Read kinyarwanda Intangiriro 15 Bible Online

Intangiriro 15 - kinyarwanda bible

Intangiriro 15

¹Ibyo birangiye, Uhoraho abwirira Abramu mu nzozi, ati «Abramu, ntutinye, ndi ingabo igukingiye; ibihembo byawe bizaba byinshi cyane.»

²Abramu aramusubiza ati «Nyagasani Mana, wampa iki? Jyewe ngiye gupfa nta kana, kandi uzanzungura ni Eliyezeri w’i Damasi.»

³Ati «Dore nta rubyaro wampaye, none ngiye kuzungurwa n’umwe mu bagaragu banjye.»

⁴Uhoraho ni ko kumubwira ati «Nta bwo ari we uzakuzungura, ahubwo uzazungurwa n’uzaturuka mu maraso yawe.»

⁵Nuko Uhoraho amujyana hanze, aramubwira ati «Ubura amaso urebe hejuru, maze ubare inyenyeri niba ushobora kuzibara.» Nuko aramubwira ati «Dore ni kuriya urubyaro rwawe ruzangana.»

⁶Abramu yemera Uhoraho[46], bituma amubonamo ubutungane.

⁷Aramubwira ati «Ndi Uhoraho wagukuye muri Uri y’Abakalideya, kugira ngo nzakugabire iki gihugu.»

⁸Abramu aramusubiza ati «Nyagasani Mana, nzabwirwa n’iki ko nzagitunga?»

⁹Uhoraho ati «Jya kunshakira inyana y’imyaka itatu, uzane n’ihene y’imyaka itatu, isekurume y’intama y’imyaka itatu hamwe n’intungura n’inuma.»

¹⁰Abramu amuzanira ayo matungo yose, ayasaturamo[47] kabiri, igisate kimwe akirambika imbere y’ikindi, ariko inyoni ntiyazibaga atyo.

¹¹Inkongoro ziza kurya izo ntumbi, Abramu arazirukana.

¹²Izuba rigiye kurenga, Abramu afatwa n’ibitotsi, arasinzira araheranwa. Ubwoba bumutaha ari bwinshi, abutewe n’umwijima w’icuraburindi.

¹³Uhoraho abwira Abramu, ati «Menya neza ko abazagukomokaho bazasuhukira mu gihugu kitari icyabo; bazakibamo abacakara, bazicishwe uburetwa imyaka magana ane yose.

¹⁴Ariko abo bazaba barabereye abacakara na bo nzabahana. Hanyuma abazagukomokaho bazahimukane ibintu byinshi.

¹⁵Naho wowe uzigendera mu mahoro, usange ba sokuruza bawe; uzahambwa mu mahoro ugeze mu zabukuru.

¹⁶Bazagaruka ino ku gisekuruza cya kane, kuko ibyaha by’Abahemori bitarashira inyuma.»

¹⁷Igihe izuba rimaze kurenga, n’umwijima umaze gukwira hose, ifumba icumbeka n’ikibatsi cy’umuriro[48] binyura hagati ya za nyamaswa zaciwemo kabiri.

¹⁸Uwo munsi Uhoraho agirana amasezerano na Abramu, muri aya magambo ati «Iki gihugu ngihaye urubyaro rwawe, kuva ku ruzi rwa Misiri kugeza ku ruzi runini rwa Efurati.»

¹⁹Ni igihugu cy’Abakeniti, Abakenisi, Abakadimoni,

²⁰Abaheti, Abaperezi, Abarefayimu,

²¹Abahemori, Abakanahani, Abagirigashi, n’Abayebuzi.