Read kinyarwanda Intangiriro 34 Bible Online

Intangiriro 34 - kinyarwanda bible

Intangiriro 34

¹Dina, umukobwa wa Leya yari yarabyaranye na Yakobo, yigeze gusohoka, ajya kugenderera abakobwa bo muri icyo gihugu.

²Sikemu mwene Hamori w’Umuhivi, igikomangoma cy’icyo gihugu, aramubona, aramufata, amusambanya ku ngufu.

³Nyuma ariko aza kumukunda koko, umutima we ugwa kuri Dina umukobwa wa Yakobo, amugaragariza urukundo rwe.

⁴Nuko abwira se Hamori ati «Nsabira uyu mwana ambere umugore.»

⁵Yakobo aza kumva ko Sikemu yononnye umukobwa we Dina. Ariko kuko abahungu be bari bahuye ubushyo ku gasozi, Yakobo araceceka kugeza igihe bacyuriye.

⁶Hagati aho, Hamori se wa Sikemu ajya kwa Yakobo baravugana.

⁷Bene Yakobo bamaze gucyura, bahita babyumva. Bararakara barabisha, kuko Sikemu yari yakoze ishyano aryamana n’umukobwa wa Yakobo, kandi bene ibyo bidakwiye gukorwa muri Israheli.

⁸Hamori arababwira ati «Umutima w’umuhungu wanjye Sikemu wigombye umukobwa wanyu, mubishatse mwamumuhaho umugore.

⁹Mbese dushyingirane: mudushyingire abakobwa banyu, namwe murongore abacu.

¹⁰Tuzaturane: igihugu kibe icyanyu namwe, mugiture, mugikungahariremo, mugitungiremo!»

¹¹Sikemu abwira se w’umukobwa na basaza be, ati «Icyampa nkabanyura mukandeba neza; icyo muzanca nzagitanga.

¹²Inkwano n’impano, igiciro n’ibijyana na cyo bindi bihanitse, mubince, nzabibaha uko muzaba mwabivuze, ariko mumpe uwo mukobwa ho umugeni!»

¹³Bene Yakobo basubiza Sikemu na se Hamori, ariko bavugisha uburiganya[103], kuko Sikemu yari yononnye mushiki wabo Dina.

¹⁴Barababwira bati «Ibyo ntidushobora kubigira, ntidushobora guha mushiki wacu umuntu utagenywe, byaba kwitukisha[104].

¹⁵Ikizatuma twemera, ni uko mwaba nka twe, mukagenya abahungu banyu bose.

¹⁶Ubwo ni bwo tuzabona kubashyingira, namwe mukadushyingira, tugaturana, tukaba umuryango umwe.

¹⁷Niba mutemeye ngo mwigenyeshe, umukobwa wacu turamubaka twigendere.»

¹⁸Ayo magambo ashimisha Hamori, n’umuhungu we Sikemu.

¹⁹Wa musore ntiyatindiganyije kubikora, kuko yari akunze umukobwa wa Yakobo. Uwo musore kandi yari umwe mu barusha abandi icyubahiro mu rugo rwa se.

²⁰Hamori na Sikemu umuhungu we baraza bahagarara ku irembo ry’umugi wabo; babwira abaturage b’aho, bati

²¹«Bariya bantu ni abanyamahoro. Nimureke bature mu gihugu cyacu, bagikungahariremo, na bo kibe icyabo. Abakobwa babo tuzabarongora, natwe tubashyingire abacu.

²²Ariko ikizatuma bemera ko duturana tukaba umuryango umwe, ni uko twagenya buri mwana w’umuhungu wacu nk’uko na bo babigenza.

²³Amatungo yabo n’ibyo batunze byose ubwo se ntibizaba ibyacu? Nitwemere dukore ibyo bifuza, maze duturane!»

²⁴Abahitaga ku irembo ry’umugi bose basohoka bumva ayo magambo ya Hamori na Sikemu umuhungu we; nuko ab’igitsinagabo bose baragenywa uko bahitaga ku irembo ry’umugi.

²⁵Ku munsi wa gatatu, abagenywe bakibirwaye, Simewoni na Levi bene Yakobo, basaza ba Dina, bakura inkota binjira muri Sikemu nta we ubakoma imbere, bica ab’igitsinagabo bose.

²⁶Bicisha ubugi bw’inkota Hamori na Sikemu, bavana Dina mu rugo rwa Sikemu, baramutahana.

²⁷Bene Yakobo binjira mu mugi baribata inkomere, barasahura, kuko mushiki wabo bari baramwononnye.

²⁸Banyaga amatungo magufi n’amaremare, bataretse indogobe, banyaga icyari mu mugi n’icyari mu gasozi cyose.

²⁹Umutungo waho barawutwara, bajyana utwana na ba nyina ho imbohe, n’amazu barayasahura.

³⁰Yakobo abwira Simewoni na Levi, ati «Mwanteye ibyago bikomeye, mujya kunteranya na bene igihugu, Abakanahani n’Abaperezi! Jye mfite abantu bake cyane; nibishyira hamwe bakantera, bazanesha, bantsembane n’umuryango wanjye wose.»

³¹Na bo baramusubiza bati «None se mushiki wacu bamugire ihabara?»