Read kinyarwanda Intangiriro 13 Bible Online

Intangiriro 13 - kinyarwanda bible

Intangiriro 13

¹Abramu azamuka ava mu Misiri ajya muri Negevu, azamukana n’umugore we n’ibyo yari atunze byose. Loti na we bari kumwe.

²Abramu yari umutunzi cyane, akize kuri zahabu na feza.

³Nuko agenda yimuka, ava muri Negevu yerekeza i Beteli. Agera ahantu yari yarigeze gucumbika, hagati ya Beteli na Hayi.

⁴Aho nyine yari yarigeze kuhubaka urutambiro, yongera kuhambariza izina ry’Uhoraho.

⁵Loti wimukanaga na Abramu, na we yari atunze amatungo, amagufi n’amaremare, hamwe n’amahema.

⁶Igihugu nticyari kibahagije bombi, kandi kubera ubwinshi bw’amatungo yabo, kubana ntibyashobokaga.

⁷Haje kuvuka intonganya mu bashumba ba Abramu n’aba Loti. — Icyo gihe Abakanahani n’Abaperezi bari bagituye mu gihugu. —

⁸Abramu abwira Loti, ati «Ntihakabe intonganya muri twe, no ku bashumba banjye n’abawe, kuko turi abavandimwe.

⁹Mbese nturora iki gihugu cyose? Reka dutandukane. Nujya ibumoso nzajya iburyo, nujya iburyo nzajya ibumoso.»

¹⁰Loti aterera amaso, abona ikibaya cyose cya Yorudani, n’uko cyatembaga amazi impande zose. — Ibyo byabaye igihe Uhoraho yari atararimbura Sodoma na Gomora; muri icyo gihe icyo kibaya kugeza kuri Sowari cyari kimeze nk’ubusitani bw’Uhoraho[44], kimwe n’igihugu cya Misiri.—

¹¹Loti yihitiramo ikibaya cyose cya Yorudani, agenda rero agana iburasirazuba. Batandukana batyo.

¹²Abramu we atura mu gihugu cya Kanahani, naho Loti atura mu migi y’icyo kibaya, amahema ye ayashinga hafi ya Sodoma.

¹³Abantu b’i Sodoma bari inkozi z’ibibi, bahoraga bacumura kuri Uhoraho.

¹⁴Loti amaze gutandukana na Abramu, Uhoraho abwira Abramu, ati «Ubura amaso uhereye aho uri, maze urebe mu majyaruguru no mu majyepfo, urebe mu burasirazuba no mu burengero bwaryo.

¹⁵Igihugu cyose uruzi ndakiguhaye burundu, wowe n’urubyaro rwawe.

¹⁶Urubyaro rwawe nzaruha kororoka rugwire nk’umukungugu wo ku isi. Mbese hari umuntu washobora kubara umukungugu w’isi? Ni ko n’urubyaro rwawe batazashobora kurubara!

¹⁷Haguruka utambagire iki gihugu mu burebure bwacyo no mu bugari bwacyo, kuko nkiguhaye.»

¹⁸Abramu ashingura amahema ye, ajya gutura hafi y’ibiti by’imishishi ya Mambure biri i Heburoni. Ahubakira Uhoraho urutambiro.