Read kinyarwanda Intangiriro 16 Bible Online

Intangiriro 16 - kinyarwanda bible

Intangiriro 16

¹Sarayi, umugore w’Abramu, nta mwana yari yaramubyariye; ariko akaba yari afite umuja w’Umunyamisirikazi, akitwa Hagara.

²Sarayi ni ko kubwira Abramu, ati «Nyamuneka, ndabigusabye, dore Uhoraho yambujije kubyara. Sanga uriya muja[49] wanjye, none ahari nazamubonaho umwana.» Abramu yemera iyo nama ya Sarayi.

³Hari hashize imyaka cumi Abramu atuye mu gihugu cya Kanahani, ubwo Sarayi umugore we amuzaniye Hagara umuja we w’Umunyamisiri, kugira ngo amubere umugore.

⁴Abramu arongora Hagara, nuko Hagara asama inda. Abonye atwite ntiyaba akita kuri nyirabuja.

⁵Nuko Sarayi abwira Abramu, ati «Ni wowe utera aka gasuzuguro ngirirwa! Ni jye waguhaye umuja wanjye. None aho amariye kubona atwite, sinkigira agaciro kuri we. Ngaho Uhoraho naducire urubanza twembi!»

⁶Abramu abwira Sarayi, ati «Dore umuja wawe ni wowe umugenga; umugire uko ushatse.» Ubwo Sarayi aramutoteza, undi arahunga, aramubisa.

⁷Umumalayika w’Uhoraho[50] aza guhurira na Hagara mu butayu, hafi ya rya riba riri ku nzira igana i Shuru.

⁸Nuko aramubaza ati «Hagara, muja wa Sarayi, urava he ukajya he?» Undi aramusubiza ati «Ndahunga mabuja Sarayi.»

⁹Umumalayika w’Uhoraho aramubwira ati «Subira kwa nyokobuja maze ujye umwumvira.»

¹⁰Arongera ati «Nzongera abazagukomokaho, nzabagira benshi ku buryo batazashobora kubarika.»

¹¹Umumalayika w’Uhoraho ati «Uratwite, kandi uzabyara umwana w’umuhungu, ukazamwita rero Ismaheli[51] kuko Uhoraho yumvise agasuzuguro bagusuzuguye.

¹²Naho we azaba nk’indogobe y’ishyamba itimirwa! Azarwanya bose, bose bamurwanye. Azahora atura yitaruye bene nyina.»

¹³Hagara yambaza izina ry’Uhoraho wari umaze kumubwira ibyo ngibyo, avuga ati «Uri Imana imbona». Yaribwiraga ati «Ese koko aha ni ho namuboneye, We uhora ambona?»

¹⁴Ni cyo cyatumye iryo riba baryita Iriba rya Lahayi‐Royi (irya Nyir’ubuzima umbona), rikaba hagati ya Kadeshi na Beredi.

¹⁵Hagara abyarira atyo Abramu umwana w’umuhungu, maze uwo mwana Abramu amwita Ismaheli.

¹⁶Abramu yari afite imyaka mirongo inani n’itandatu, igihe Hagara amubyariye Ismaheli.