Read lokele Baebele 9 Bible Online

Baebele 9 - lokele bible

Baebele 9

¹Ngɛla ya Oso yaaka nde la ndola ya lisemoli la Eüchelo nda wenda-bo.

²Eoka kumbo yakomiomoko eya lousa, la nda litenya-li liaaka la etalielo ya päka, la mɛsa olo atambomoko batuma, litenya lina liatangomoko Eüchelo ya Botanu.

³Limɔ ombisa ya esinda ya bolelo litenya liasi liatangomoko mbo Eüchelo ya Botanu Wolongela,

⁴la liayalaka la litumbe lia efechelo ya tosandu twa liɛsɛ la kwokwolo yoisa ngɛla la isako eshasɛlɛkɛ Mana la yeka-bi bisatɔ yalinjomoko la yeto ya loketi fafo; la itumbe sha Alana eshaɔ̈tɔ̈kɔ batɔmbɔ, la batalɛ ba Ngɛla loyala imɔ ko nda kwokwolo;

⁵la olikolo lia kwokwolo Bakeluba bambale ba tala loinamaka bafafu bau likolo lia Eyaelo ya Booto wa Mungu. Toti kwani la mbile yoonga loasɔ loa yeka la yeka sumbu.

⁶Limɔ atonjomoko ebitotina-bi, kanga yaɔtɔkɔkɔ nda litenya lia lousa ndokakelaka likuwa lia lisemoli;

⁷kongo ko Kanga-Eyeti kongo nd’aɔtɔkɔ nda litenya lia kuko eko Eüchelo ya Botanu Wolongela, ko liɔtɔ limwito nda mwaka la inde angɔɔtɔ sakolo ngo ko asotamba bakila eoka yande la eoka ya batwanelo ba bato.

⁸Ongoma Bolimo Botanu asoluwes’iso mbo mboka yɔɔtɔkɔ nda Eyaelo ya Botanu ɛkɛnɛli ani litenya lia oso likoyali,

⁹yao ele ko ndembe ya ikweela ende eba mbile-ye, nda loasɔ-lo bafaefi la nyama yofechomo bisotambakomo nde bitikɔkɔlɛ ndɔɔlɔlɔkɔ baenyeli ba betema ya ebatosemola Mungu.

¹⁰Nde bina bile ko l’eoka ya bieka yola la yomwa la basooli ba kanda la kanda; bile ko ndola ya bindo ebisotomo konda mbile ya lienganesi lia yao.

¹¹Nde ayaka Masiya ndoyayala Kanga-Eyeti ya ebilau ebikayeke, Inde lɔɔtɔ ko la litenya lia Eüchelo ya Botanu eyesolongela la eyesɔɔlwa, eyetikelomo la besamba la eyeti ya balomboki kongo,

¹²Inde lɔɔtɔ to nda Eüchelo ya Botanu Bolongela, inga to la bakila ba mbuli angoko ba bifembeli ya mbolo, kanga la bakila bande angɛnɛ, la ongoma Inde loosha liendolomu liasu lia layalaya.

¹³Eya to mbo bakila ba mbuli la mbolo la biuta ya mbolo itomali ebisomɛmyakomo, betanekesa ko bindo ya bato ebasokwaka bekila,

¹⁴nde simbi to bakila ba Masiya kotanekesa baenyelo ba betema yanu ebisoowana la bekeeli ya liwa mbo bokuweleke Mungu wa Loiko. Ko la Bolimo wa layalaya Inde angɛnɛ lotamba Mungu botema wande ebotiaaka la loasɔ ango lɔmɔi.

¹⁵Masiya ale to Bokumi wa Ngɛla Eyai ko la litina-li, mbo ebasotomo lioi baɔlɛkɛ botiko wa layalaya ewatikelomoko iyo lisakä, eoka liwa lina lisoesha liendolomu lia batɔngwi nda ngɛla ya oso.

¹⁶Nda loasɔ loa lokasa loa botiko, loti ango l’isosha sakolo ko liwa lia ngɛnɛ wa loao lisotaluwana la wewe.

¹⁷Botiko bososangolomo ko la liwa lia ngɛnɛ wa wao, boitosangolomo ani ngɛnɛ akoyali la liwawi.

¹⁸Ko ano to Ngɛla ya oso etiatinyomoko sakolo ngo ko la bakila;

¹⁹eoka asilaka Mose ndokambesa bato batotina ndola bitotina ya Bikela, inde lɔɔsɔ bakila ba bifembeli ya mbolo l’eba mbuli amamwito la balia la fuu ya bɛkɔkɔ ebisotomo langi bitelu la bafifa, inde lomɛmyaka bao nda Lokasa loa ngɛla la ende bato batotina,

²⁰inde loonga mbo— Eba bende bakila ba ngɛla eyateelaka Mungu ino.

²¹Limɔ inde lomɛmyaka bakila ko ongoma nda Kumbo eyüchomu la nda biengo bitotina yosemoela Mungu.

²²Ko la likomyi lia Bikela, tina la biengo bitotina bisosaesomo ko la bakila, etiye to la lisɛndwi lia bakila, ani angwɛnɛ limɛsɛli.

²³Eokao loaenganaka mbo tokweelo twa tutakela ya yeka ya Use bitanesomoko ko la yeka-bi nde yeka angɛnɛ ya Use kotanesomo ko la batambi bolongela bina.

²⁴Eoka Masiya atiɔtɛkɛ nda Eüchelo ya Botanu eyaswomoko ko la besamba ya bato, eyele ko ikweela sha eya wewe, nde Inde lɔɔtɔ nda Use angɛnɛ okɛnɛlɛ omao oso wa baiso ba Mungu eoka yasu.

²⁵Atiaɔtɔkɔ ko ndotambak’Inde angɛnɛ batamba wike kwa aɔtɔkɔkɔ Kanga-Eyeti mwaka la mwaka la bakila ebatiaaka ebande angɛnɛ;

²⁶ani awaka to tokange bawa wike konda bakeelo ba wenda konda eweuse. Nde kwani asɔɛnɛlɛ ko liɛnɛlɛ limwitoto nda basilelo ba mbile mbo asɛɛsɛlɛsɛkɛ batwanelo fɛɛ ko la litambi lia botema wande angɛnɛ.

²⁷Balomboki baondu nde ndowa liwa limwito, la mbisa yaamao oko liati lia njasɔ kongo;

²⁸ko ongoma asotambomo Masiya lotambo ko lɔmɔi mbo atoleke batwanelo ba bato wike, limɔ elaɛnɛlɛkɛ liasi ende ebatolombakel’Inde, inga imɔ la batwanelo, kangä loasɔ loa liuwesi liau.