Read lokele Yakobo 3 Bible Online

Yakobo 3 - lokele bible

Yakobo 3

¹Bitungani yami, bato wike banu batayalaka baekesi, eoka kwa aluw’ino mbo iso baekesi totoatelomo njasɔ la likomyi lioeta elia basi l’owau.

²Eoka iso batotina totokwaka batwanelo wike, la boto oyatikwe litwanelo nda lioi liande, ambo ende elalaka wewe oyatokɔkɔlɔ ndoaesa lolamɛ se la bindo bitoti imɔ.

³Totaka biwachelo nda bɛnɔkɔ ya funda mbo balitesek’iso, limɔ totokɛndɛkɛsɛl’iyo bindo bitotina.

⁴Tɛnɛk’imɔ ko bitumbe ya lofofo; ango biyali bifi fafo, la bitotinjakomo la fomba ya bolengi finɛ, nde bitowachelomo ko la kai ɛkɛkɛ kongo olo atosanga oyayali nda wendo.

⁵Lolamɛ ko ongoma, lole elëngö ɛkɛkɛ ya bindo, kongo ko lotofɔlɔ loasɔ loa likama. Tɛnɛ, lokëke loa liäla, ambo lɔkɛkɛ, lotofechaka ngonda efi fafo.

⁶Lolamɛ lole bösä, la atiteni ya bilëngö ya bindo yasu lotobebesa betema la likama lia bobe ebototumesa bindo; lolamɛ lotoanesa lotunyo loa liwawi-li, la loao angɛnɛ lotoana la bösä wa Ngehena.

⁷Eoka kanda bitotina ya nyama, la nɔli, la tolandalanda nda nyɛlɛ, la nyama bitotina ya balia bitokakalesomo la bisosila ndokakalesomo kakala ko la balomboki,

⁸nde angwɛnɛ bolomboki wokɔkɔlɔ ndokakalesa lolamɛ. Loao loende bobe eboti bokomyomo, losotuma la lisäkä lia liwa.

⁹Totoinela Ngɛnɛ Mungu ako Sango ko la lolamɛ, la loao imɔ totomɔlɔkɔ bato ebasokelomo la liluku lia Mungu.

¹⁰Liineli la limɔli nd’atokuswaka ko nda bɔnɔkɔ ɔmɔi. Bitungani yami, lotiengane mbo loyaleke ongoma.

¹¹¿Mbo isolo sitokusola balia ba lɔɛtɛ l’eba likase ko la liöndo limwito?

¹²¿Mbo bosau kokɔkɔlɔ ndoota mbila, Bitungani yami, kwa mbo toyayöliki koota sau? Mbayɔ, la balia ba bokwa imɔ angokɔkɔlɔ ndokusola balia ba lɔɛtɛ.

¹³¿Ndai wanu ayali nde boto wa wɛlï la bokwafi? Boto ona ɛnɛsɛkɛ to basi bekeeli yande nda boyaeli wa botema sambo wa wɛlï ebototimbana lande.

¹⁴Nde eya mbo boyalaka la lisiela la lisakani lia bosho nda betema yanu, oongëke la ifaala la nanga ebitokufesa momongo.

¹⁵Wao boti to wɛlï ebokuswi nde nda Use, kangä ewa wenda-bo, ewa bindo, l’ewa belimo ebe;

¹⁶eoka olo ayali ko lisiela la lisakani lia bosho, ko omao loeyaeyo la bobe wa bɛfɔnɔ bitotina.

¹⁷Nde wɛlï ebokuswi nde nda Use wende oso la botanu, limɔ wende la lilatemi la bɔfɔu, bosotuma la shota la bekeeli ya booto, boti l’ikwelakwela la bolimbakeli.

¹⁸Eula ya boyaeli wa lilatemi etotwomo ko la bato ebasolɔɔ imɔ ko boyaeli wa lilatemi.