Read lokele 2 Petelo 3 Bible Online

2 Petelo 3 - lokele bible

2 Petelo 3

¹Ebasamomu, e-lokasa-lo loende eloa imbale elososɔnɛlɛ’mi ino, la nda yaambale isofumbekesa baenyeli balau banu ndoenyeles’ino;

²mbo otaosala baölo ebaongaka Batɔndɔli batanu ko osooso, la ekela ya Ngɛnɛ la Bouwesi eyaongomoko ko la Batomomu banu.

³Taluwaka to loasɔ-lo, mbo nda bacho ba liko, ebatolimbokola beyaka la batolitekesa ko yɛmɛ yau angɛnɛ,

⁴la batoonga mbo— ¿Lisakä lia loyo loande ko anima to? Eoka ko nda mbile eyakwaka batata basu tɔlɔ twa liwa bitotina bikotikala kwa ayalaka ngo ko yao ko nda liakoli lia wenda-bo.

⁵Nde basoosala loasɔ-lo la yɛnɔ, loko mbo biuse yaaka kwaalakwaala la se imɔ yakelomoko nda balia la ko la balia l’eoka ya lioi lia Mungu,

⁶la ko la balia wenda ewayalaka lolindaka la fela, wao losɛɛsɛlɔ.

⁷Nde ko la lioi-ao biuse la se ebikoyali kwani bisoukamesomo eoka yofechomo ko la bösä la bisüchelomo lise lia liataki la lɔsɛɛsɛlɔ loa bato ebatiluwane la Mungu.

⁸Nde ino, ebasamomu, oosalëke loasɔ-lo lomwito, loko mbo— Ende Ngɛnɛ Mungu, lise limɔi liende kwa miaka bilɛfu, la miaka bilɛfu yende kwa lise limwito end’Inde.

⁹Ngɛnɛ wasu ati l’imɔngi shokocha lisakä liande, ani asotanga bato bamɔi mbo imɔngi, nde atoumbakel’ino angowa esole, eoka atilɛmbɛ mbo boto angɔmɔi asɛɛsɛlɛkɛ, kangä mbo batotina biyeleke nda likalangani.

¹⁰Liyaka nde, liko Lise lia Ngɛnɛ, kwa wiya; nda lise lina biuse bilawanjwaka mbao ko la liela lia wambe, liso lia use, la tengai la tolonge bilalangwalangwaka la etao ya likama limɔ wenda la yao ebikelomo ina bilaisolomoko.

¹¹Eoka mbo bitotina-bi bilalangwaka ongoma, oondu nde ndoyala boni to bɔfɔnɔ wa bato wa boyaeli botanu la lilitesi liolitesa Mungu,

¹²l’ani atoumbakel’ino la yɛmɛ yoendesa loyo loa lise lia Mungu, ko la loao biuse bilafyaka la bilalangwaka la liso lia use, la tengai la tolonge bilalangwaka la etao ya likama.

¹³Nde yende ko biuse biyai la wenda boyai ebikolukak’iso la olo akayeleke ko liengani, kwa atikak’Inde angɛnɛ lisakä.

¹⁴Eokao, ebasamomu, akolukak’ino njasɔ-bi fumbaka to mbo Inde oshek’ino l’angwɛnɛ limɛmɛ, angwɛnɛ ango litwanelo, kangä lilatemi.

¹⁵Tangaka mbo liumbakeli lia Ngɛnɛ wasu, liende ko liuwesi, kwani asɔnɔkɔ etungani oyasamomu lasu ako Paulo ɛsɔnɛl’ino ko la wɛlï ewafaefomoko inde,

¹⁶kwa atoongak’inde imɔ nda kasa yande bitotina. Nda yao, bimɔi yende la tale yoluwa litina; eba botutuku, l’ebatikɔkɔmɛ batofenyaka batina, kwa atokelak’imɔ iyo nda kasa yasi ya Mungu ko nda losɛɛsɛlɔ loau angɛnɛ.

¹⁷Eokao to ino ebasamomu, kwa asotaluw’ino njasɔ-bi, lambaka mbo otaengolesomo ko la litwanelo lia bato babe la mbo ino otasekwa nda likɔkɔmɛlɛ lianu angɛnɛ.

¹⁸Nde kondaka nda booto la nda liluwani lia Ngɛnɛ wasu la Bouwesi ako Yesu Masiya. Tala bifomoko end’Inde la kwani la ko nda layalaya!