Read lokele Baloma 5 Bible Online

Baloma 5 - lokele bible

Baloma 5

¹Aenganesomokö iso to ko la lilendelu, ongoma twende la lilatemi ende Mungu ko l’eoka ya Ngɛnɛ wasu Yesu Masiya;

²ko lande tosɔɔtɛsɔmɔ nda eyaelo ya lilendelu ko nda elame ya Mungu olo asokɔkɔmɔ iso la tosoomalaka eoka ya iyɛli shoyala nda tala ya Mungu.

³Inga yao kongo, kangä imɔ liomali lile lasu eoka ya bifembi yasu, eoka toluwi nde mbo bifembi bitoeshel’iso likɔkɔmɛlɛ;

⁴la likɔkɔmɛlɛ litoeshel’iso bofoka wolembeela bobe; la wao botoeshel’iso iyɛli sha losamɔ loa Mungu;

⁵la iyɛli-si siitookes’iso sɔni eoka losamɔ loa Mungu losowɛlɔmɔ nda betema yasu ko la Bolimo Botanu oyafomoko iso.

⁶Eyayaelak’iso ko mbuwa nda lisho lioengana, Masiya lowel’iso bato ba obe.

⁷Eoka ende tale ndowela ango oto wa liengani, nde eya boto bolau angɛnɛ, ambo ɔmɔi kotendela ndowel’inde.

⁸Nde Mungu lɔɛnɛkɛs’iso eloande losamɔ mbo eyayaelak’iso ko bato babe Masiya awelak’iso.

⁹Nde simbi to kwa aenganesomu iso eoka ya lisendwi lia bakila bande, Inde nd’atouwes’iso nda efango eyetoya.

¹⁰Kwa eyayaelak’iso biyani la Mungu, liwa lia Wana wande lisootwanes’iso lande la lilatemi liasi, simbi to kwani tosootwana lande, totouwesomo ko l’eoka ya loiko loande.

¹¹Inga to la litina-li kongo, kangä imɔ mbo tosoomala la Mungu ko la Ngɛnɛ wasu Yesu Masiya oyasootwanes’iso kwani liasi la lilatɛmi.

¹²Eokao, kwa ayaka bobe nda wenda-bo ko l’eoka ya bolomboki ɔmɔi kongo, la liwa imɔ loasɔ loa bobe, ko ongoma liwa lisoyaka ende bato, boto la boto, eoka batotina basotwanelo.

¹³Bobe wayalaka nde nda wenda oso wa Bikela, kongo ko bobe botitangomo ende bato ani Bikela bititayalaka.

¹⁴Nde liwa liakakalesäkä wenda ko nda Adamu, boto wa oso, konda Mɔsɛ, ango wokakalesa ebatiakelaka bɔfɔnɔ ona wa obe ewakelaka Adamu, oyaaka ndembe ya Inde oyakayeke.

¹⁵Kongo ko litwanelo lina litikweele lifaefi liko liengani eoka ango wike basowa eoka ya litwanelo lia boto ɔmɔi, nde booto wa Mungu la lifaefi lia booto wa boto ona ako Yesu Masiya bosoelwaka finɛ ende bato wike.

¹⁶La lifaefi lina litikweele fendelo ya litwanelo lia boto ɔmɔi ona; eoka litwanelo eliafaka boto ɔmɔi se litiengane la lifaefi lifi elitoesha lienganesi lia batwanelo wike.

¹⁷Eoka ya litwanelo lia boto ɔmɔi liwa lisolongela ko la boto ona, nde simbi to ebasɔɔlɔ lilya lia booto la lifaefi lia lienganesi liande, belalengaka la loiko eoka ya Boto ɔmɔi ako Yesu Masiya.

¹⁸Ongoma, eoka ya litwanelo lia boto ɔmɔi, bato batotina basofomo se, ko ongoma lienganesi lia boto ɔmɔi lisofaka batotina likolo, lisoemes’iyo liasi, ambo nda loiko loa liengani.

¹⁹Eoka ya litefoli lia boto ɔmɔi, bato wike basoyalesomo eba batwanelo, ongoma ko l’eoka ya lilitesi lia Boto Ɔmɔi bato wike batoyalesomo eba liengani.

²⁰Nde Bikela bisoyatuta ko mbisa ko ndokondesa litwanelo, kongo ko akondaka litwanelo, ongoma booto imɔ akondakondaka likama,

²¹ani ayalaka bobe bokakalesi amamwito la liwa, ko ongoma booto bosokakalesa bato la lienganesi lioeshaka loiko loa layalaya buu ko la Yesu Masiya Ngɛnɛ wasu.