Read kinyarwanda Intangiriro 19 Bible Online

Intangiriro 19 - kinyarwanda bible

Intangiriro 19

¹Ba Bamalayika uko ari babiri bagera i Sodoma nimugoroba. Loti yari yicaye ku irembo ry’umugi. Loti ngo ababone arahaguruka, arabasanganira, arapfukama yubika umutwe ku butaka.

²Nuko aravuga ati «Ndabinginze, ba databuja, nimwinjire mu nzu y’umugaragu wanyu, mwoge ibirenge, murare, maze ejo muzazinduke mukomeze urugendo rwanyu.» Baramubwira bati «Oya, turarara hariya ku irembo.»

³Arakomeza arabahata, baremera bajya iwe, binjira mu nzu. Abategurira ibyo kurya, abatekeshereza utugati tudasembuye, bararya.

⁴Babaye batararyama, baterwa n’abagabo bo muri uwo mugi wa Sodoma, kuva ku muto kugeza ku musaza, mbese abaturage bose[59], inzu barayigota.

⁵Nuko bahamagara Loti bati «Abo bagabo baje iwawe iri joro bari hehe? Batuzanire tubishimisheho.»

⁶Loti arasohoka asiga akinze.

⁷Arababwira ati «Bavandimwe, ndabibasabye mwikora ishyano.

⁸Dore mfite abakobwa[60] babiri b’isugi, ngiye ahubwo kuba ari bo mbaha mubakoreshe icyo mushaka; naho bariya bagabo ntimugire icyo mubatwara, kuko ari abashyitsi banjye.»

⁹Baramusubiza bati «Hoshi igirayo!» Barabwirana bati «Uyu nguyu asuhukiye ino vuba, none dore arigira umucamanza! Turaza kumugirira nabi kurusha uko twari kuyigirira abo bantu.» Loti baramuhirika, begera urugi ngo barumene.

¹⁰Ariko ba bagabo babiri bakingira Loti amaboko yabo, bamugarura mu nzu, barafunga.

¹¹Naho ya mbaga yari ihagaze ku muryango w’inzu babahuma amaso kuva ku muto kugeza ku mukuru, ntibashobora kumenya aho umuryango uherereye.

¹²Abo bagabo babaza Loti, bati «Hari abandi bantu bawe bari hano? Hari umukwe? Hari abahungu cyangwa abakobwa bawe? Abo ufite mu mugi bose, uhabakure!

¹³Tugiye kuharimbura, kuko induru iterwa na Sodoma ari ndende imbere y’Uhoraho. None yatwohereje ngo tubarimbure.»

¹⁴Loti ni ko gusohoka abwira abakwe be yari kuzashyingira abakobwa be ati «Nimuhaguruke muve aha hantu, kuko Uhoraho agiye kuhasenya.» Ariko abakwe be bakabona ko ari amashyengo.

¹⁵Umuseke ukebye abamalayika batota Loti, bati «Haguruka, n’umugore wawe n’abakobwa bawe babiri bari hano, kugira ngo ejo mutazavaho muzira ibyaha by’uyu mugi.»

¹⁶Agishidikanya, abamalayika babafata ukuboko, we n’umugore we, n’abakobwa be uko ari babiri, nuko barabasohokana, kuko Uhoraho yari yamugiriye impuhwe.

¹⁷Babagejeje hanze, baramubwira bati «Kiza amagara yawe! Nturebe inyuma, ntugire aho uhagarara muri iki kibaya cyose. Uhungire mu misozi, udapfa.»

¹⁸Loti arababwira ati «Oya, Nyagasani!

¹⁹Dore, jyewe umugaragu wawe, nagize ubutoni mu maso yawe kandi wangiriye ineza ikomeye, ukiza amagara yanjye. Ariko sinashobora guhunga ngo ngere kuri uriya musozi, icyo cyago kitaramfata ngo mpfe.

²⁰Dore, kariya kadugudu ureba kari hafi bihagije kugira ngo nkageremo; ni kanzinya cyane, reka abe ari ho mpungira, maze mbeho!»

²¹Undi ati «Nongeye kukugirira ubuntu, sinsenya kariya kadugudu uvuze.

²²Ngaho rero ihute uhungireyo. Kuko nta cyo nshobora gukora utaragerayo.» Ni cyo cyatumye ako kadugudu bakita Sowari (ari byo kuvuga kanzinya).

²³Izuba ryarashe Loti ageze i Sowari.

²⁴Nuko Uhoraho agusha kuri Sodoma na Gomora imvura y’umuriro uvanze n’ubumara biturutse ku ijuru no kuri Uhoraho.

²⁵Atsemba[61] iyo migi yombi n’ikibaya cyose; atsemba abaturage b’iyo migi, n’ibimera byose ku butaka birakongoka.

²⁶Umugore wa Loti aza kureba inyuma, ahita ahinduka igishyinga cy’umunyu.

²⁷Abrahamu azindukira aho yari yaraye ahagaze imbere y’Uhoraho.

²⁸Yerekeza amaso kuri Sodoma na Gomora, kuri cya kibaya; abona umwotsi ucucumuka mu butaka nk’uva mu itanura.

²⁹Nguko rero uko Imana yibutse Abrahamu, ikavana Loti mu byago, igihe irimbuye imigi y’akarere Loti yari atuyemo.

³⁰Loti azamuka ava i Sowari ajya gutura mu misozi yirengeye, ajyana n’abakobwa be babiri. Yatinye rero gutura i Sowari, ahubwo yiturira mu buvumo, we n’abakobwa be uko ari babiri.

³¹Umukuru aza kubwira umuto ati «Data arashaje, kandi mu gihugu cyose nta ho tuzabona umugabo ngo aturongore, nk’uko bigenda ahandi hose.

³²Ngwino tunyweshe data divayi, maze turyamane[62], kugira ngo dutume data asiga imbuto.»

³³Iryo joro batereka se divayi. Umukuru ararana na se. Se ntiyabimenya, ntiyamenya igihe umukobwa yaryamiye n’igihe yabyukiye.

³⁴Bukeye umukuru abwira umuto ati «Dore ejo nararanye na data; twongere iri joro tumutereke divayi, uze uryamane na we. Bityo tuzaba dutumye data asiga imbuto.»

³⁵Iryo joro na none batereka se divayi. Umuto arahaguruka ajya kurarana na we. Se ntiyabimenya, ntiyamenya igihe umukobwa yaryamiye, n’igihe yabyukiye.

³⁶Abakobwa ba Loti basama inda batyo, bazitewe na se.

³⁷Umukuru abyara umuhungu amwita Mowabu[63]; ni we sekuru w’Abamowabu, bakiriho n’ubu.

³⁸Umuto na we abyara umuhungu, amwita izina rya Benihami[64]; ni we sekuru w’Abahamoni, bakiriho n’ubu.