Read lokele Baloma 3 Bible Online

Baloma 3 - lokele bible

Baloma 3

¹¿Eya to ongoma BaYuda bafoti nde l’iye? ¿Boni bondanda bofomu nde la liteni lia itombe?

²Wike, ko la batina wike; elia oso ko mbo ende BaYuda Baoi ba Mungu basotikomo mbo batinganeke la bao.

³Ko la moni to? ¿Bamɔi beyalaka la boeno wa lilendelu; fee yau kosɛɛsɛlɛsɛ likɔchi lia Mungu liokɔcha basakä bande?

⁴Mbayo, ango sinyo! Kangä mbo batotina baluweke mbo Mungu ende ko momongo, ani basi batotina bende ko la nanga; kwa atomoko nda Lokasa mbo— Mbo wenganesomoko wewe ko la baoi baɛ, La bolongesomoko ani otokomyielomo loasɔ.

⁵Nde ango batwanelo basu bɛnɛkɛsɛ liengani lia Mungu, ¿iso koonga moni? ¿Mbo Mungu atiengane ani atokuchak’iso la efango yande? Imi bolomboki nd’atoonga kongo.

⁶Mbayo, ango sinyo! Eya ongoma, ani Mungu kokomya njasɔ ya wenda-bo la moni?

⁷¿Eya to mbo wewe wa Mungu angɛnɛ bosotaliomo tala ko l’eoka ya ewami bolimbakeli, monito imi nd’atofomo se mbo yende boto obe?

⁸Monito iso angokelaka bobe ko mbo bolau boyeke, kwa atoonga bato bamɔi ba lisɛɔli libe mbo iso nd’asoonga ongoma? Bato ana basofakomo se ko wewe.

⁹¿Monito, iso BaYuda nd’alongeli to? Mbayo, ango sinyo! Iso nd’asotaaesa loasɔ-lo se mbo BaYuda la BaHela lisanga batotina fee bende ko nda eundelo ya bobe;

¹⁰loisotomo nda Lokasa mbo— Angwɛnɛ oto angɔmɔi wengani,

¹¹Angwɛnɛ woluwa, angwɛnɛ wolukaka Mungu.

¹²Kongo ko batotina basoengwa mboka, basoeyaeya ko wawa; Angwɛnɛ wokelaka bolau la wɛli, angɔmwito.

¹³Kingo yau bile kwa losai elokoliolomo, Ndame yau yende la bolimbakeli; Lisäkä lia imamoa lile nda bikwekwebu yau.

¹⁴Bɛnɔkɔ yau bisotumaka la limɔli la luno.

¹⁵Bakolo bau batotangwaka mangu okasendola bakila;

¹⁶Lɔsɛɛsɛlɔ la tokange bisomachomo nda mboka ebietelak’iyo.

¹⁷Batiluwe mboka ya lilatemi;

¹⁸Liwangi liowanga Mungu lititichomo la baiso bau.

¹⁹Toluwi nde mbo Bikela ya Mɔsɛ bitoonga loasɔ loa ebatokanjomo la Bikela; ani bɛnɔkɔ bitotina belinjomoko la mbo bato batotina ba wenda batokomyiomo ko la Mungu kongo.

²⁰Eoka nda baiso bande angwɛnɛ bolomboki wofomo likolo ko l’eoka yolitesa Bikela, eoka Bikela bisoesha lilembeelesi lia batwanelo.

²¹Nde kwani lienganesi lia Mungu lioenganesa bato lisoɛnɛlɛ mbo litikandomo ko la Bikela nde Lokasa loa Bikela la eya Batɔndɔli bitokambes’iso loasɔ loa liao;

²²liengani lia Mungu ko l’eoka ya lilendelu lia Yesu Masiya ende batotina ebatolendelo Inde, bato batitwane,

²³eoka batotina basotwanelo la basoomelo bolau wa tala ya Mungu.

²⁴Batoenganesomoko ko la booto wande, lifaefi elitofomo ko la liendoli lia Masiya Yesu.

²⁵Mungu asɛlɛk’Inde Boendoli wa bato abe, ko la lilendelu liolendelo bakila bande. Ongoma Mungu loɛnɛsɛ liengani liande mbo ko la limɛsɛli lia batwanelo ba oso asomacha bao,

²⁶eoka ndoɛnɛsɛ mbo Inde angɛnɛ ale liengani nda mbile-ye kwanikwani la mbo ale Wenganesi wa ebatolendelo Yesu.

²⁷Bɔmɛtɔ wasu BaYuda anima to? Bosotunga tuu. ¿Eoka ya eni ekela to? ¿Eoka ya bekeeli yasu? Mbayo, kangä eoka ya ekela ya lilendelu.

²⁸Eokao, tosotanga mbo boto atofomo likolo mbo engani nde, ko l’eoka ya lilendelu kongo, inga eoka ya lilitesi lia Bikela.

²⁹¿Nde Mungu ende to wa BaYuda kongo? ¿At’imɔ ko Mungu wa tukela yasi lisanga? Eingo, imɔ ko wa tukela yasi,

³⁰ani ende ko Mungu ɔmwito, la atoenganesa ebatotena totombe loasɔ loa lilendelu la eba losunga imɔ ko la lilendelu.

³¹¿Ongoma to, mbo tosoambokola Bikela ko l’eoka ya lilendelu-li? Mbayo, ango sinyo, nde tosekɔkɔmɛsɛ Bikela.