Read kinyarwanda Intangiriro 25 Bible Online

Intangiriro 25 - kinyarwanda bible

Intangiriro 25

¹Abrahamu ashaka undi mugore witwaga Ketura.

²Amubyarira Zimurani, Yokishani, Medani, Madiyani, Yishibaki na Shuwa.

³Yokishani abyara Sheba na Dedani. Bene Dedani rero ni Abashuru, Abaletushi, Abalewumi.

⁴Bene Madiyani ni Eyifa, Eferi, Hanoki, Abida na Elida. Abo bose babyawe na Ketura.

⁵Abrahamu araga Izaki ibyo yari atunze byose.

⁶Ariko abana b’inshoreke na bo abagabira akiriho, hanyuma abohereza mu gihugu cy’iburasirazuba, kure ya Izaki.

⁷Dore rero umubare w’imyaka Abrahamu yarambye ku isi: ni ijana na mirongo irindwi n’itanu.

⁸Hanyuma Abrahamu arapfa. Yari ageze mu zabukuru asaza neza, asanga abakurambere be[79].

⁹Abahungu be, Izaki na Ismaheli bamushyingura muri bwa buvumo bw’i Makipela, buri mu murima wa Efuroni, mwene Sohari w’Umuheti, uwo murima ukaba ahareba i Mambure.

¹⁰Ni wo murima Abrahamu yari yaraguze na bene Heti. Ni ho bahambye Abrahamu n’umugore we Sara.

¹¹Abrahamu amaze gupfa, Imana iha umugisha Izaki umuhungu we. Izaki yari atuye hafi y’iriba rya Lahayi‐Royi.

¹²Dore urubyaro rwa Ismaheli mwene Abrahamu, uwo Umunyamisirikazi Hagara, umuja wa Sara, yabyaranye na Abrahamu.

¹³Dore amazina ya bene Ismaheli, ukurikije ibisekuru byabo: Imfura ya Ismaheli ni Nebayoti, hagataho Kedari, Adibyeli, Mibusamu,

¹⁴Mishuma, Duma, Masa,

¹⁵Hadadi, Tema, Yeturi, Nafishi na Kedima.

¹⁶Abo ni bo bene Ismaheli, ngayo amazina yabo, akurikije insisiro n’ingando zabo. Bari bafite abatware cumi na babiri nk’uko imiryango yabo yanganaga.

¹⁷Imyaka Ismaheli yaramye ni ijana na mirongo itatu n’irindwi, hanyuma arapfa, asanga abakurambere be.

¹⁸Abayismaheli batura kuva i Havila, kugeza i Shuru, ahateganye na Misiri na Ashuru. Bityo babona aho batura hatari muri bene Abrahamu bandi.

¹⁹Dore ibisekuru bya Izaki, mwene Abrahamu. Abrahamu yabyaye Izaki.

²⁰Izaki yari amaze imyaka mirongo ine avutse, igihe ashatse Rebeka umukobwa wa Betuweli, Umwaramu wari utuye mu kibaya cya Aramu; akaba na mushiki wa Labani, Umwaramu.

²¹Izaki yambaza Uhoraho kuko umugore we yari ingumba. Uhoraho aramwumva, Rebeka asama inda.

²²Abana bataravuka babyiganiraga mu nda ye; aravuga ati «Kuki ari jyewe ibi bibayeho?» Nuko ajya guhanuza Uhoraho.

²³Uhoraho aramusubiza ati «Inda yawe irimo amahanga abiri; mu bura bwawe hazasohoka amoko abiri. Ubwoko bumwe buzarusha ubundi amaboko; umukuru akazaba umugaragu w’umuto.»

²⁴Igihe cye cyo kubyara kigeze, asanga koko ko yari atwite babiri.

²⁵Gakuru avuka ari ikigina, afite ubwoya umubiri wose nk’uruhu rw’igikoko, ni ko kumwita Ezawu (ari byo kuvuga Cyoya).

²⁶Hakurikiraho Gatoya, aza afashe agatsinsino ka Ezawu. Bamwita Yakobo. Bavutse, ise Izaki afite imyaka mirongo itandatu.

²⁷Abahungu barakura. Ezawu aba umuhigi wabuhiriye, akiruka imisozi. Yakobo yari umuntu utuje, akigumira mu mahema.

²⁸Izaki yakundaga Ezawu, kuko umuhigo we wamuryoheraga; Rebeka we akikundira Yakobo.

²⁹Umunsi umwe Ezawu ahiguka ananiwe cyane, nuko asanga Yakobo atetse ikinyiga.

³⁰Ezawu abwira Yakobo, ati «Mpa ndye kuri icyo kinyiga cy’ikigina, kuko ndembye.» Ni cyo cyatumye bamwita Edomu (ari byo kuvuga ikigina).

³¹Yakobo ati «Keretse tukiguze ubutware[80] bwawe uhabwa no kuba imfura ya data!»

³²Ezawu ati «Ubundi se ko ngiye gupfa, ubutware bumariye iki?»

³³Yakobo aramubwira ati «Ngaho birahire nonaha!» Ezawu ahera ko arabimurahira, agura na Yakobo ubutware bwe.

³⁴Nuko Yakobo aha Ezawu umugati amuha n’ikinyiga cy’inkori. Ezawu ararya aranywa, arahaguruka aragenda. Nguko uko Ezawu yasuzuguye ubutware bwe, yakeshaga kuba ari we mfura ya se.