Read lokele 2 Bakolinto 12 Bible Online

2 Bakolinto 12 - lokele bible

2 Bakolinto 12

¹Ango yeomala l’ifaala, shao angɔɔlɛsɛ’mi olau; itɔkɛ la oso okaluwes’ino loasɔ loa liɛni la lɔɛnɛsɔmu loa Ngɛnɛ eyɛnɛlɛkɛ ende’mi.

²Iluwi nde boto oyaundomoko la bofoka wa Masiya, kwani miaka liu la inɛi bisoeta; elua ayalaka bolomboki, elua atiayalaka la bindo yande, itiluwe, kangä Mungu angɛnɛ nd’aluwi, nde aundomoko inde ongoma la Masiya, inde loilomo likolo konda buse wa isatɔ.

³Iluwi imɔ mbo boto-ao, elua ayalaka bolomboki, elua atiayalaka la bindo yande, itiluwe, kangä Mungu angɛnɛ nd’aluwi, nde inde loilomo konda Paladiso.

⁴Limɔ inde looka baoi ebati boongomo, bati bosingwomo la bɔnɔkɔ wa boto.

⁵Itoomala l’ifaala loasɔ loa boto-ao, kongo ko iitoomala l’ifaala loasɔ loami angɛnɛ sakolo ngo ko loasɔ loa bɔlɛmbu ebole lami.

⁶Ango yesanga ndoomala, imi angoyala ebebe eoka itoonga ko wewe. Nde itokufa ndoonga mbo boto atatanga nde boyaeli wami bosolongela wao ebosɔɛn’inde la bosok’inde ende’mi;

⁷limɔ eoka ya ambɔlɛ wa lɔɛnɛsɔmɔ, mbo itaomala finɛ, yafomoko bakɛ̈kɛ wa lowelo finɛ nda lokomba loami, botomomu wa Satana wolukaka’mi bofi mbo itaomala likama.

⁸Yasombolaka Ngɛnɛ basombola basatɔ nda loasɔ-lo, mbo asokoeleke’mi wao;

⁹nde Inde loonga lami mbo— Booto wami boengani nde laɛ, eoka bofoka wami bosɔɔlwa ko nda bɔlɛmbu waɛ. Ongoma to yende la limɛngɔ ndoomala loasɔ loa bɔlɛmbu wami, mbo bofoka wa Masiya boobyameleke’mi kwa losambɔ.

¹⁰Eoka ya Masiya to isoyala la limɛngɔ nda botema imɔ ko la bɔlɛmbu, la bɔfi la bifembi, la likongolomu, la baömä; eoka atoyala’mi la bɔlɛmbu, kwaamao yende la bofoka finɛ.

¹¹Isokinjwa kwa ebebe, nde ino nd’asotinjaka’mi. Loengani nde lanu ndoongela’mi ende basi eoka im’iti mbisa ya batomomu ana ba lokuku, ango sinyo; ambo iti yeka wewe.

¹²Kongo ko ndembe ya Batomomu angɛnɛ bisɔɛnɛlɛ ani bisokelomo sisi yanu la bofiili ko la ndembe la bisisho la tokesa.

¹³¿Watangomoko nde mbo otiengane la bitanda ebimɔi nda loni to loasɔ, sakolo ko mbo imi angɛnɛ itiyaleke bolito end’ino? Mɛsɛlɛkɛ to’mi nda litwanelo-li!

¹⁴Tɛnɛ ngo, litonji lia asatɔ elikotonja’mi lɔkɛndɔ loami loya fɛtɛti end’ino; itiayale bolito end’ino eoka itiluke yeka yanu kangä betema yanu. Eoka bana baitosɔnjɛlɛ ebaot’iyo bieto, kangä sango la nyango nd’atosɔnjela bana bau.

¹⁵Ongoma to imi nd’atomelesa bieto yami la limɛngɔ la liwawi liami imɔ eoka ya betema yanu. ¿Yesamak’ino la losamɔ loeta, mbo ino kosama nde’mi la losamɔ lɔmyɔ?

¹⁶Loyaleke to ongoma, nde bamɔi mbo imi angɛnɛ itiyaleke bolito end’ino, kongo ko isolimbakel’ino la shɔngɔlɔ esiyali lami!

¹⁷¿Mbo isolimbak’ino ko ndolola yeka yanu ko la bato ana ebasotoma’mi otomel’ino?

¹⁸Yafelaka Tito ndoya end’ino fɛtɛti la etungani yasi imɔ amamwito lande; ¿Mbo Tito asolimbak’ino i? ¿Iso lande toisokɛndɛkɛndɛ la botema ɔmwito? Iso lande toisokɛndɛkɛndɛ cha ko la mboka ko ɛmwito?

¹⁹¿Otangi nde mbo baoi-ba wike bende ko ndomutoel’ino tofenya? Nde tosoonga kwa mbo oso wa Mungu la isosha sha Masiya, la baoi batotina bende ko loasɔ loanu, ebasamomu lami, mbo ikɔkɔmɛsɛkɛ ino.

²⁰Iwangi nde mbo itaya oyaosh’ino la boyaeli ebotilɛmbɛ’mi la mbo ino angoosha’mi angɛnɛ la boyaeli ebosolɛmb’ino; iwangi nde mbo itaosh’ino la liwesani, la liya, la efango la tochocho, litɔngwi la bolao, bɔmɛtɔ la lieyaeyi.

²¹Isowanga mbo, akayeke’mi liasi, Mungu atachambola’mi loasɔ loanu la mbo itawa ikɛnɛnɛ eoka yanu wike ba batwanelo ebasow’iyo angotakalangana kɔni, bako bɔwɛwɛ la nyongo la bolëfë ebisotwak’iyo.