Read kinyarwanda Intangiriro 35 Bible Online

Intangiriro 35 - kinyarwanda bible

Intangiriro 35

¹Imana ibwira Yakobo, iti «Haguruka uzamuke ujye i Beteli, uhagume iminsi; maze Imana yakubonekeye igihe wahungaga mumuru wawe Ezawu, uyihubakire urutambiro.»

²Nuko Yakobo abwira urugo rwe n’abo babanaga bose ati «Muvaneho ibigirwamana[105] by’ibinyamahanga mufite, mwisukureihe wahungaga mukuru wawe, muhindure imyambaro.

³Maze duhaguruke tuzamuke i Beteli! Nzahubakira Imana urutambiro, yo yanyumvise mu minsi y’ibyago byanjye kandi ikaba kumwe nanjye mu rugendo nagenze.»

⁴Ibigirwamana by’ibinyamahanga bari bafite hamwe n’amaherena, byose babiha Yakobo, abihamba mu nsi ya cya giti cy’umushishi kiri hafi ya Sikemu.

⁵Nuko baragenda. Imana itera ubwoba bukabije mu migi ikikije Sikemu, ntihagira n’umwe ukurikirana abahungu ba Yakobo.

⁶Yakobo agera i Luzi ho mu gihugu cya Kanahani, ari yo Beteli; ahagerana n’abantu bose bari kumwe.

⁷Ahubaka urutambiro, aho hantu ahita ’Imana y’i Beteli’, kuko ari ho Imana yari yamubonekereye ahunga mukuru we.

⁸Debora wari warareze Rebeka arasaza, bamushyingura hepfo y’i Beteli, mu nsi y’igiti cy’umushishi; nuko icyo giti acyita ’Umushishi w’amarira’.

⁹Imana yongera kubonekera Yakobo aho aviriye mu kibaya cya Aramu, imuha umugisha.

¹⁰Imana iramubwira iti «Izina ryawe ryari Yakobo. Ariko ntibazongera kukwita Yakobo, izina ryawe rizaba Israheli!» Nuko imwita Israheli.

¹¹Imana irongera iti «Ndi Imana Nyir’ububasha. Wororoke ugwire, uzabyara umuryango, ndetse n’imiryango myinshi izagukomokaho, n’abami bazaguturukaho.

¹²Igihugu nahaye Abrahamu na Izaki ndakiguhaye, nzakigabira n’urubyaro rwawe.»

¹³Imana irazamuka imusiga aho bari bavuganiye.

¹⁴Yakobo ahashinga ibuye bukingi, arishinga nyine aho bari bavuganiye. Iryo buye arisukaho divayi, anarisigaho amavuta y’imizeti.

¹⁵Nuko Yakobo yita Beteli aho hantu yari yavuganiye n’Imana.

¹⁶Bava i Beteli, Rasheli abyara bashigaje urugendo ruto ngo bagere ku musozi wa Efurata. Abyara ariko bimuruhije.

¹⁷Muri ubwo bubabare, umubyaza aramubwira ati «Wigira ubwoba, ni umuhungu wongeye kubyara.»

¹⁸Yumvise agiye gushiramo umwuka, yenda gupfa, umwana amwita Benoni (bisobanura ngo ’Umwana w’ububabare bwanjye’.) Se w’umwana aranga, amwita Benyamini (bisobanura ngo ’Umwana w’amahirwe’.)

¹⁹Rasheli arapfa, bamuhamba hafi y’inzira ijya Efurata, ari yo Betelehemu.

²⁰Yakobo ashinga ibuye bukingi ku mva ye: ni ryo buye rishinze ryo ku mva ya Rasheli; riracyariho na n’ubu[106].

²¹Israheli arahava, ihema rye arishinga hakurya ya Migidalederi.

²²Igihe Israheli yari atuye muri iyo ntara, Rubeni aza kuryamana na Biliha, inshoreke ya se, Israheli arabimenya. Bene Yakobo bari cumi na babiri:

²³Leya yabyaye Rubeni, imfura ya Yakobo. Hanyuma abyara Simewoni, Levi, Yuda, Isakari na Zabuloni.

²⁴Rasheli yabyaye Yozefu na Benyamini.

²⁵Biliha umuja wa Rasheli yabyaye Dani na Nefutali.

²⁶Zilipa umuja wa Leya yabyaye Gadi na Asheri. Ngabo abahungu Yakobo yabyariye mu kibaya cya Aramu.

²⁷Yakobo agaruka kwa se Izaki i Mambure, hafi ya Kiriyati‐Haruba, ari yo Heburoni, aho Abrahamu na Izaki bari batuye mbere.

²⁸Izaki yamaze imyaka ijana na mirongo inani.

²⁹Hanyuma abona gupfa, asanga abakurambere. Yari ashaje cyane, ageze mu zabukuru. Abahungu be Ezawu na Yakobo baramutabariza, baramushyingura.