Read kinyarwanda Intangiriro 30 Bible Online

Intangiriro 30 - kinyarwanda bible

Intangiriro 30

¹Rasheli abonye ko atabyariye Yakobo, agirira mukuru we ishyari; abwira Yakobo ati «Mpa kubyara, nibyanga mpfe!»

²Yakobo arakarira Rasheli, aramubwira ati «Mbese ndi mu cyimbo cy’Imana yazibye inda yawe?»

³Rasheli ati «Dore umuja wanjye Biliha; musange azambyarire ku bibero[93], nanjye ngire urubyaro.»

⁴Amuha Biliha, umuja we, ho umugore. Yakobo aramutunga.

⁵Biliha asama inda, abyarira Yakobo umwana w’umuhungu.

⁶Rasheli ariyamira ati «Imana yanciriye urubanza neza, kandi yumvise ijwi ryanjye; none impaye umwana!» Ni cyo cyatumye amwita Dani (bisobanura ngo ’Ni Yo Mucamanza wanjye’.)

⁷Biliha, umuja wa Rasheli, nanone asama inda, abyara umwana w’umuhungu.

⁸Rasheli ati «Narwanye intambara ikomeye na mwene data, none ndatsinze!» Nuko amwita Nefutali (bisobanura ngo «Nararwanye».)

⁹Leya abonye ko atakibyara, umuja we Zilipa amwegurira Yakobo.

¹⁰Zilipa, umuja wa Leya, abyarira Yakobo umwana w’umuhungu.

¹¹Leya ariyamira ati «Mbega umugisha!» Umwana amwita Gadi (bisobanura ngo ’Umugisha’.)

¹²Zilipa, umuja wa Leya, nanone abyarira Yakobo umwana w’umuhungu.

¹³Leya ati «Ngize amahirwe! Kandi abakobwa bose bazanyita umuhire.» Umwana amwita Asheri (bisobanura ngo ’Muhire’.)

¹⁴Igihe cy’isarura ry’ingano Rubeni ajya mu mirima, abona imbuto zitwa ’iz’urukundo’[94], azizanira nyina Leya. Rasheli abwira Leya ati «Ndakwinginze, mpa izo mbuto z’urukundo umuhungu wawe yakuzaniye.»

¹⁵Leya aramusubiza ati «Ese ntibyaguhagije kuba warantwaye umugabo, none urashaka no kuntwara n’imbuto z’urukundo nazaniwe n’umwana wanjye?» Rasheli aravuga ati «Noneho iri joro murarane! Bibe igihembo cy’imbuto z’urukundo umwana wawe yazanye.»

¹⁶Nimugoroba Yakobo araza, avuye mu mirima. Leya aramusanganira ati «Iri joro uragomba kundaza; kuko ari ko nabyumvikanyeho na murumuna wanjye watwaye imbuto z’urukundo nazaniwe n’umwana wanjye.» Nuko Yakobo ararana na Leya iryo joro.

¹⁷Imana yumva Leya, arasama, abyara umwana w’umuhungu wa gatanu.

¹⁸Leya ariyamira ati «Imana yampaye ibihembo byanjye, kuko umugabo wanjye namuhaye umuja wanjye.» Umwana amwita Isakari (bisobanura ngo ’Igihembo’.)

¹⁹Leya arongera asama inda, abyara undi mwana w’umuhungu wa gatandatu.

²⁰Ariyamira ati «Imana ingabiye neza! Noneho umugabo wanjye azanyubaha, kuko mubyariye abahungu batandatu.» Umwana amwita Zabuloni (bisobanura ngo ’Azanyubaha’.)

²¹Hanyuma Leya abyara umwana w’umukobwa, amwita Dina.

²²Imana iza kwibuka Rasheli; Imana iramwumva, na we imuha kubyara.

²³Asama inda, abyara umwana w’umuhungu. Ariyamirira ati «Imana inkijije ikimwaro!»

²⁴Umwana amwita Yozefu (bisobanura ngo ’Niyongere’), agira ati «Imana irakanyongereraho undi mwana w’umuhungu!»

²⁵Nuko Rasheli amaze kubyara Yozefu, Yakobo abwira Labani ati «Nsezerera ntahe, njye mu gihugu cyacu.

²⁶Mpa abana banjye n’abagore banjye, kuko nababonye ngukoreye, maze nigendere. Uzi neza imirimo yose narangirije iwawe.»

²⁷Labani aramubwira ati «Ubonye nagize ubutoni mu maso yawe! . . . Nahishuriwe ko Imana yampaye umugisha ku mpamvu yawe.»

²⁸Yungamo ati «Mbwira igihembo wifuza nzakiguhe.»

²⁹Yakobo ati «Uzi uko nagukoreye n’uko amatungo yawe yabaye meza nyaragira.

³⁰Kuko ayo wari ufite yari make ntaraza, none akaba yarororotse cyane. Uhoraho yaguhaye umugisha. Ubu se nzatangira ryari gukorera urugo rwanjye?»

³¹Labani ati «Nguhe iki?» Yakobo aramusubiza ati «Nta cyo! Ariko nungenzereza uko ngiye kukubwira, nzongera nkuragirire amatungo.

³²Uyu munsi ndanyura mu matungo yawe yose, nkuremo intama z’utugondo n’iz’amatobo[95] zose zishobora kubyara: ni zo zizaba igihembo cyanjye. No ku ihene nzabigenza ntyo.

³³Ejo nuza kureba igihembo cyanjye, izitazaba utugondo, cyangwa amatobo, uzazite inyibano; nuzisangamo nzaba ndi igisambo.»

³⁴Labani ati «Nemeye ko bizaba bityo.»

³⁵Uwo munsi nyine, Labani arobanura mu bushyo bwe ihene n’intama z’ibihuga, z’utugondo, n’iz’amatobo, yaba amapfizi cyangwa inyagazi zishobora kubyara. Nuko zose azishinga abahungu be,

³⁶abategeka kuzijyana kure ya Yakobo nk’urugendo rw’iminsi itatu. Yakobo we yaragiraga amatungo yasigaye mu bushyo bwa Labani.

³⁷Nuko Yakobo yenda udushami tubisi tw’ibiti by’amoko atatu, akuraho utugozi tw’igishishwa, ku buryo haboneka imirongo yera.

³⁸Hanyuma twa dushami adushyira imbere y’ibibumbiro, aho amatungo ashokera, ngo intama zitubone. Zaza kunywa, zikarinda.

³⁹Amapfizi n’inyagazi zakwimanyiriza imbere y’utwo dushami, bigatuma inyagazi zibyara utwana tw’ibihuga, tw’utugondo cyangwa tw’amatobo.

⁴⁰Yakobo akazirobanura. Akerekeza intama ku dushami dufite imirongo yera; nuko zamara kubyara, akibonera atyo umukumbi we bwite, ntawuvange n’amatungo ya Labani.

⁴¹Uko amatungo y’amajigija yarindaga, ni ko Yakobo yashyiraga udushami aho ashokera, kugira ngo yimanyirize imbere y’utwo dushami.

⁴²Ariko yaba mabi ntadushyireho, bigatuma amabi aba aya Labani, ameza akaba aya Yakobo.

⁴³Uwo mugabo agwiza amatungo cyane, agwiza abaja, abagaragu, ingamiya n’indogobe.