Read lokele Liɛnɛsu 6 Bible Online

Liɛnɛsu 6 - lokele bible

Liɛnɛsu 6

¹Limɔ imi lɔɛnɛ ani asɔmbɔlɔkɔ Wana wa bɔkɔkɔ ɛmɔi ya bisɔlɔnɛlɔ bosambale, la imi loka ɔmɔi w’eba liwawi banɛi ani atoonga la limiki kwa elundi, mbo— Yauku!

²Imi lɔɛnɛ la tɛnɛ ngo punda efufu, la boto oyatalemi nda yao lounda botaliya la inde lofomo iyoyo sha lilongi, limɔ inde lokuswa okalongela wenda.

³Limɔ asɔmbɔlɔkɔ Inde ɛsɔlɔnɛlɔ ya imbale, imi loka ewa liwawi lia ambale ani inde loonga mbo— Yauku!

⁴La punda yasi lɔtɛmwa eyetelu la boto oyatalemi nda yao lofomo isosha shɔɔnɔkɔlɔ lilatemi nda wenda mbo bato boolakaneke, la afomoko ambɔtɛ wa likama.

⁵Limɔ asɔmbɔlɔkɔ Inde ɛsɔlɔnɛlɔ ya isatɔ, imi loka ewa liwawi lia asatɔ ani inde loonga mbo— Yauku! Imi lɔɛnɛ la tɛnɛ ngo punda yindo, la oyatalemi nda yao lounda ikweelo sha bolito nda bosamba wande.

⁶Limɔ imi loka kwa mbo limiki, sisi y’eba liwawi banɛi, elitoonga mbo— Ikweelo sha bofonga sitokwa lofalanga lɔmɔi la tokweela tosatɔ twa bangwindi ko lofalanga lɔmɔi, nde obebesëke baita la bänä!

⁷Limɔ asɔmbɔlɔkɔ Inde esɔlɔnɛlɔ ya inɛi, imi loka limiki lia ewa liwawi lia anɛi ani inde loonga mbo— Yauku!

⁸Imi lɔɛnɛ la tɛnɛ ngo punda elafwi kwa bolyo, la oyatalemi nda yao lotomo lina liko Liwa la ngɛnɛ wa Ewelo lotutana lande la iyo lofomo isosha shokakalesa botüku wa inɛi wa wenda, ndoola bato la ambɔtɛ la londo la loo la nyama ya lokonda.

⁹Limɔ asɔmbɔlɔkɔ Inde ɛsɔlɔnɛlɔ ya bɔɔmwi; ose ya etumbelo ya lifaefi, imi lɔɛnɛ belimo ya bato ebaolomoko eoka ya lioi lia Mungu la eoka ya likambesi liau liokambekesa basi;

¹⁰iyo loamama la limiki lifi, iyo mbo— ¿E Ngɛnɛ oyale Botanu la Wewe, otoumwaka to ko mbile yanga, angotaatel’iso njasɔ la angotakundel’iso bakila end’iyo ana ebayali nda wenda-bo?

¹¹Limɔ boto la boto lofomo kanjo efufu la iyo loongomo mbo bataɛumaka kɔni mbile sinyo, ko nd’akaɔlwɛkɛ loketi loa ebasangani lau, bako bɛkɔwa la bitungani ebakaolomoko kwa aolomoko imɔ ko iyo angɛnɛ.

¹²Limɔ imi lɔɛnɛ ani asɔmbɔlɔkɔ Inde ɛsɔlɔnɛlɔ ya liambɛ, la nyɛlɛ lotukatuka likama la liso-lia-use lowindiala kwa likunia la songe lokweelo bakila,

¹³la tolonge twa use lokwaka se nda nyɛlɛ kwa atotaka bokumo baküka se ani botolɛlɛsɔmɔ ko la lofofo lofi.

¹⁴Limɔ biuse losɛnyakana kwa lokasa elosoundukolomo la föngo la besanga betotina losokolomo nda biyaelo ya yao.

¹⁵Limɔ bɛkɔta ya biese la benyafala la betoli oso ya bita, la bafoka la bato bafi la bɛkɔwa bitoti la toote imɔ, iyo loisakama nda fowa la nda batalɛ ba föngo;

¹⁶l’ani batoonga la föngo la batalɛ mbo— Wɛlɛkɛmɛkɛ se olikolo liasu la isamelak’iso nda bɔmbɔ wa Inde oyayali se nda kɛka efi la nda efango ya Wana wa bɔkɔkɔ,

¹⁷eoka lise lina lifi lia efango yande lisoya, limɔ ¿Ndai to atokɔkɔlɔ ndoemesana fii omao?