Read lokele 2 Batesalonika 3 Bible Online

2 Batesalonika 3 - lokele bible

2 Batesalonika 3

¹Tuu ya loasɔ, Bitungani, sombokoelak’iso mbo wɛndi wa Ngɛnɛ wendeseke la botaliomoko tala, kwa asokelaka wao sisi yanu,

²la mbo tɔɔnɔkɔlɔmɔkɔ nda besamba ya bato babe ebatiengane, eoka bati to batotina nd’ayali la lilendelu.

³Kongo ko Ngɛnɛ wasu nd’ayali wolendelomo la Inde atokɔkɔmɛs’ino kɔkɛ la atotingana lanu mbo Ewa obe atakwes’ino.

⁴Tosolendelo imɔ Ngɛnɛ loasɔ loanu mbo bokokela la bokelak’imo ko njasɔ bina ebisot’iso otel’ino ekela.

⁵Ngɛnɛ wasu alongameseke to betema yanu fii nda mboka ya losamɔ loa Mungu la nda likɔkɔmɛlɛ lia Masiya.

⁶Tosotel’ino ndola, Bitungani, ko la lina lia Ngɛnɛ wasu ako Yesu Masiya, mbo ɔsɛnyanɛkɛ l’ebaitokɛsɛnɛ l’ebamɔi nda likuwa la ebaitolitesa liekesi elisɔɔl’ino end’iso.

⁷Eoka ino angɛnɛ nd’aluwi mbo lole loanu ndotutel’iso; mbo ayalak’iso omolo eyanu, totiakɛndɛkɛndɛkɛ wawa,

⁸la totialaka bieka ya boto sakolo ko ndokamb’inde, kongo ko twakelaka likuwa lia bonui la likati, la ocho la löwa, litina mbo totayala la bolito end’ino ango ɔmɔi.

⁹Eti to mbo toti l’isosha ongoma, kangä to mbo boyaeli wasu angɛnɛ bofek’ino etichelo mbo otutelek’iso.

¹⁰Eoka eyayalak’iso lanu, twatelak’ino ekela mbo— Boto atikulye ndokela likuwa, alëke bieka!

¹¹Tosokaka to mbo bamɔi banu baitokɛsɛnɛ l’ebamɔi nda likuwa, baitokelaka likuwa, batoetaeta okela ko likeëlä.

¹²Tosota to bɔfɔnɔ-bo wa bato ndola la tosolɔmbɔkɔl’iyo la lina lia Ngɛnɛ wasu ako Yesu Masiya mbo bakeleke likuwa liau ko la hai la wɛlï, mbo baleke eyau angɛnɛ bieka.

¹³Kongo ko, Bitungani, otɛkwɛ̈kɛ ndokelaka bolau.

¹⁴Nde, boto atilitese lioi elisɔni nd’iso nda lokasa-lo, luwaka boto ona ko la ndembe, angoyalana lande imɔ lisaɔ mbo boto ona okeke sɔni

¹⁵nde otangëk’inde mbo wiyani, kangä koimak’inde kwa etungani yanu.

¹⁶Inde angɛnɛ ako Ngɛnɛ wa lilatemi afaefek’ino lilatemi mbile bitoti la nda beyaeli bitotina; Ngɛnɛ wasu ayaleke lanu yaatotina!

¹⁷Liseeli-li ko l’ewami bosamba ako Paulo; lile to ndembe yolembeela kasa bitotina yami, itosonoko ngo ko anyo.

¹⁸Booto wa Ngɛnɛ wasu Yesu Masiya boyalakeke lanu yaatotina!