Read kinyarwanda Intangiriro 29 Bible Online

Intangiriro 29 - kinyarwanda bible

Intangiriro 29

¹Yakobo arahaguruka, yerekeza mu gihugu cya Kedemu iburasirazuba.

²Aragenda aza kugera ku iriba riri mu rwuri. Hafi yaryo hari habyagiye imikumbi itatu y’intama, kuko kuri iryo riba ari ho buhiraga amatungo. Ibuye rinini ryatwikiraga iryo riba.

³Iyo amatungo yose yamaraga kuhateranira, basunikaga ibuye, bagapfundura iriba, bakayuhira, hanyuma bagasubiza ibuye mu mwanya waryo, ku rugara rw’iriba.

⁴Yakobo arababaza ati «Bavandimwe, muri aba hehe?» Bati «Turi abo kuri Harani.»

⁵Ati «Mbese Labani wa Nahori muramuzi?» Bati «Turamuzi.»

⁶Ati «Araho?» Baramusubiza bati «Araho, ndetse dore n’umukobwa we Rasheli araje azanye amatungo.»

⁷Yakobo arababwira ati «Haracyari ku manywa y’ihangu. Igihe cyo gukoranya amatungo ntikiragera, nimuyuhire, mugende muyaragire.»

⁸Baramusubiza bati «Nta bwo tubishobora, amatungo yose ataraterana, ngo bakureho ibuye ritwikiriye iriba. Ubwo ni bwo tuza kuhira.»

⁹Akivugana na bo, Rasheli aba arahageze ashoreye intama za se, kuko yari umushumba.

¹⁰Yakobo abonye Rasheli, umukobwa wa Labani ari we nyirarume, abonye n’intama za Labani nyirarume, ako kanya ahirika rya buye ritwikiriye iriba, yuhira intama za Labani, nyirarume.

¹¹Hanyuma Yakobo ahobera Rasheli, araturika ararira.

¹²Yakobo abwira Rasheli ko ari uwo mu muryango wa se, akaba umuhungu wa Rebeka. Rasheli yiruka ajya kubimenyesha se.

¹³Labani yumvise yuko ari Yakobo, umuhungu wa mushiki we uje, ni ko kumusanganira n'ingoga. Nuko aramuhobera aramusoma, amwinjiza iwe. Yakobo atekerereza Labani ibyabaye byose.

¹⁴Labani aramubwira ati «Ni ukuri, uri igufwa ryanjye n’umubiri wanjye[89].» Nuko Yakobo amara kwa Labani ukwezi kose.

¹⁵Labani abwira Yakobo ati «Ese uzankorera ku buntu ngo ni iki uri umuvandimwe wanjye? Mbwira rwose icyo nzajya nguhemba.»

¹⁶Labani akaba yari afite abakobwa babiri: umukuru akitwa Leya, umuto akitwa Rasheli.

¹⁷Leya yari afite mu maso habi, naho Rasheli akaba yari mwiza wese, akagira mu maso heza.

¹⁸Yakobo yikundiraga Rasheli. Abwira Labani ati «Nzagukorera imyaka irindwi, maze uzampe Rasheli umukobwa wawe muto.»

¹⁹Labani ati «Koko ikiruta ni uko namukwihera aho kumuha undi: igumire iwanjye.»

²⁰Nuko Yakobo akorera Labani imyaka irindwi yose, ashaka Rasheli. Ariko iyo myaka imubera nk’iminsi mike, kuko yamukundaga.

²¹Nyuma Yakobo abwira Labani ati «Nshyingira, kuko iminsi nagombaga kurangiza yuzuye ndashaka kubana n’umugore wanjye.»

²²Labani atumiza abantu bose b’aho, arabakoranya, bagira umunsi mukuru ukomeye wo gusangira.

²³Bugorobye, afata umukobwa we Leya, amujyana kwa Yakobo, ngo amurongore.

²⁴Labani aha umukobwa we Leya umwe mu baja be witwaga Zilipa, ngo ajye amukorera.

²⁵Ngo bucye, Yakobo atangazwa n’uko ari Leya bari bamuhaye[90]! Ni ko kubwira Labani ati «Wangenjeje ute? Sinagukoreye ngo umpe Rasheli? Wanshukiye iki[91]?»

²⁶Labani aramusubiza ati «Mu muco wacu, ntibashyingira umukobwa muto mbere ya mukuru we.

²⁷Banza urangize icyumweru cy’ubukwe hamwe na Leya, hanyuma n’undi tuzamuguhera indi myaka irindwi uzankorera.»

²⁸Yakobo abigenza atyo. Arangiza icyumweru cy’ubukwe hamwe na Leya, nuko Labani amushyingira na Rasheli, umukobwa we.

²⁹Labani aha umukobwa we Rasheli umwe mu baja be, witwaga Biliha, ngo ajye amukorera.

³⁰Yakobo arongora Rasheli[92], ndetse yamukundaga kuruta Leya. Arongera akorera Labani indi myaka irindwi.

³¹Uhoraho abonye ko Leya yabaye intabwa, amuha kubyara, naho Rasheli akomeza kuba ingumba.

³²Leya asama inda, abyara umwana w’umuhungu amwita Rubeni (bisobanura ngo ’Uhoraho yabonye agahinda kanjye’), ati «Ubu noneho umugabo wanjye agiye kunkunda.»

³³Ashubijeho abyara undi muhungu. Ati «Uhoraho yumvise ko ntakunzwe, none ampaye n’uyu nguyu.» Amwita Simewoni (bisobanura ngo ’Uhoraho yaranyumvise.’)

³⁴Yongera gusama, abyara na none umuhungu. Aravuga ati «Noneho umugabo wanjye azanyegukira, kuko mubyariye abahungu batatu.» Ni yo mpamvu yamwise Levi (bisobanura ngo ’Azanyegukira’.)

³⁵Arongera asama indi nda, abyara umwana w’umuhungu. Aravuga ati «Ubu ndasingiza Uhoraho!» Ni cyo cyatumye amwita Yuda (bisobanura ngo ’Nzasingiza’.) Nuko aracura.