Read lokele Baloma 2 Bible Online

Baloma 2 - lokele bible

Baloma 2

¹Eokao, aɛ oyatofaka boto wasi se, oti ango la lioi lia liasala lioonga eoka atof’aɛ wasi se, aɛ angɛnɛ imɔ osofomo se; eoka otokelaka aɛ angɛnɛ ko ongoma.

²Toluwi nde mbo likomyi lia Mungu lile ngo ko wewe elitofaka bato se ebatokelaka bɔfɔnɔ-bo wa obe.

³¿Aɛ boto oyatofa bato ebatokelaka yao se, ani aɛ angɛnɛ otokelaka yao, otangi nde mbo otolonga ndotila likomyi lia Mungu?

⁴¿Mbo osoolya booto la limɛsɛli lifi lia Mungu la liombakeli liande eliti la esole? ¿Otiluwe mbo booto bofi wa Mungu botokɔkɔlɔ ndoinwes’aɛ ko nda likalangani?

⁵Kongo ko eoka ya bowau wa botema waɛ ebotikalangane, aɛ angɛnɛ osoukamesa bondanda wa efango eyekawɛlɛmɛkɛ end’aɛ nda lise lia efango elitoɛnɛlɛ nda likomyi lia Mungu,

⁶oyatɔɔlɛsɛ boto la boto bondanda woengana la bekeeli yande;

⁷ende ebasokɔkɔmɔ nda bekeeli bilau yolukaka tala la loliteso la loiko, atof’iyo ko liwawi lia layalaya;

⁸nde ende tochocho etoitolitesa momongo, kangä ko yao ebitiengane, bɛwɛlɔmɔkɔ efango la lisomi.

⁹Bifembi la bomusi bilawɛlɔmɔkɔ nda botema wa boto oyatokelaka bobe, ende BaYuda oso la BaHela lisanga.

¹⁰Nde tala la loliteso la lilatemi ende boto la boto oyatokelaka bolau, ende BaYuda oso la BaHela lisanga.

¹¹Eoka Mungu aitokwelakwela bɔmbɔ wa boto nda likomyi liande.

¹²Eoka batotina ebasokelaka obe, ani batiluwe Bikela ya Mɔsɛ, belakuchomoko, nde inga to la bieo ya Bikela; kongo ko batotina ebasokelaka obe ani baluwi Bikela, ambo belafomoko se ko la Bikela.

¹³Bati to ebatolaila Bikela kongo ebatoengana nda baiso ba Mungu, kangä ebatolitesa yao nd’atofomo likolo nda likomyi.

¹⁴Eoka atolitesa bato ba wenda olitesa Bikela ko la betema yau angɛnɛ, ani bati to la Bikela, ambo betema yau yende bikela end’iyo;

¹⁵ambo batotamba bato basi mbo bikela bisotakomo kwa yao ya Lokasa nda betema yau, olo eluwanelo ya olau la obe etokuliana ndoluwesa la wɛli, angoko baenyeli bau bataf’iyo se angoko ndof’iyo lioi lia liasala,

¹⁶nda lise lina elitokomya Mungu okomyela njasɔ ebiisami nda betema ya bato ko la Yesu Masiya-kwa atoekesomo ko la Mboli Ilau ebisonangola’mi.

¹⁷Nde eya to mbo watomo lina liko WaYuda la bolendelo ngo ko Bikela ya Mɔsɛ la boomalaka la bɔmɛtɔ nda lina lia Mungu,

¹⁸mbo oluwi nde lisangi liande la otangi nde mbo Bikela bisoeta la olau ebisoekesomo aɛ,

¹⁹la boluwa ndoluwaka mbo aɛ wende botoli oso w’eba botuku woɛnɛs’iyo mboka, la mbo wende imɔ imwɛli shofachela ebale nda lilima,

²⁰la mbo wende imɔ boluwekesi w’ebati la liluwani la boekesi wa bainɛngɛ eoka wende la boyaeli wa liluwani la wewe nda Bikela yanu,

²¹aɛ boekesi wa boto wasi, oitoekesa botema waɛ angɛnɛ? ¿Oyatotaka boeki mbo— Wiyëke! Aɛ angɛnɛ wiyaka nde?

²²¿Oyatoonga mbo angotwa nyongo, aɛ angɛnɛ ototwaka nyongo? ¿Oyatooka bakëngë la fengö bɔlɛlɔ, aɛ angɛnɛ otoiya yeka ya ndakɔ ya mungu ya bɔfɔnɔ?

²³Oyatoomala l’ifäälä eoka ya Bikela, ototefwesa Mungu ani ototefola Bikela?

²⁴Kwa asɔnɔmɔkɔ nda Lokasa, ko ongoma-Lina lia Mungu litotomo bɔkɛcha nda tukela bitotina ko l’eoka yanu.

²⁵Liteni lia itombe lile la litina lilau ani osolitesa Bikela ya Mɔsɛ, nde botefokola Bikela, limɔ liteni liaɛ lia itombe lile ngo ko losunga wawa.

²⁶¿Eokao to, eya mbo boto wa losunga elitekesa baiti ba Bikela, losunga elole lande angotangomo to mbo liteni lia itombe?

²⁷Ongoma oyatikali ngo losunga, nde kolitesa Bikela, inde nd’atokomyel’aɛ oyale la Lokasa loa Mungu la liteni lia itombe lisanga, nde ototefokola Bikela.

²⁸Eoka boto ati to WaYuda oyakweli nde bɔfɔnɔ wande ko lousa, la liteni elisoɛnɛlɛ nda lokomba liti elia wewe;

²⁹kongo ko boto ale WaYuda oyayali ongoma ko nda botema wande, la liteni lia itombe lile loasɔ loa botema imɔ, ndembe ya bolimo, inga ndembe eyetomu nda lokasa. WaYuda wa wewe atiinelomo la bato, kangä ko la Mungu.