Read lokele Yuda 1 Bible Online

Yuda 1 - lokele bible

Yuda 1

¹Yuda ako bɔkɔwa wa Yesu Masiya, la etungani ya Yakobo, asotoma lokasa-lo ende bato ebatomokö lioi, ebasosamomo la Mungu Sango l’ebasokukyiomo la Yesu Masiya.

²Shota la lilatemi la losamɔ biulweke end’ino!

³Ino ebasamomu, ayalaka’mi la yɛmɛ yosɔnɛl’ino lokasa loasɔ loa liuwesi elisoomana lasu yaatoti, limɔ yatinjomoko ndosɔnɛl’ino mbo ofumbeke ndonanela liimeli elisoekesomo ebuchomu ende Masiya ko liekesa lia likɔkɔmɛlɛ.

⁴Eoka bato bamɔi basɔɔtɔ nda Etanda wisisa ebafomoko se la likuchi-li ko kwaala; bende bato ebatiluwe Mungu, batokikokola booto wa Mungu mbo fofe yokelaka bolëfë la yoanganya Bɔkɔta la Ngɛnɛ wasu ɔmwito, ako Yesu Masiya.

⁵Ilɛmbi nde ndoenyales’ino loasɔ-lo, ani waluwesomoko loao ko oso la likɔkɔmɛlɛ, mbo Ngɛnɛ wasu louwesa bato bande nda yese ya Ejipeto, nde mbisa Inde loombesa ebatiaimelaka hombe.

⁶Bakitomo imɔ ebatiatikalaka nda eyau ekomyelo nde basekwaka nda eyaelo yau angɛnɛ, basotikakomo nda botufɛlɛ wa ndi, nda bɛnyɔlɔlɔ ya lokato ko nda liateli lia njasɔ lia lise lina lifi;

⁷kwa akelomoko imɔ Sodomo la Amola la bekenge ebitimbi ani bakelakaka belëfë la ebafɔlɔkɔ lisɔngi lia efinole, iyo ana basosɛlɔmɔ etichelo ani bakuchomoko ko la bösä wa layalaya.

⁸Nde e-bato-ba batokelaka ko ongoma, nda saki batobebesa bindo, batotefokola tososha la batosɛɔkɔlɔ ebatalemi tala.

⁹Nde Bokitomo oyalongeli ako Mikaele, awesanak’inde la Satana loasɔ loa bolyo wa Mose, atiatendelaka ndof’inde se la limɔli, kangä ndoonga lande mbo— Mungu afek’aɛ liɛngɔ!

¹⁰Kongo ko e-bato-ba batomɔlɔkɔ njasɔ ebitiluwek’iyo litina, nde njasɔ ina ebisoluw’iyo ko la yɛmɛ yau kwa aluw’imɔ ko nyama ebiti la wɛlï basosɛɛsɛlɛsɔmɔ ko la likeli lia yao.

¹¹Aina ngandi lau! Eoka basokɛndɛ ko nda mboka ya Kaina, la batoengaka litwanelo lia Balaama eoka yɔsɔ bondanda, la batosɛɛsɛlɛ kwa Kola ko nda litefwesi lia isosha.

¹²Bato-ba bende kwa bakɔi babe nda bilambɔ yanu ya losamɔ, batolaka kwa afofa angowa sɔni; bende kwa bafita ebasokɛndɛkɛndɛsɔmɔ ko la lofofo, bende kwa tosandu etosobɛɛkɛlɛ mbisa ya eula, angwɛnɛ tuma, tosowa to bawa ambale la tosouwolomo la biili;

¹³bende imɔ kwa batutu ba balia ebatofifaka tofi toko sɔni yau angɛnɛ; bende kwa tolonge etosoeyaeyaka, nde botufɛlɛ wa ndi bosüchelomo iyo ko nda layalaya.

¹⁴Enoka wa fɛtɔ ya osambalɛ mbisa ya Adamu, atɔndɔlɔ̈kɔ̈ eoka ya e-bato-ba, mbo— Tɛnɛ ngo, Ngɛnɛ asoya la tukela ya bilɛfu ya ebande batanu

¹⁵ndoyaatakela batotina la ndotombokola ebatiluweke Mungu loasɔ loa yao ebisokelak’iyo la baoi bawau ebaongakak’iyo ebatiluweke Mungu ndoongel’Inde la lolanga.

¹⁶Bato ana bende ebatoimaimaka, bende la bɛfɛfɛlɛ, batolitesa ko yɛmɛ yau angɛnɛ, bɛnɔkɔ yau bitoongaka betendele la toambacha ndɔɔngɔlɔ bato bɔlɛsɛk’iyo bondanda.

¹⁷Nde ino ebasamomu, enyekelaka baölo ebaongomoko oso ko la Batomomu ba Ngɛnɛ Wasu ako Yesu Masiya;

¹⁸iyo loonga lanu mbo— Nda mbile ya liko, ebatolimbokola beyaka ko ndolitesa ko yɛmɛ yau angɛnɛ ebitiluwane la Mungu.

¹⁹Eba batosɛnyanɛsɛ beoto, batoluwa ko bindo, bati ango la Bolimo lau.

²⁰Nde ino ebasamomu, kɔkɔmɛlɛkɛ kwa ndakɔ eyeswomu se suu, nda liimeli lianu elilongeli l’otanu, sombokolaka ko la Bolimo Botanu;

²¹tikalaka tɔɔ nda losamɔ loa Mungu, umbakelaka shota sha Ngɛnɛ wasu ako Yesu Masiya ko nda loiko loa layalaya.

²²Wɛlɛkɛ bamɔi ebasotaka fee ko shota;

²³uwesaka bamɔi ko ndɔɔnɔkɔlɔ iyo kwa atɔɔnɔkɔlɔmɔ isandu nda bösä, wɛlɛkɛ basi ngandi ko la bɔwa, nde otoiyela ango bisinda yau ebisobebaka ko la njasɔ ya yɛmɛ ya bindo.

²⁴Ende Inde oyasokɔkɔlɔ ndotingakana lanu mbo otawa likulya nda mboka la ndoemes’ino oso wa tala ya bɔfɛkɔ wande la limɛngɔ fuu l’angwɛnɛ liälö ango limɔi,

²⁵ko ende Mungu Ɔmwito, Bouwesi wasu, ko l’eoka ya Yesu Masiya Ngɛnɛ wasu, loomalo la tala ya Bokakalesi la isosha, ko oso wa mbile la kwani nda mbile-ye la ko nda layalaya! Ongoma.