Read lokele Baefeso 1 Bible Online

Baefeso 1 - lokele bible

Baefeso 1

¹Imi Paulo, Botomomu wa Masiya Yesu ko la lisangi lia Mungu, ende ebüchomu ebale nda Efeso la ende ebasokokomɛlɛ ndoimela Masiya Yesu,

²booto end’ino la lilatemi lia Mungu Sango wasu la elia Ngɛnɛ wasu ako Yesu Masiya.

³Mungu la Sango wa Ngɛnɛ wasu ako Yesu Masiya, ainelomoko la loomalo, ako Inde oyasofotes’iso la loomalo lototina la bafaefi ba bolimo oyale nda Use, ko l’eoka ya Masiya,

⁴imɔ kwa aaka Inde iso ko l’eoka ya Masiya oso wa bakɔkɔmɛlɛɛlɔ ba wenda bototina, mbo iso toyaleke ebüchomu l’ebatiɛnɛlɛ la batwanelo nda baiso bande.

⁵Ko la losamɔ, Mungu nd’asangaka ko kwala ndotang’iso bana bande angɛnɛ ko l’eoka ya Yesu Masiya;

⁶ko l’eoka ya loomalo loa lisangi liande mbo booto wande wa likama ewafaefak’Inde iso lifaefela eoka ya Inde Oyasamomu la lɔkɛmɔ;

⁷la ko la liwatemi lande tosoendolomo eoka ya bakila bande, tosomɛsɛlɔmɔ batwanelo basu kwa engani nde la lilya lia booto wande,

⁸ebosowɛl’Inde end’iso.

⁹Asoluwes’iso lisangi liande ko la wɛlï la liluwani fafo liande, liko lisangi liande elisoisokoelomo iso kwa asɔɛn’Inde bolau nda kuko ya Masiya,

¹⁰liko likɔmɔnyi lia wenda bototina eyakenganeke lisho, mbo bitotina ebile nda Use, la ono se biwatemeke ndolitesa Ɔmwito kongo ako Masiya.

¹¹Ko l’eoka yande tosoɔla imɔ likaɔ ko lande oyasosɛl’iso kwala, kwa asangak’Inde oyatokomya bitotina ko la lisangi liande angɛnɛ,

¹²litina mbo toomaleseke tala yande, iso ebalendeloko Masiya oso.

¹³Ino imɔ ebasowatema la Masiya, ebasoka inango shande sha wewe, siko Mboli Ilau ya liuwesi lianu, ino osolendelo ko Inde la watomoko chapa yande eko Bolimo Botanu ewatikomoko ino lisakä.

¹⁴Bolimo ale tukä ya loendolomo loasu, tukä eyefomu iso konda eyekaɔlɛk’iso loao wewe, mbo tala ya lina liande einelomoko.

¹⁵Eokao, imi angɛnɛ to oyasoka mboli ya lilendelu lianu ndolendelo Ngɛnɛ Yesu la losamɔ loanu ndosamaka ebüchomu batotina,

¹⁶itimache ndofaka Mungu kelekele eoka yanu la ndosingwaka baina banu nda basomboli bami,

¹⁷mbo Mungu wa Ngɛnɛ wasu ako Yesu Masiya, Sango wa tala, afek’ino bolimo wa wɛlï la ewoisola litina lia njasɔ yande;

¹⁸la imɔ ko mbo aaneseke baiso ba betema yanu swaa mbo ino oluweke kwa ayali iɛli esiafomoko ino ani atomoko ino lioi la kwa ayali imɔ lilya lia tala-ye eyesosangol’ino ebüchelomu Masiya,

¹⁹la mbo oluweke likama lia bofoka wande ewoeta ebole lasu ebasoimel’Inde, bofoka ona ebole la isosha la itinjo shofumbes’iso;

²⁰bofoka-bo wande ewayalaka lande ani atɛmɔlɔkɔ Masiya nda liwa, l’ani ayalesak’Inde se nda osamba wande wa olome nda Use,

²¹omao likolo lia kanda bitotina ya likomyi la isosha la bofoka la likakalesi la likolo lia baina batotina ebatosingwakomo, inga to nda mbile-ye kongo, kangä imɔ nda mbile eyekayeke.

²²Ongoma Mungu asɛlɛkɛ yaatotina ose ya batindi bande la afak’Inde isosha shoyala Botö wa njasɔ bitotina ya Etanda;

²³Etanda yende Bindo yande, yende lɔɔlwɔ loande oyatɔɔlɔlɔ yaatotina hɔlɔɔ.