Read kinyarwanda Intangiriro 24 Bible Online

Intangiriro 24 - kinyarwanda bible

Intangiriro 24

¹Abrahamu yari umukambwe ageze mu zabukuru, kandi Uhoraho yari yaramuhaye umugisha muri byose.

²Abrahamu abwira umukuru mu bagaragu be wategekaga ibintu bye byose ati «Shyira ikiganza cyawe mu nsi y’ikibero[76] cyanjye,

³urahire Uhoraho, Imana y’ijuru n’isi, ko utazashakira umwana wanjye umugore mu bakobwa b’Abakanahani dutuyemo.

⁴Ahubwo uzajye mu gihugu cyanjye, mu bavandimwe banjye, abe ari ho ushakira umugore umuhungu wanjye Izaki.»

⁵Umugaragu aramubaza ati «Ahari wenda umugore ntazakunda kunkurikira muri iki gihugu. Nzajyane se umuhungu wawe mu gihugu waturutsemo?»

⁶Abrahamu ati «Uzirinde gusubizayo umwana wanjye.

⁷Uhoraho Imana y’ijuru yankuye mu nzu ya data no mu gihugu cyanjye navukiyemo; yarambwiye kandi arandahira ati ’Iki gihugu nzakigabira abazagukomokaho’; kandi ni we uzohereza umumalayika we akujye imbere, kugira ngo ubonere umugore umwana wanjye iyo ngiyo.

⁸Niba kandi umugore adashatse kugukurikira, uzaba ubaye umwere ku ndahiro wangiriye. Ariko ntuzasubize umuhungu wanjye iyo ngiyo.»

⁹Nuko wa mugaragu ashyira ikiganza cye mu nsi y’ikibero cya shebuja Abrahamu, maze arabimurahira.

¹⁰Umugaragu yenda ingamiya cumi mu za shebuja, afata ibyiza mu bintu shebuja yari atunze, aragenda. Nuko arahaguruka yerekeza mu ntara ya Aramu yo hagati y’inzuzi ebyiri, mu mugi wa Nahori.

¹¹Abyagiza ingamiya hirya y’umugi, hafi y’iriba; ubwo bwari bugorobye, nk’igihe abagore basohoka mu ngo bajya kuvoma.

¹²Nuko arasenga, ati «Uhoraho, Mana ya databuja, mpa guhura n’uwo nshaka, wereke databuja Abrahamu ubuntu bwawe.

¹³Dore mpagaze hafi y’iriba kandi abakobwa b’ino bagiye kuza kuvoma.

¹⁴Umukobwa nza kubwira nti ’Cisha bugufi ikibindi cya we ninywere amazi’, na we akansubiza ati ’Cyo nywa, ndetse ndakuhirira n’ingamiya’, azabe ari we wageneye umugaragu wawe Izaki, maze ibyo bizamenyeshe ko wagaragarije databuja Abrahamu ubuntu bwawe.»

¹⁵Akivuga ibyo, Rebeka aba asohotse mu mugi. Yari umukobwa wa Betuweli, mwene Milika muka Nahori murumuna wa Abrahamu. Nuko aza atwaye ikibindi ku rutugu.

¹⁶Uwo mukobwa akaba mwiza cyane, kandi yari akiri isugi, nta mugabo wari waramumenye. Amanuka mu iriba, yuzuza ikibindi arazamuka.

¹⁷Umugaragu yirukanka amusanga, aramubwira ati «Niba ubishaka, reka ninywere intama ku mazi yo mu kibindi cyawe.»

¹⁸Umukobwa arasubiza ati «Cyo nywa, shobuja.» Maze ako kanya acisha bugufi ikibindi, amuha amazi yo kunywa.

¹⁹Amaze kumuha icyo anywa, aravuga ati «Ngiye kuvomera n’ingamiya zawe, na zo nzuhire kugeza ubwo zishira inyota.»

²⁰Aranguriza bwangu ikibindi mu kibumbiro, yongera kwirukankira ku iriba kugira ngo avome, maze avomera ingamiya zose.

²¹Nyamugabo yamurebaga yicecekeye, yibaza niba Uhoraho yamugejeje cyangwa se atamugejeje ku cyo yifuzaga.

²²Igihe ingamiya zimaze kunywa, wa mugabo afata impeta ya zahabu y’uburemere bw’igice cy’isikeli, arayimwambika, naho ku maboko amwambika ibitare bya zahabu y’uburemere bw’amasikeli cumi.

²³Nuko aramubaza ati «Uri umukobwa wa nde? Bimbwire ndabigusabye.» Arongera ati «Ese hari umwanya waboneka kwa so ngo tujye kurarayo?»

²⁴Rebeka aramusubiza ati «Ndi umukobwa wa Betuweli, umuhungu Milika yabyariye Nahori.»

²⁵Ati «Iwacu hari isaso n’ubwatsi bwinshi, hari n’umwanya w’icumbi.»

²⁶Nuko umugabo arapfukama yubika umutwe ku butaka, aramya Uhoraho,

²⁷avuga ati «Nihasingizwe Uhoraho, Imana ya databuja Abrahamu, We utamuhishe ineza n’ubuntu bwe: kuko Uhoraho yanyoboye inzira ijya ku bavandimwe ba databuja.»

²⁸Umukobwa yiruka ajya kubwira nyina ibyo yari amaze kubona.

²⁹Rebeka yari afite musaza we akitwa Labani. Labani uwo arasohoka, yiruka bwangu, asanga wa mugabo ku iriba.

³⁰Yari yabonye impeta n’ibitare[77] mushiki we yari yambaye, amaze no kumva mushiki we Rebeka avuga uko uwo mugenzi yamuvugishije, niko kumusanganira ku iriba aho yari ahagaze iruhande rw’ingamiya ze.

³¹Aramubwira ati «Ngwino, muhire w’Uhoraho. Kuki waheze hanze, kandi inzu nayitunganije, hari n’ikiraro cy’ingamiya?»

³²Uwo mugabo aza mu rugo, ingamiya azikuraho imitwaro yazo. Baziha ubwatsi, baziha icyarire, naho we n’abari bamuherekeje babaha amazi yo koga ibirenge.

³³Baramufungurira, ariko aranga ati «Simfungura ntaravuga icyo ngomba kuvuga.» Labani ati «Ngaho kivuge.»

³⁴Ati «Ndi umugaragu wa Abrahamu.

³⁵Uhoraho yasendereje imigisha kuri databuja. Yamugize umuntu ukomeye cyane. Yamuhaye amatungo magufi n’amaremare, amuha feza na zahabu, amuha abagaragu n’abaja, amuha ingamiya n’indogobe.

³⁶Na Sara, umugore wa databuja, igihe yari ageze mu zabukuru yamubyariye umuhugu, none yamuraze ibyo atunze byose.

³⁷Databuja yandahiye iyi ndahiro ati ’Umwana wanjye ntuzamushakire umugore mu gihugu cy’Abakanahani dutuyemo.’

³⁸Ati ’Ahubwo uzajye mu muryango wanjye, mu nzu ya data, uzabe ari ho umumushakira.’

³⁹Nabwiye databuja nti ’Wenda uwo mugore ntazemera kunkurikira.’

⁴⁰Maze aransubiza ati ’Uhoraho mpora ngenda imbere azakoherereza umumalayika, azakugeza ku cyo ushaka: uzabonere umuhungu wanjye umugore wo mu muryango wanjye no mu nzu ya data.

⁴¹Numara kugera mu muryango wanjye, umuvumo wanjye ntuzaba ukikokamye. Nibanamukwima nabwo, uzaba ubaye umwere.’

⁴²Uyu munsi nageze ku iriba ndavuga nti ’Uhoraho, Mana ya databuja Abrahamu, niba urugendo ndimo warugize ruhire,

⁴³dore ndi ku iriba, ngusabye ibi: umukobwa uza gusohoka aje kuvoma, nkaza kumubwira nti: Niba ubishaka reka ninywere utuzi two mu kibindi cyawe,

⁴⁴maze akansubiza ati: Cyo nywa ubwawe, kandi ndavomera n’ingamiya zawe, azabe ari we mugore Uhoraho yageneye mwene databuja.’

⁴⁵Mbaye ntararangiza kwibwira ibyo, Rebeka aba arasohotse, atwaye ikibindi ku rutugu. Amanuka ajya ku iriba, maze aravoma. Ndamubwira nti ’Mpa icyo kunywa niba ubishaka.’

⁴⁶Ako kanya acisha bugufi ikibindi arambwira ati ’Cyo nywa, kandi nduhira n’ingamiya zawe.’ Nanyoye kandi yuhira n’ingamiya zanjye.

⁴⁷Namubajije nti ’Uri umukobwa wa nde?’ Ati ’Ndi umukobwa wa Betuweli, umuhungu Milika yabyariye Nahori.’ Nuko mperako mwambika impeta ku zuru, mwambika n’ibitare ku maboko.

⁴⁸Hanyuma ndapfukama ndamya Uhoraho, nubitse umutwe ku butaka, kandi nsingiza Uhoraho Imana ya databuja Abrahamu yanyoboye mu nzira kugira ngo mbonere umuhungu we umugeni, umukobwa wa murumuna wa databuja.

⁴⁹None rero nimushaka kugirira databuja ubuntu n’ineza, ntimunderege, mumbwire. Nimutabyemera na bwo, mubimenyeshe, maze njye iburyo cyangwa se ibumoso.»

⁵⁰Labani na Betuweli barasubiza bati «Ibyo biturutse kuri Uhoraho, nta cyo twashobora kubikubwiraho, ari icyiza ari ikibi.

⁵¹Dore Rebeka ari imbere yawe, mujyane maze abe umugore w’umuhungu wa shobuja, nk’uko Uhoraho abivuze.»

⁵²Umugaragu wa Abrahamu yumvise ayo magambo yubika umutwe ku butaka, imbere y’Uhoraho.

⁵³Hanyuma azana feza, azana zahabu n’imyenda, abiha Rebeka; aha na musaza we, na nyina, ibintu by’igiciro[78] kinini.

⁵⁴We n’abo bazanye bararya baranywa, bararara. Bukeye mu gitondo, bamaze kubyuka arababwira ati «Nimunsezerere, nsubire kwa databuja.»

⁵⁵Musaza w’umukobwa na nyina baramusubiza bati «Umukobwa nagume hano hamwe natwe iminsi mike, mbese nk’iminsi icumi, hanyuma azabone kugenda.»

⁵⁶Arabasubiza ati «Mwintinza kuko Uhoraho yampaye urugendo ruhire, nimundeke ngende nsubire kwa databuja.»

⁵⁷Bati «Duhamagare umukobwa noneho, tumubaze icyo atekereza.»

⁵⁸Nuko bahamagara Rebeka, baramubaza bati «Urashaka kujyana n’uyu mugabo?» Arabasubiza ati «Turajyana.»

⁵⁹Nuko bareka umwana wabo Rebeka aragenda, hamwe n’umuja wamureze, n’umugaragu wa Abrahamu n’abantu be.

⁶⁰Rebeka bamuha umugisha baramubwira bati «Mushiki wacu, urabe umubyeyi w’ibihumbi n’agahumbagiza; urubyaro rwawe ruzigarurire amarembo y’abanzi rubahashye.»

⁶¹Rebeka n’abaja be barahaguruka, burira ingamiya, bakurikira umugaragu wa Abrahamu. Nuko uwo mugabo afata Rebeka baragenda.

⁶²Ku kagoroba, Izaki aza aturutse ku iriba rya Lahayi‐Royi. Icyo gihe yari atuye mu ntara ya Negevu.

⁶³Nuko kuri uwo munsi mu kabwibwi, ajya gutembera mu gasozi; ngo yubure amaso, abona ingamiya ziraje.

⁶⁴Rebeka na we yubuye amaso, arabukwa Izaki, yururuka ku ngamiya.

⁶⁵Abaza umugaragu wa Abrahamu, ati «Uriya mugabo uri ku musozi uje atugana ni nde?» Umugaragu ati «Ni databuja.» Ako kanya Rebeka yenda igitambaro cyo mu mutwe aritwikira.

⁶⁶Umugaragu atekerereza Izaki ibyo yari yarakoze byose.

⁶⁷Izaki yinjiza Rebeka mu ihema rye. Izaki arongora Rebeka, amubera umugore. Aramukundwakaza, na we amuhoza urupfu rwa nyina Sara.