Read lokele Baefeso 2 Bible Online

Baefeso 2 - lokele bible

Baefeso 2

¹La ino imɔ osofomo liwawi liyai, ino ebawaka oso nda batwanelo la nda batongwi banu,

²ani akɛndɛkɛndɛk’ino ndotutaka Bɔkɔta wa isosha sha bofolalu, Bolimo Obe oyatofumbaka ko kwani sisi ya bana ba totefola.

³La iso batotina imɔ twakɛndɛkɛ sisi ya bato ba bɔfɔnɔ-bo nda yɛmɛ ya bindo la twalitesaka ko yao eyalɛmbɛkɛ bindo la baenyeli angɛnɛ, la ongoma twayalaka balomboki ebenganaka la efango ya Mungu kwa ebamɔi batotina.

⁴Nde Mungu ko l’eoka ya booto wike ebosofota lande la eoka ya losamɔ lofi elososamak’Inde osam’iso,

⁵eyayaelak’iso ko belyo nda batongwi basu, Inde lof’iso liwawi liyai ko la Masiya angɛnɛ, (osouwesomo ngo ko la booto)

⁶la atɛmɔlɔkɔ iso la asoyales’iso se nda Use amamwito lande ko la liwatemi la Masiya Yesu,

⁷Mungu lokela ongoma mbo, nda mbile ebilayeke, lilya lia likama lia booto wande liɛnɛkɛlɛkɛ fololo, boko booto wande end’iso ebawatemi la Masiya Yesu.

⁸Eoka osouwesomo ngo ko la booto ko l’eoka ya lilendelu la liuwesi-li liti l’eoka yanu, lile ngo ko lifaefi lia Mungu angɛnɛ;

⁹inga l’eoka ya yao ebisokelak’ino, mbo boto angɔmɔi atafaala l’iomala.

¹⁰Eoka iso twende likeli liande, iso ebasotonjomo liasi ani asowatema iso la Masiya Yesu mbo tokelakeke ko yao ebisotatonja Mungu oso mbo tokɛndɛlɛkɛ ngo ko ndayao.

¹¹Eokao enyelaka to mbo ino ebayalaka koso ba tukela ya wenda-bo, nda loasɔ loa lokomba ebatangomu nde mbo Eba sunga ko la bato ebatangomu Eba totombe, loasɔ loa lokomba ko la besamba ya bato,

¹²enyelaka to mbo nda mbile ena wasiamaka la Masiya, otiayalaka eba tukela ya Isalaele la bɛɛnda nda loasɔ loa ngɛla ya basakä ba Mungu, l’angwɛnɛ iɛli sha liuwesi, angwɛnɛ Mungu nda wenda-bo.

¹³Nde kwani ko l’eoka ya Masiya Yesu, ino ebasiamaka esika, ososishanesomo tinatina ko la bakila ba Masiya.

¹⁴Eoka Inde angɛnɛ ende lilatemi liasu, asosanganes’iso ba tukela imbale ko bofindi ɔmwito la asowɛlɛ likula elisosɛnyanes’iso se,

¹⁵ani ko nda bindo yande angɛnɛ asoola liiyani liko Bikela ya ndola la bakakanelo, ko la litina mbo akindoleke yaambale ko boto ɔmwito oyai; ongoma to lilatemi;

¹⁶la mbo aotwaneseke yaambale nda bindo ɛmwito ende Mungu ko la liwa liande nda lieka, ongoma asotungesa liiyani ko la liao.

¹⁷Limɔ Inde loya oyanangoel’ino Mboli Ilau ya liɔngɛsi lia njasɔ yanu, bako ino ebasiyamaka esika, la end’iso imɔ ebayalaka tina la Mungu;

¹⁸eoka ko lande ako Masiya, iso lanu yaambale tosɔɔlɔ isosha shɔɔtɔ ende Mungu Sango ko la Bolimo Ɔmwito.

¹⁹Eokao, ino ot’imɔ bɛɛnda la ebasolimela nda yese yasi, nde osoya oko toote twa yese ya ebüchomu ba Mungu l’eba bɔkɔ̈kɔ wande angɛnɛ.

²⁰Ino ososwomo nda lionda lia Batomomu la Batɔndɔli, ani Masiya Yesu angɛnɛ ale litalɛ lia ikululu sha ndakɔ etotina;

²¹ndakɔ etotina esoundakana ndokɔkɔmɔ ko lande ako Yesu la etokondakana ko ndoiyela esemoelo eyüchomu ende Ngɛnɛ.

²²Ongoma, ino imɔ ososwomo amamwito ndoyala eyaelo ya Mungu ko la Bolimo wande.