Read lokele 1 Bakolinto 8 Bible Online

1 Bakolinto 8 - lokele bible

1 Bakolinto 8

¹Kwani to loasɔ loa bieka ebisotambomo oso wa bɛfɔnɔ ya mungu; toluwi nde mbo iso yaatotina tole la wɛlï nda loasɔ-lo. Kongo ko wɛlï angɛnɛ bototumesa bato la bɔmɛtɔ, nde losamɔ lotokɔkɔmɛsɛ bato la olau.

²Boto etanga nde mbo asɔɔlɔ wɛli, ambo akaluwi wao ewengani lande ndoluwa.

³Nde boto esama nde Mungu, boto ona asoluwomo la Mungu.

⁴Nda loasɔ loa bieka ebisotambomo nda lisemoli lia bɛfɔnɔ ya mungu, toluwi to mbo angwɛnɛ mungu ya bɛfɔnɔ ya wewe nda wenda-bo, la angwɛnɛ Mungu sakolo ngo ko Ɔmwito.

⁵Nde yao ebisofomo lina mbo mungu, kwa nda use angoko ono se nda nyɛlɛ-bende bamungu la bangɛnɛ wike,—

⁶kongo ko iso nd’ayali la Mungu ko Ɔmwito ako Sango oyakelaka bitotina la iso yaatotina tosoomana lande, la Ngɛnɛ ko Ɔmwito ako Yesu Masiya oyakɔkɔmɛsɛkɛ bitotina la iso bato lisanga.

⁷Nde wɛlï-bo botiyale la batotina, nde bamɔi basotanga mbo bɛfɔnɔ yende wewe konda wainɛngɛ ko kwani la batolaka bieka ina mbo bisotambomo ende mungu ya bɛfɔnɔ limɔ eoka mbo elembeelo ya botema ele la bɔlɛmbu, iyo ana basobeba eoka ya bokili ebosowang’iyo.

⁸Nde bieka biitoiyes’iso ende Mungu; tokila bieka toitoomelo la tola iso angofota.

⁹Kongo ko tichaka la wɛlï mbo lisokoli lia bokili wanu litakwesa basi ebatikɔkɔmɛ.

¹⁰¿Ango boto to ɛɛnɛ aɛ, boto wa wɛlï nda loasɔ-lo, ani otolaka bieka nda mɛsa ya esemoelo ya bɛfɔnɔ ya mungu ani inde angola ko l’eoka mbo elembeelo yande etikɔkɔmɛ loasɔ loa bieka nda esemoelo ya bɛfɔnɔ?

¹¹Ongoma etungani yaɛ oyatikɔkɔmɛ asosɛɛsɛlɛ eoka ya wɛlï waɛ ani Masiya awelaka nde etungani ena.

¹²Ko ongoma asokeël’ino bitungani yanu obe ko ndoswak’iyo baswa nda elembeelo eyetikɔkɔmɛ, osokeel’imɔ ko Masiya obe.

¹³Eokao eyambo yekwesa etungani yami se ko l’eoka ya bieka ina ebisola’mi, itialek’imɔ yao liasi ko layalaya, mbo itakwesa etungani yami se.