Read lokele 2 Batesalonika 2 Bible Online

2 Batesalonika 2 - lokele bible

2 Batesalonika 2

¹Bitungani, nda loasɔ loa bayelo ba Ngɛnɛ wasu ako Yesu Masiya la lɔsɔngɔmɔ loasu lotowana lande, tosoomb’ino

²mbo botaeyaeya futuku nda baenyeli banu, la mbo otasisimwa ango loasɔ loa bolimo, ango ko lioi ango ko lokasa eloongomu mbo losekwi nde ende’mi mbo Lise lia Ngɛnɛ lisoya kwani.

³Boto angɔmɔi atalimbëk’ino la mboka ango ɛmɔi, eoka lise lina angotaya kɔni, sakolo ngo ko inanesa sifi siya oso la Ewa litefoli koyaɛnɛsɔmɔkɔ oso, ako wana wa lɔsɛɛsɛlɔ,

⁴oyatotefwesa la oyatoomala l’ifala mbo asolonga oyasotangomo Mungu la bitotina ebisosemolomo la bato, kwa mbo ayali nde nda këka ya eyaelo ya Mungu angɛnɛ l’ani atotaka boeki mbo ale ko Mungu.

⁵¿Otienyel’imɔ mbo yakambesak’ino njasɔ-bi ani ayalaka’mi oko lanu?

⁶La kwani oluwi nde bofoka ebokokufesel’inde mbo aiselomoko nda lisho elitinyomu inde.

⁷Nde litefoli elisoisama likokelaka likuwa liande kwani, ko ɔmɔi nd’atokufekesa liao kond’atosekwa liao sisi yasu.

⁸Lamao to Ewa litefoli atoisolomo fololo la Ngɛnɛ Yesu eolak’inde ko la luli lia bɔnɔkɔ wande la esɛɛsɛlɛk’inde ko la liameli lia bayelo bande.

⁹Bayelo bande bale ko l’eoka ya bekeeli ya Satana ko la bofoka la ndembe ya bisisho ya bolimbakeli,

¹⁰la bɔlɔwanɛ bototina bobe wolimbaka ebatosɛɛsɛlɛsɔmɔ, eoka batiakuliaka losamɔ loa njasɔ ya wewe nda betema mbo buwesomoko.

¹¹Eokao to, Mungu asotomel’iyo botwanelesi wa bofoka oyatolimbak’iyo mbo bimeleke ko lolanga lona,

¹²mbo batotina ebatiaimelaka njasɔ ya wewe l’ebasoomala la linɛngina lia njasɔ ebitiengane, iyo ana bafomoko se.

¹³Nde lole loasu ndofaekefa Mungu kelekele eoka yanu mbile bitoti, ino Bitungani ebasamomu la Ngɛnɛ wasu, eoka mbo Mungu nd’aak’ino nda liako mbo uwesomoko ko la loukameso loa Bolimo la lilendelu lia njasɔ ya wewe.

¹⁴La Mungu asot’ino lioi ko la Mboli Ilau ebisonangoel’iso end’ino, mbo ino ɔɔlɛkɛ tala ebiomani la Ngɛnɛ wasu ako Yesu Masiya.

¹⁵Eokao, Bitungani, kɔkɔmɛlɛkɛ la undaka ko ngwi liekesi eliaɔlɔk’ino end’iso ango ko la lioi lia bɔnɔkɔ, ango ko la lokasa loasu.

¹⁶Nde Ngɛnɛ wasu angɛnɛ ako Yesu Masiya, la Mungu Sango wasu, oyasamak’iso la oyafak’iso liɔnjɔnji elitilasilek’imɔ la iɛli silau ko la booto wande,

¹⁷afumbeseke betema yanu ndokɔkɔmɛsɛ yao nda bekeeli bitotina bilau la nda baoi batotina balau.