yao ebisokela Masiya angɛnɛ ko lami ndokesa eba tukela ya wenda, ko la lioi la bekeeli imɔ

¹⁹ko la ndembe ya tokesa twa bofoka wa Bolimo Botanu; ongoma nda Yelusaleme la nda yese bitimbi konda yese olo ayali Makedonia, isɔɔlɔlɔ ndonangokola Mboli Ilau ya Masiya;

²⁰ongoma to yasamaka sumbu finɛ fofe yonangola Mboli Ilau olo atianangoelomoko lina lia Masiya oso, mbo itaswa likolo lia lionda lia oto wasi,

²¹kangä kwa asɔnɔmɔkɔ nda Lokasa mbo— Ebatianangoelomoko mboli yande, belɛnɛkɛ to Inde, La ebatiokaka, belaluwesomoko litina.

²²Ko la litina-li isotakufesomo bäkufa wike mbo itaya end’ino

²³nde kwanikwani itiɛnɛ imɔ fofe ya likuwa nda yese-ye, isoyala la yɛmɛ finɛ yɔɛn’ino ko la miaka wike;

²⁴ongoma to akakɛkɛ’mi nda yese ya Isipanya, iyɛli shami sile mbo yɛnɛk’ino ani atoeta’mi la mbo ino okatikɛkɛ’mi nda mboka mbisa ani isookana lanu limɛngɔ sumbu.

²⁵Kongo ko isotakɛ nda Yelusaleme okatika lisungi liko lifaefi ende ebaEtanda,

²⁶Eoka eba tukela ya Makedonia la Akaiya basosanga osɔnjaka lifaefi la limɛngɔ ndokaela liao ende eba touwe ba Etanda nda Yelusaleme;

²⁷basokela to ongoma la limɛngɔ la bende lau la bolima eoka ango eba tukela yasi bɛɔlɔ likaɔ lia lifaefi lia bolimo elisoesha BaYuda, ongoma lole loau ndosunga imɔ ko BaYuda la yeka eyele la bindo yau la boeno.

²⁸Akasileke’mi lotomo-lo, la akaɔlek’iyo lifaefi-li elisomonya’mi, limɔ itoketa eyanu okakɛ nda Isipanya.

²⁹Iluwi nde mbo akayeke’mi end’ino, itoeshel’ino ambole ya lifotesi lia Masiya.

³⁰Bitungani yami, isolɔmbɔkɔl’ino ko la Ngɛnɛ wasu Yesu Masiya la ko la losamɔ loa Bolimo mbo iso lanu lami tofumbakaneke nda lisomboli ende Mungu loasɔ loami,

³¹mbo yɔnɔkɔlɔmɔkɔ nda besamba ya ba Yudea ebatiimele, la mbo lotomo loami losung’iyo loomaleseke eba Etanda nda Yelusaleme,

³²la mbo iyek’end’ino la bootaota, la Mungu ɛlɛmbɛ ongoma, imi koɛumaka sumbu amamwito lanu.

³³Mungu Ngɛnɛ wa lilatemi ayaleke to lanu yaatotina. Ongoma.