Read lokele 2 Bakolinto 6 Bible Online

2 Bakolinto 6 - lokele bible

2 Bakolinto 6

¹Ongoma to iso ebasokelana la Masiya elikuwa-li, tosolɔmbɔkɔl’ino mbo wɔlɛ̈kɛ booto wa Mungu liɔlɛlɛ, eoka Inde loonga mbo—

²Nda fofe yɔɔlɛlɛ, isolail’aɛ, La nda lise lia liuwesi isoyasung’aɛ. Tɛnɛngo, kwani ele fofe yɔlɔkɔ booto, Tɛnɛ to louse-lo lise lia liuwesi!

³Totikufese boto angɔmɔi ango sinyo mbo likuwa-li litafomo liɛngɔ.

⁴Kongo ko iso ebatokuwela Mungu tosokota ndoengana la wɛlï nda likuwa; ko la likɔkɔmɛlɛ eliti la itɔɔ, la nda bifembi, la nda baömä,

⁵la nda bakuchomu, nda bɔnyɔlɔlɔ, nda besho, nda bonui, la botengu wa bocho, la nda londo;

⁶ko la botanu wa bekeeli, nda liluwanesi lia Bolimo, nda bofiili, la bɔfɔɔmu, la nda booto; nda bolimo botanu, la losamɔ eloti la bolimbake;

⁷la nda lioi lia momongo, nda bofoka wa Mungu; la biɛla ya liengani nda bosamba wa olome la nda bosamba wa wali;

⁸la loliteso lolau la nda sɔni, la lokuku lobe la nda lokuku lolau imɔ. Tosotangomo mbo tolimbichɔli, nde twende eba momongo;

⁹bamɔi angoluw’iso ango sinyo, nde basi basoluwana lasu la wɛlï, tosotangomo mbo ebasambowa; nde tɛnɛngo tokowawa; tosokuchomo, nde totiolomo;

¹⁰tosowa ikɛnɛnɛ, nde mbile la mbile tosoomala la limɛngɔ; twende touwe nde totofotekesa bato wike; toti ango la shaya, nde tososɛlɛ yeka bitotina.

¹¹Ee, ino BaKolinto, isoasoel’ino bɔnɔkɔ wami la botema wami bole fololo nda baiso banu;

¹²betema yanu bitisɔlɔnɛsɔmɔ ko lasu, nde ino angɛnɛ ososɔlɔnɛsɛ betema yanu!

¹³Inoelaka to’mi ko ongoma, kelaka kwa bana bami, faloelaka’mi betema yanu imɔ!

¹⁴Wakolëke ndowatemana la bato basi ebatiimele Ngɛnɛ; ¿Liengani la litefoli lia Bikela batosangana to nda lini likaɔ? ¿Linyanya la lilima batosangana la moni?

¹⁵¿Lini likulyani lisoyala la Masiya la Satana? ¿Boto wa liimeli, la oyatiimele kosukana la lini to lisaɔ?

¹⁶¿Eyaelo ya Mungu la bɛfɔnɔ ya mungu kokuliana la moni? Eoka iso nd’ayali to eyaelo ya Mungu wa liwawi, kwa aongaka Mungu angɛnɛ mbo— Itoyalaka lau la itokɛndɛkɛndɛ sisi yau, Itoyala ewau Mungu, la iyo batoyala ebami bato.

¹⁷Eokao, Mungu loonga mbo— Sokwaka sisi yau, sɛnyanaka lau, Omatëke boto oyatitane, limɔ Imi nd’atoaela ino.

¹⁸Itoyala kwa Sango end’ino la ino koyala kwa bana bami Batolome la batomali, Mungu Ngɛnɛ wa Bofoka asoonga ongoma.