Read lokele 1 Petelo 1 Bible Online

1 Petelo 1 - lokele bible

1 Petelo 1

¹Petelo ako Botomomu wa Yesu Masiya asotoma lokasa-lo ende bato ebasolimela amamwito l’ebasomelakana okayale nda Ponto, la nda Galatia, la nda Kapadokia, la nda Asia la nda Bitunia,

²ebaaomoko ko la liluwani lia oso lia Mungu Sango, ebüchomoko ko la Bolimo, litina mbo oliteseke la mbo ɔmɛmyakɔmɔkɔ la bakilaba Yesu Masiya. Booto la lilatemi biulweke end’ino!

³Lɔkɛmɔ loyaleke ende Mungu ako Sango wa Ngɛnɛ wasu, Yesu Masiya! Ko l’eoka ya shota shande sifi, aotak’iso liasi la iɛli siyai ko la litɛmwi lia Yesu Masiya nda liwa,

⁴la mbo ɔɔlɛkɛ botiko ebotilasɛɛsɛlɛ, ebotiabebe, ebotiabɛɛlɛk’imɔ la ebosoisoelomo ino nda Use,

⁵ako ino ebasotekamesomo ko la bofoka wa Mungu la lilendelu lianu mbo bɔɔlɛkɛ liuwesi elisotaumbakela ndoisokolomo nda mbile ya liko.

⁶Nda loasɔ-lo otoyaimwa yai nde kwani ko mbile ɛmɔi eluwa lole lanu ndokaka biale ya bakoteli ba bɔfɔnɔ la bɔfɔnɔ,

⁷mbo likoteli lia lilendelu lianu elisolongela mbela la loketi lofi la elisokotelomo imɔ ko la bösä ani etosɛɛsɛlɛ, liao liko lilendelu lianu lieshelek’ino loomalo la tala la lɔkɛmɔ nda lɔɛnɛsɔ loa Yesu Masiya.

⁸Otiɛn’Inde, nde ososam’Inde; ambo kwani boitɔɛn’Inde, nde osolendelo ko Inde, la otoyaimwa la limɛngɔ elisolongela baoi angɛnɛ la elisoilakama la tala;

⁹ongoma tuu ya lilendelu lianu yende mbo osɔɔlɔ liuwesi lia belimo yanu.

¹⁰Batɔndɔli ebatɔndɔɛlɛkɛ ino loasɔ loa booto ebokayeke end’ino, balukaka la bafelaka liuwesi-li;

¹¹bafelakaka mbo ndai la eni mbile eyanangolaka Bolimo wa Masiya nda betema yau, ani atɔndɔlɔ̈kɔ̈ Inde biale ebikokeke Masiya la tala ebikayeke mbisa ya yao.

¹²Lɔɛnɛsɔmɔkɔ end’iyo mbo bakelaka ongoma, inga ndosung’iyo angɛnɛ, kangä ko ino, nda njasɔ ebisokambesomo ino kwani ko l’ebasonangoel’ino Mboli Ilau ko la Bolimo Botanu oyatomomu konda Use oya end’ino; la bakitomo bende la yɛmɛ yotichaka imɔ ko njasɔ-ao.

¹³Eokao wangemesaka bienyelo yanu, taka betema yanu se, kɛsɛkɛ iɛli shanu fwaa ko nda bootaota ebokaeshelomoko end’ino nda bayelo ba Yesu Masiya.

¹⁴Yalaka kwa bana ba lilitesi, otutelëk’imɔ yɛmɛ ya bindo kwa akelak’ino nda mbile ya botutuku wanu;

¹⁵kongo ko kwa eyalak’Inde oyatak’ino lioi ko Botanu, ino imɔ yalaka batanu nda beyaeli yanu bitotina,

¹⁶eoka losotomo nda Lokasa mbo— Yalakaka batanu eoka Imi yende botanu.

¹⁷Eya to mbo ososingwakel’Inde kwa Sango, ako Inde oyatoataka boto la boto eloande loasɔ ko la liengani, ino koyalaka la lilitesi lia bɔwa ko la mbile ebisolimel’ino ono;

¹⁸oluwi nde mbo waendolomoko nda biyaelo ya boyalaala ebisosangol’ino ende batata banu, otiaendolomoko la bieto ebitosɛɛsɛlɛ kwa falata la mbela,

¹⁹kangä la bakila ba Masiya ebale la loketi lofi finɛ, ebale kwa eba efembeli ya bɔkɔkɔ eyeti la limɛmɛ, l’angwɛnɛ litwanelo.

²⁰Inde nd’aomokö oso wa bakeelomo ba wenda, nde asɔɛnɛsɔmɔ ko kwani nda bacho ba liko ko l’eoka yanu;

²¹ako ino ebatoimela Mungu ko l’eoka yande. Mungu nd’atɛmɔlɔkɔ Inde nda liwa la ataliak’Inde tala, mbo liimeli la iɛli shanu biyaleke ngo ko ende Mungu.

²²Ani asotanes’ino belimo yanu ko la lilitesi lia wewe ko mbo osamanakeke la losamɔ loa bitungani elole la momongo, ongoma samakanaka to la botema bototi.

²³Osootomo liasi, inga la koto ebitosɛɛsɛlɛ, kangä ko la yao ebiitosɛɛselɛ imɔ, ko l’eoka ya Lioi lia Mungu elitoyala la liwawi ko nda lokato;

²⁴eoka mbo— Bindo ya balomboki batotina yende kwa bangala ba elanga, La wano wa yao kwa fɔtɔtɔ ya elanga; Bangala batobɛɛlɛ, la fɔtɔtɔ bitokwaka se,

²⁵Kongo ko Lioi lia Mungu litotikala ko layalaya. Liende ko wɛndi ebosonangoelomo ino nda Mboli Ilau. 2