Read lokele Baefeso 5 Bible Online

Baefeso 5 - lokele bible

Baefeso 5

¹Eokao, kwekelaka Mungu ani atokelak’Inde kwa bana bande ebasamomu.

²Kɛndɛkɛndɛkɛ la boyaeli wa losamɔ, kwa Masiya asamak’imo ko iso la afaefaka liwawi liande angɛnɛ eoka yasu, lifaefi la litambi ende Mungu, eliaka la liɛsɛ lilau.

³Nde njasɔ-bi biko bolëfë la bɔwɛwɛ bototina ango bolole, bitiengnae ango ndosingwomo lanu ebüchomu la Masiya;

⁴la boendu la baoi ba sɔni la këka imɔ ebitiengane lanu, kangä liineli lia kelekele.

⁵Luwaka to la wɛlï mbo, boto wa bolëfë, wa bɔwɛwɛ, kwa ewa bolole, oyale kwa bosemoli wa bɛfɔnɔ ya mungu, ati ango la botiko nda Bɔkɔta wa Masiya la ewa Mungu.

⁶Boto angɔmɔi ataimbak’ino la baoi ebati la litina, eoka efango ya Mungu esoyela bana ba totefola ko loasɔ loa e-njasɔ-bi.

⁷Eokao oyalanëke lau basaɔ;

⁸wayalaka nde oso ko lilima, kongo ko kwani wende löwa ani awatemani ino la Ngɛnɛ. Kɛndɛnɛkɛ to la boyaeli wa bana ba löwa,

⁹Eoka tuma etosokonda nda löwa tole njasɔ bitotina ebile bilau, ebile la liengani, ebile wewe.

¹⁰Kotaka ndoluwa ko njasɔ ebitoomalesa Ngɛnɛ,

¹¹okɛsɛnɛ̈kɛ la bekeeli ya lilima ebitiɔlɛs’ino bolau, kanga kotombola yao.

¹²Eoka sɔni finɛ ango ndoongana njasɔ ebitokel’iyo la wisakumbo.

¹³Nde asoisolomo bitotina-bi ko la löwa, limɔ bisoɛnɛlɛ fololo, eoka bitotina ebisoɛnɛlɛ fololo bile lowa.

¹⁴Eokao, kwa asoonga bɔɛlɛ mbo— Siswa, aɛ oyaingali, Kuswaka nda liwa, oyasowa; Limɔ Masiya nd’atoanes’aɛ kwa löwa!

¹⁵Tichakaka to la wɛlï ani atokɛnd’ino, inga kwa bibebe, kangä kwa eba wɛlï;

¹⁶wetesëke fofe ya liuwesi eoka mbile-ye bile ibe.

¹⁷Eokao oyalëke bato ebatienyele njasɔ la wɛlï, kangä koluwa kwa ayali lisangi lia Ngɛnɛ.

¹⁸Owëke bänä, eoka bao bende la libebesi, nde tumesomoko la Bolimo.

¹⁹Twelanaka bɛɛlɛ la ngambi la yulwelo ya Bolimo, mbo lielo la tongolole twa bɛɛlɛ ya betema yanu biiyeke ko ende Ngɛnɛ wasu,

²⁰la kelekele mbile la mbile eoka ya yeka bitotina ende Mungu Sango, ko la lina lia Ngɛnɛ wasu ako Yesu Masiya.

²¹Litesanaka eoka ya liwangi liowanga Masiya.

²²Ino bali, litesaka balome banu angɛnɛ kwa atolitesomo Ngɛnɛ,

²³eoka bolome ende botö wa wali wande, kwa ayali Masiya imɔ Boto wa Etanda la Bouwesi wa bindo eko Etanda.

²⁴Kwa ani atolitesa Etanda olitesa Masiya, ko ongoma bali baliteseke balome bau nda njasɔ bitotina.

²⁵Ino batolome, samaka bali banu kwa asamaka Masiya osama Etanda la afaka liwawi liande eoka ya Etanda,

²⁶mbo ücheke yao ko la litanesi lia lilufi ïia bali la lioi lia tele,

²⁷la mbo atambeke Etanda kwa wali, la tala l’angwɛnɛ liälö, l’angwɛnɛ basushɛlɛ, l’angwɛnɛ loasɔ loasi lobe, sakolo ngo ko mbo ayaleke wüchomu la angwɛnɛ litwanelo.

²⁸Ongoma loengani mbo batolome basameke bali bau kwa bindo yau angɛnɛ. Oyasosama wali wande, asosama imɔ ko inde angɛnɛ.

²⁹Boto aitoiyela bindo yande angɛnɛ, nde atoongola yao la atotɛmya yao, kwa atokelaka Masiya loasɔ loa Etanda,

³⁰eoka tole bilengo ya Bindo yande.

³¹Eoka ya litina-li, boto atomacha sango la nyango wande la atowatema la wali wande limɔ iyo yaambale batoyala ko bindo ɛmwito.

³²Loasɔ-lo eloisameli litina, lole lofi; nde imi nd’atangi mbo lole loa Etanda la eloa Masiya;

³³kongo ko ino imɔ, oto la oto, asameke wali wande kwa inde angɛnɛ, la wali mbo aliteseke bolome wande.