Read lokele 2 Petelo 1 Bible Online

2 Petelo 1 - lokele bible

2 Petelo 1

¹Simona Petelo, bɔkɔwa la Botomomu wa Yesu Masiya, asotoma lokasa-lo ende bato ebasɔɔlɔ liimeli elile la lokuku lolau kwa eliasu liimeli, ko la liengani lia Mungu wasu la Bouwesi wasu ako Yesu Masiya,

²Booto la lilatemi biulweke end’ino, ko la liluwani lioluwa Mungu la Yesu Ngɛnɛ wasu!

³Eoka bofoka wande ebosekwi ende Mungu bosofaef’iso bitotina ebiomani nde la loiko la lisemoli lia Mungu, ko la liluwani lia Inde oyatak’iso lioi ko la tala la likama lia bolau wande,

⁴ko la yao asotikel’iso basakä bande balau ebalongeli fafo, litina mbo oyaleke la likaɔ lia liluku lia Mungu ani osokwela lifɔndi elikoyali ono nda wenda ko l’eoka ya yɛmɛ ibe.

⁵Limɔ ko l’eoka ya litina-li, fumbaka finɛ ndowachaka boyaeli bolau amamwito la liimeli lianu, amamwito la boyaeli bolau imɔ ko liluwani,

⁶amamwito la liluwani imɔ ko likakalesi lia betema yanu, la amamwito la likakalesi lia botema imɔ ko likɔkɔmɛlɛ, la amamwito la likɔkɔmɛlɛ imɔ ko lisemoli lia Mungu,

⁷amamwito la lisemoli lia Mungu imɔ ko eniya ya bitungani ya Etanda, amamwito la eniya imɔ ko losamɔ.

⁸Eoka bosɛlɛ nde njasɔ-bi la biulwa end’ino likama, limɔ bitokufesel’ino bowandu la ɛkwɛlɛ nda liluwani lia Ngɛnɛ wasu ako Yesu Masiya.

⁹Eoka boto oyasoomelo njasɔ-bi, ambo ale la botuku la atɔɛnɛ ko yao ebile tina lande, asoosala lotaneso loa batwanelo bande ba osooso.

¹⁰Eokao, Bitungani fumbaka finɛ ndokɔcha loasɔ loko mbo osotomo lioi la mbo osoaomo la Mungu, eoka bokela ongoma ani ino angokwa imɔ se;

¹¹ongoma to otofaefomo lifaefela, ko isosha shɔɔtɔ nda bɔkɔta wa layalaya wa Ngɛnɛ wasu ako Yesu Masiya Bouwesi wasu.

¹²Eokao, yelaenyeles’ino e-njasɔ-bi mbile la mbile, ani ososila oko ndoluwa yao la ndokɔkɔmɛlɛ kɔkɛ nda wewe ebosoluw’ino.

¹³Itangi nde mbo losoengana lami, ko la mbile eyetikali lami nda bindo, ndofumbes’ino ko la lienyelesi lia njasɔ-bi,

¹⁴eoka isoluwa mbo mbile yosekwa nda bindo yami esoya oko tina, kwa ɛnɛsɛkɛ imɔ Ngɛnɛ wasu ako Yesu Masiya wɛnɛsɛ’mi.

¹⁵Itofumba to ndokomya mbo mbisa ya liwa liami, ino bokɔkɔlɛkɛ ko mbile la mbile ndoenyakela e-njasɔ-bi.

¹⁶Aluwesak’iso oluwes’ino bofoka la loyo loa Ngɛnɛ wasu ako Yesu Masiya, totiatutelaka bembila eyafɔlɔmɔkɔ la wɛlï wa bato, kongo ko twɛnɛkɛ tala yande ya likama.

¹⁷Eoka afomoko Inde loinelomo la tala ko ende Mungu Sango, limiki lifi lia Ngɛnɛ wa tala loonga mbo— Oyo ende Wana wami wa losamɔ, oyatoomalesa nde Imi;

¹⁸la iso angɛnɛ twaokaka limiki-li eliasekwaka nda Use, eyayaelak’iso lande nda löngo lotanu.

¹⁹Tole imɔ ko la liolo lia litɔndɔli elisokɔkɔmɛsɔmɔ kɔkɛ, eokao bolau ngo ko mbo botinganeke la liao kwa faka eyesoanganga nda elela ya botufɛlɛ ko nd’akasɔsweke buse, ani üonge sha lisɔi sisotɛmwa nda betema yanu.

²⁰Taluwaka to mbo angwɛnɛ litɔndɔli lia Kasa ya Mungu lisoaesomo litina se ko la wɛlï wa boto angɛnɛ kongo,

²¹eoka litɔndɔli litiayaka ko la lisangi lia boto ko mbile ango ɛmɔi, kongo ko bato angɛnɛ ebatinjakomo ko la Bolimo Botanu, iyo loonga ko la isosha sha Mungu.