Read lokele Baebele 2 Bible Online

Baebele 2 - lokele bible

Baebele 2

¹Eokao loengani nde lasu mbo toenyakeleke ndoenyakela ko yao ebisokak’iso, elua totacha kwa watɔ atocha mbole.

²Eoka eya mbo Lioi eliaongomoko lasu ko la bakitomo liyala nde wewe la eya nde wewe mbo njasɔ bitotina bisokuchakomo, kwa batwanelo kwa batefoli, ko la lokucho loengana,

³ani iso kokufa loao la moni, ani tosolenjalenja liuwesi lifi-li? Liuwesi-li liaongomoko la Ngɛnɛ oso la liakɔchɔmɔkɔ end’iso ko l’ebokaka Inde,

⁴la Mungu angɛnɛ lokuliana lau ko la ndembe ya bisisho la tokesa twa kanda la kanda, la bakaɔ ebasokaela Bolimo Botanu kwa asosangak’Inde.

⁵Eoka Mungu atiafaefaka bakitomo isosha shokakalesa bato ebatoyalaka nda wenda ebokayeke, ebokoongel’iso oko kwani.

⁶Nde asisa loonga nda lokasa lɔmɔi mbo— ¿Bolomboki end’iye mbo oenyakelek’inde, La wana wa oto mbo oniyek’inde sumbu?

⁷Osɔɔndɔl’inde ose ya bakitomo la mbile kɔni sumbu, Osowates’inde iyoyo sha tala la lilitesi;

⁸Ososɛlɛ bitotina kakala ose ya batindi bande. Nde asɛlɛk’Inde bitotina kakala end’inde, litina lile mbo atiamachaka angɔmɔi eyetisɛlɔmɔ kakala end’inde. Kongo ko tokɛni kɔni bitotina ndosɛlɔmɔ kakala ende bolomboki;

⁹nde tosotichak’Inde oyaɔndɔlɔmɔkɔ ose ya bakitomo ko la mbile sinyo, ako Yesu Oyasotaliomo tala la lilitesi lia yaatotina eoka ya bomusi wa liwa, mbo ko la booto wa Mungu aluweke bololo wa liwa loasɔ loa bato batotina.

¹⁰Loaenganaka to mbo Mungu, eoka bitotina lokelomo lande la ko l’eoka yande, l’ani asoesh’Inde bana wike ko nda tala, mbo aɔlɔlɛkɛ Botoli oso oyasoiyes’iyo nda liuwesi ko la bemusi finɛ.

¹¹Eoka Oyasücha bato la bato ebasüchomo, batotina bende ngo ko la Sango ɔmwito; ko la litina-li, Yesu atioke sɔni yot’iyo lina liko bitungani.

¹²Inde mbo— Itotaka boeki wa lina liaɛ ende bitungani yami Nd’atiteni ya windi w’ebasosɔngɔmɔ itoinel’Aɛ la bɔɛlɛ.

¹³La imɔ mbo— Imi nd’atolendelo Inde. La imɔ liasi, mbo— Imi-yo la bana ebasofaefa Mungu efaefa’mi.

¹⁴Ongoma, eoka ya mbo bana bende la bindo la bakila lisanga, ko ongoma asosɛlɛ imɔ ko yao, mbo ko la liwa liande, asɛɛsɛlɛk’inde oyayali la isosha sha liwa, ako Satana;

¹⁵la mbo aɔnɔkɔlɛkɛ batotina ebaindomoko bɛkɔwa ko la liwawi liau litotina nda iwaesa sha liwa.

¹⁶Wewe atiunde bakitomo bosamba ndosungak’iyo, kangä bana ba Abalayama ebasosungomo lande.

¹⁷Eokao loaenganaka lande mbo akweke la liluku lia bitungani yande, mbo ayaleke Kanga Eyeti ya booto la eyolendelomo nda likuwa lia Mungu, litina mbo amɛsɛlɛkɛ batwanelo ba bato.

¹⁸Yesu asokɔkɔlɔ ndosungaka ebasokɔtɔlɔmɔ nda lisoshela, ko l’eoka mbo Inde angɛnɛ aokesomoko bemusi la asoshelomoko oso.