Read lokele 1 Batesalonika 5 Bible Online

1 Batesalonika 5 - lokele bible

1 Batesalonika 5

¹Nde nda loasɔ loa mbile la basho, Bitungani yami, oti la boeno wosɔnɛlɔmɔkɔ lokasa,

²eoka ino nd’aluwi la wɛlï mbo Lise lia Ngɛnɛ liyaka nde kwa atoya wiya la ocho.

³Akaongek’iyo mbo— Lilatemi kwani, tosotekama! kwaamao lisɛɛsɛli litoomanel’iyo futuku kwa atoyaka toelo ende botomali oyatoli lieme, angokwel’imɔ botili.

⁴Kongo ko, Bitungani, ino otiyale nda lilima, mbo lise lina koomanel’ino futuku kwa wiya,

⁵eoka ino yaatotina wende bana ba liangangi la bana ba löwa; toti bato ba ocho angoko eba lilima,

⁶Eokao to toingalëke tɔlɔ kwa atoingala bato basi, nde toyaleke la botengu, angomwa bänä;

⁷eoka ebatoingala tɔlɔ batoingakala tɔlɔ ko la ocho, la ebatowa bänä, batowa bao imɔ ko la ocho.

⁸Kongo ko asoyalak’iso bana ba löwa, totinganeke la boyaeli wasu la wɛlï, towateke botaka wa lilendelu la losamɔ la kɔmɔ ya yeto eko iɛli sha liuwesi.

⁹Eoka Mungu atiukames’iso ndowa efango, kangä ndɔɔlɔ liuwesi ko la Ngɛnɛ wasu ako Yesu Masiya,

¹⁰oyawelak’iso, litina mbo, ango toyala la botengu, ango toingala tɔlɔ, ani toyaleke ngo ko la liwawi amamwito lande.

¹¹Eokao latemesaka betema, la kɔkɔmɛlɛkɛ boto la boto, kwa atokelaka nd’ino kwani.

¹²Tosoomb’ino liasi, Bitungani, mbo oluwaneke lau ebatokuwel’ino la bonui l’ebale Betoli oso wanu nda njasɔ ya Ngɛnɛ, ebatoimak’ino.

¹³Tɛmiak’iyo la losamɔ finɛ eoka ya likuwa liau. Yalakanaka la lilatemi.

¹⁴Tosolɔmbɔkɔl’ino, Bitungani, mbo— Imaka eba booshaosha, fumbesaka bilɛɛlɛ ya bato, tinganaka l’eba bɔlɛmbu, owëke esole loasɔ loa boto angɔmɔi.

¹⁵Lambaka mbo otakundanëke bobe ko la bosakane ende boto angɔmɔi; nde lise la lise engaka fofe yokelakane bolau la ende bato batotina lisanga.

¹⁶Okaka limɛngɔ lise la lise;

¹⁷omachëke ndosombokola,

¹⁸faekefaka Mungu kelekele nda beyaeli bitotina, eoka lisangi lia Mungu elisoyel’iso ko la Yesu Masiya lile ngo ko ongoma.

¹⁹Otungesëke Bolimo;

²⁰osɛɔlɛ̈kɛ litɔndɔli.

²¹Kongo ko kɔtɔlɔkɔ bitotina mbo olembeeleke la oundeke ko yao ebile bilau,

²²la kilaka bobe wa kanda bitotina.

²³Mungu wa lilatemi, Inde angɛnɛ aukamesek’ino hukaa, la belimo la betema la bindo yanu bitekakemeke teka, angwɛnɛ ango litwanelo, nda bayelo ba Ngɛnɛ wasu ako Yesu Masiya!

²⁴Inde oyasot’ino lioi ende wolendelomu, la Inde nd’atokɔcha liao.

²⁵Bitungani, sombokoelak’iso;

²⁶lamokolaka bitungani bitotina y’Etanda la tɔchou etüchomu.

²⁷Isotel’ino ekano ko la lina lia Ngɛnɛ mbo e-lokasa-lo lotangomoko ende bitungani bitotina y’Etanda.

²⁸Booto wa Ngɛnɛ wasu Yesu Masiya boyalakeke lanu.