Read lokele 2 Bakolinto 8 Bible Online

2 Bakolinto 8 - lokele bible

2 Bakolinto 8

¹Bitungani yami, iluwesek’ino loasɔ loa bootaota wa Mungu ebosɔɛnɛlɛ nda bitanda nda Makedonia, boko mbo basokusokola lifaefi liosunga basi,

²la mbo nda mbile ya bifembi ebisokɔtɔl’iyo, limɛngɔ elisok’iyo ango nda mbuwa yau, lisoelwaka likama nda lifaefi lifi elisofaef’iyo ko lifaefela.

³Imi angɛnɛ nd’asoaola mbo basokusokola lifaefi litotina elisokɔkɔl’iyo, ango ndoeta likaɔ elioengana, ko la lisangi eliau angɛnɛ;

⁴la iyo basolɔmbɔkɔlɔ’mi la bofiili mbo yɔlɛsɛk’iyo bootaota wowatema la ebatokusola lifaefi liosunga bato ba Etanda ebale la beeno.

⁵Batikusole ko yao ebienyel’iso kongo, kangä eyoeta eoka basotafa Mungu betema yau amamwito la losamɔ end’iso kwa asosanga Mungu angɛnɛ;

⁶ongoma tosofela Tito mbo asileke ndosɔnjaka lifaefi lianu lia booto eoka inde nd’asoakola ndosɔnja liao.

⁷Kongo ko kwa asɔɔlwa ino nda njasɔ bitotina bilau, la liimeli, la linangoli, la liluwani la boliliya nda bakuwa batotina, la losamɔ loanu losamak’iso, bolau mbo ɔlwɛkɛ imɔ nda likuwa-li lia bootaota lisanga.

⁸Ongoma itit’ino ekela, mba, kongo ko, eoka ya boliliya wa bato basi isolɛmbɛ ndotamba basi mbo losamɔ loanu lole nde wewe.

⁹Eoka oluwi nde booto wa Ngɛnɛ wasu ako Yesu Masiya, mbo kwa ayalak’Inde la lifoka lioeta fafo, Inde lokinjwa mbuwa eoka yasu, mbo ino angɛnɛ boyalakeke bafoka ko la mbuwa yande.

¹⁰Isoluwes’ino kwa asoenyela’mi mbo loengani nde lanu ndosilesa loasɔ-lo elosokel’ino la elososang’imɔ ino nda mwaka wa oso.

¹¹Ongoma to, kwani ɔlɔlɔkɔ ndokelaka ongoma kwa asosang’ino la bofiili ko la yeka ebisosɛl’ino.

¹²Eoka boto esanga loasɔ la bofiili, ambo lole ko la yeka ebisosɛl’inde, inga ko la yao ebitisɛl’inde.

¹³Inga to mbo basi basungomoko ko l’eoka ya bifembi yanu, kangä ko la bɔfɔnɔ wa likelemba eliengani,

¹⁴liko mbo nda mbile-ye kwani, lilya lianu litosilesa boeno wau, limɔ lilya liau litosilesa boeno wanu, ongoma to likelemba litoengana,

¹⁵kwa asɔnɔmɔkɔ nda Lokasa loa Mungu mbo— Oyatwaka eula efi, angoyala la lilya; la oyatwaka ko sinyo, angoomelo.

¹⁶Kelekele to ende Mungu oyasofa imɔ ko Tito boliliya-bo wosungak’ino,

¹⁷mbo inde asokulya lioi liami la limɛngɔ, nde inde angɛnɛ asoya end’ino la lisangi liande angɛnɛ.

¹⁸Tosotoma oto wasi amamwito lande, ako etungani ena oyasoinelomo mbo Bonangoli bolau wa Mboli Ilau nda bitanda bitotina;

¹⁹la oyasokulyomo imɔ la bitanda mbo akɛsɛnɛkɛ lasu nda kɛndɔ yasu nda likaeli lia lifaefi lia booto, eoka ya loinelo loa Ngɛnɛ wasu la ndoendesa imɔ likuwa liasu,

²⁰eoka mbo boto ataf’iso liɛngɔ loasɔ loa lifaefi lia bofäfü elitokael’iso,

²¹eoka tosotakela bolenda loasɔ loa lokuku lolau loasu nda baiso ba Ngɛnɛ l’eba bato lisanga.

²²Tosotoma imɔ etungani yasu amamwito lau eoka tosokɔtɔl’inde mbile wike la tosɔɛn’inde boto wa boliliya finɛ nda njasɔ wike la kwani imɔ boliliya wande bosoetaka eoka ya lilendelu liande loasɔ loanu.

²³Bofela loasɔ loa Tito, ale ko bosungi la bokuwani lami okuwel’ino; bofela loasɔ loa bitungani yasu ebimɔi, bende ebasotomomo la wɛndi wa Bitanda la liomala lia Masiya.

²⁴Ɛnɛsɛkɛ to iyo, nda baiso ba eba bitanda, mbo losamɔ loanu lole wewe la mbo liineli liasu loasɔ loanu ende ebato-ba lile wewe imɔ.