Read kinyarwanda Intangiriro 39 Bible Online

Intangiriro 39 - kinyarwanda bible

Intangiriro 39

¹Yozefu bamujyana mu Misiri. Potifari, Umunyamisiri, umukone wa Farawo watwaraga abarinzi be, amugura n’Abayismaheli bari bamujyanyeyo.

²Uhoraho yari kumwe na Yozefu; agira ukuboko kwiza, aba umunyanzu wa shebuja, uwo Munyamisiri.

³Shebuja abona ko Uhoraho yari kumwe na Yozefu, kuko ibyo yakoraga byose byamuhiraga.

⁴Yozefu aratona cyane. Potifari amugira umugaragu we, ndetse amuha ubutware mu by’urugo, amushinga ibyo yari atunze byose.

⁵Amaze kumugira umutware w’iby’urugo, no kumushinga ibyo yari atunze byose, Uhoraho aha umugisha urugo rw’uwo Munyamisiri, agirira Yozefu; umugisha w’Uhoraho ukwira ibye byose, urugo n’imirima.

⁶Ashinga Yozefu ibyo atunze byose, ntiyagira icyo yongera kugenzura, uretse kwita ku byo yaryaga! Yozefu yari mwiza wese, akagira mu maso heza.

⁷Bukeye umugore wa shebuja areba Yozefu, aramubenguka; aramubwira ati «Turyamane.»

⁸We aranga, ahubwo abwira nyirabuja, ati «Dore databuja nta cyo akingenzuraho, ndetse yanshinze n’ibyo atunze byose.

⁹Uru rugo ntarundutamo, nta cyo ajya anyima, uretse wowe, kuko uri umugore we. None nashobora nte gukora ishyano nk’iryo, ngacumura ku Mana?»

¹⁰N’ubwo nyirabuja yabimubwiraga buri munsi ngo baryamane basambane, Yozefu yanga kumwumva.

¹¹Umunsi umwe Yozefu yinjira mu nzu gukora imirimo ye, nta n’umwe mu bantu bo mu rugo wari aho.

¹²Uwo mugore amufata umwenda, aramubwira ati «Turyamane!» Yozefu amurekera umwenda, ahunga asohoka.

¹³Umugore abonye amusigiye umwenda mu ntoki agahunga asohoka,

¹⁴ahamagara abantu bo mu rugo, arababwira ati «Nimurore! Batuzanyemo Umuhebureyi, umugabo w’inkubaganyi! Yanyegereye ngo turyamane, ntera hejuru, mvuza induru.

¹⁵Yumvise nteye hejuru, ata umwambaro we iruhande rwanjye, arahunga, arasohoka.»

¹⁶Nuko umwenda wa Yozefu awurambika iruhande rwe, kugeza igihe umugabo we atahiye.

¹⁷Aje amubwira kwa kundi, ati «Wa mugaragu w’Umuhebureyi watuzaniye, yanteye ngo ankinishe.

¹⁸Ariko yumvise nteye hejuru, ata umwambaro we iruhande rwanjye, arahunga, arasohoka.»

¹⁹Shebuja yumvise amagambo umugore we amubwiye, agira ati «Ngibyo iby’umugaragu wawe yangiriye», uburakari bwe buragurumana.

²⁰Shebuja wa Yozefu aramufata, amuta mu buroko, ahafungirwaga imbohe z’umwami. Nuko Yozefu aguma mu buroko.

²¹Ariko Uhoraho aba kumwe na Yozefu, impuhwe ze zimwururukiraho, amuhesha ubutoni mu maso y’umutware w’uburoko.

²²Uwo mutware aha Yozefu gutegeka abanyururu bose bari mu buroko. Ibyo bahakoreraga byose, ni we wabikoreshaga.

²³Umutware w’uburoko ntiyagira ikindi yongera kugenzura mu byo yari yamushinze, kuko Uhoraho yari kumwe na Yozefu. Uhoraho agahora amuha kugira ukuboko kwiza, mu byo yakoraga byose.