Read lokele 1 Timoteo 6 Bible Online

1 Timoteo 6 - lokele bible

1 Timoteo 6

¹Bato ebaundakomu bɛkɔwa bafaefeke bangɛnɛ bau lilitesi kwa aondu lau, mbo lina lia Mungu la liekesi lia njasɔ yande litamɔlɔkɔmɔ.

²Ango ebale la bangɛnɛ ebayali b’Etanda baolyëke bangɛnɛ bau eoka mbo bende beoto b’Etanda; kongo ko bakuwekelek’iyo la lilitesi lioeta eoka ebatokuwelomo la wɛlï bende b’Etanda la ebasamomu lau. Ekesaka la fumbesaka ongoma.

³Eya to mbo boto ekekesa la bɔfɔnɔ wasi la atikulye baölo-ba balau ba Ngɛnɛ wasu Yesu Masiya la liekesi lilau lia Mungu,

⁴ambo ona asotuta la bɔmɛtɔ ani wewe atiluwe yeka, ale ko la loo nda botema elotofɔɔlɔ tofenya la liwesani eoka ya baoi, elitokusola imɔ luno la bosho la litɔngi lia bato basi la toloi tobe,

⁵bato ana batowalakana eoka betema yau bitiluw’imɔ wewe la batangi nde mbo lisemoli lia Mungu lile ko fofe yɔɔlɔ yeka.

⁶Eingo, liende la fofe yɔɔlɔ yeka ya likama bu ko la liɔngɛsu lia yɛmɛ;

⁷eoka totiaeshaka yeka angɔmɔi lasu nda wenda-bo la totikɔkɔlɛ ndosokwa la yeka,

⁸kongo ko toyala la yeka yola la eyowataka, ambo toaeseke betema se la yao.

⁹Nde ebasosanga ndofota la bieto, basokwa nda lisoshela la ilonga sha yɛmɛ ibe ebitoiyesa bato nda liöma la losɛɛsɛlɔ.

¹⁰Eoka yɛmɛ ya bieto wike ele litina lia njasɔ ibe wike; la eoka mbo bamɔi basoongwamela yao, basolota mboka ya lilendelu la basotwɛlɛkɛ betema yau angɛnɛ la saka ya tɔkɛnɛnɛ.

¹¹Nde aɛ angɛnɛ, Boto wa Mungu, engwaka njasɔ bitotina bina la botili; engelaka nde ko liengani, la lilitesi lia Mungu, lilendelu la losamɔ, la likɔkɔmɛlɛ la botema sambo.

¹²Fumbaka nda liangɔ lilau lia lilendelu; kusamelaka loiko loa layalaya elosotomelomo aɛ lioi la eloaolelak’aɛ nda baiso ba batangeli wike.

¹³Isotel’aɛ likakanelo-li oso wa baiso ba Mungu oyasosɛlɛkɛ batotina la liwawi, la oso wa baiso ba Masiya Yesu oyaaolelaka la lisanoli lilau ende Pontio Pilato,

¹⁴mbo ɔkɔchɛkɛ ekela ena l’angwɛnɛ ango litongwi konda liɛnɛlɛ lia Ngɛnɛ wasu Yesu Masiya;

¹⁵lilaɛnɛsɔmɔkɔ nda lisho liande angɛnɛ ako Inde oyale Bokakalesi wa lokemo, Ngɛnɛ ko Ɔmwito, Bɔkɔta wa bɛkɔta la Ngɛnɛ wa bangɛnɛ.

¹⁶Inde angɛnɛ kongo nd’ayali la loiko elotilawek’imɔ la oyayali nda liangangi eliti liowana la boto, Oyatiɛnɔmɔ la boto, atikɔkɔlɛ ndoɛnɛ Inde. Loomalo la tososha bifomoko end’Inde ko layalaya. Ongoma.

¹⁷Imaka bafoka ba wenda wa mbile-ye mbo batafaala la bɔmɛtɔ, angokɛsɛ tɔɛli twau nda lifoka elile ngo ko wawa, kangä ende Mungu oyatofaekef’iso lifoti lia bitotina ebitoomakales’iso.

¹⁸Nde bakeleke bekeeli ya booto, bafotakeke ko la bakuwa balau la basukaneke la basi basaɔ la bakaeleke bakaɔ;

¹⁹la ongoma batosɔnjɛlɛ bondanda wau bolau eoka ya mbile ebilayeke, mbo baɔlɛkɛ loiko loa wewe.

²⁰Ee Timoteo, tinganaka la loao elosotikomo laɛ! Taka bɔkɔngɔ nda beongaonga la tofenya ebile ko wawa, ebitotangomo la bamɔi mbo wɛlï finɛ.

²¹Bamɔi ebasoimela wɛlï-ao basoomelo lilendelu angɛnɛ. Booto wa Mungu boyaleke laɛ.