Read kinyarwanda Intangiriro 23 Bible Online

Intangiriro 23 - kinyarwanda bible

Intangiriro 23

¹Sara yabayeho imyaka ijana na makumyabiri n’irindwi.

²Sara yapfiriye i Kiriyati — Haruba, ari yo Heburoni, mu gihugu cya Kanahani. Abrahamu aramuririra, aramwiraburira.

³Hanyuma arahaguruka, ava ku murambo we ngo ajye kumvikana na bene Heti.

⁴Nuko arababwira ati «Ndi umusuhuke n’umushyitsi muri mwe; nimumpe ikibanza cyo guhambamo umuntu wanjye witahiye.»

⁵Bene Heti basubiza Abrahamu bamubwira bati

⁶«Shobuja, umva icyo tukubwira. Imana yakugize umuntu ukomeye muri twe. Uhambe umuntu wawe mu mva uri buhitemo mu mva zacu zose. Ntawakwima imva yo guhambamo umuntu wawe.»

⁷Abrahamu arahaguruka, arapfukama, yubika umutwe ku butaka imbere ya bene igihugu, ari bo bene Heti.

⁸Arababwira ati «Niba koko mwemera ko mpamba umuntu wanjye wigendeye, mu mva y’iwanyu, munyumve: nimunyingingire Efuroni mwene Sohari,

⁹maze ampe ubuvumo bwe buri i Makipela ku rubibi rw’umurima we. Ahangurishe ku giciro gikwiye cya feza, abe ari ho haba irimbi ryanjye iwanyu.»

¹⁰Efuroni yari yicaranye na bene Heti. Efuroni w’Umuheti rero asubiza Abrahamu mu maso ya bene Heti, ari na bo bahitaga ku irembo ry’umugi wabo. Nuko aravuga ati

¹¹«Shobuja, umva icyo nkubwira: uwo murima ndawuguhaye, n’ubuvumo burimo ndabuguhaye; mbiguhereye imbere y’umuryango wanjye. Hamba umuntu wawe.»

¹²Abrahamu arapfukama, yubika umutwe ku butaka imbere ya bene igihugu.

¹³Abwira Efuroni, bene igihugu bamwumva, ati «Ndakwinginze, umva icyo nkubwira: ndakwishyura igiciro cy’uwo murima; cyemere nkiguhe, mpambe umuntu wanjye.»

¹⁴Efuroni asubiza Abrahamu, ati

¹⁵«Shobuja, akarima kaguze amasikeli[73] magana ane ya feza kanteranye nawe? Genda uhambe umuntu wawe.»

¹⁶Abrahamu yumvikana na Efuroni, amupimira ifeza yavuze, bene Heti babireba, amasikeli magana ane ya feza, uko abacuruzi bayapimaga.

¹⁷Nuko umurima wa Efuroni wari i Makipela, ahareba i Mambure, wo n’ubuvumo burimo, n’ibiti byose byari biwuzitiye, biba ibya Abrahamu.

¹⁸Bemera ko biba ubukonde[74] bwe, byemererwa imbere ya bene Heti n’imbere y’abahitaga ku irembo ry’umugi bose.

¹⁹Nyuma y’ibyo, Abrahamu ahamba Sara[75] umugore we muri ubwo buvumo buri mu murima w’i Makipela, ahareba i Mambure; ni yo Heburoni mu gihugu cya Kanahani.

²⁰Nuko bene Heti barekera Abrahamu uwo murima n’ubuvumo buwurimo, ngo bimubere imbago yo guhambamo.