Read kinyarwanda Intangiriro 40 Bible Online

Intangiriro 40 - kinyarwanda bible

Intangiriro 40

¹Nyuma y’ibyo, umunyanzoga wa Misiri, n’umutetsi w’imigati bacumura kuri shebuja, umwami wa Misiri.

²Farawo arakarira cyane ibyo byegera bye, umutetsi mukuru w’imigati n’umunyanzoga mukuru, uko ari babiri.

³Abafungira mu nzu y’umutware w’abarinda umwami, mu buroko nyirizina aho Yozefu yari afungiye.

⁴Umutware w’abarinda umwami abashinga Yozefu, ngo abakorere. Umunyanzoga n’umutetsi w’imigati b’umwami wa Misiri bamara igihe bafungiye muri ubwo buroko.

⁵Bombi baza kurota inzozi, umwe ku buryo bwe undi ku bwe, ariko mu ijoro rimwe, kandi izo nzozi zari zifite ibisobanuro binyuranye.

⁶Bukeye mu gitondo, Yozefu abasanga aho bari, abona bashavuye.

⁷Ni ko kubaza ibyegera bya Farawo byari bifunganywe na we mu nzu kwa shebuja, ati «Ni kuki uyu munsi noneho mwijimye?»

⁸Nuko baramusubiza bati «Twarose, tubura uwadusobanurira inzozi.» Yozefu arababwira ati «Imana se si yo yonyine ishobora gusobanura inzozi? Ngaho nimuntekerereze uko mwarose.»

⁹Umunyanzoga mukuru arotorera Yozefu inzozi ze, ati «Narose umuzabibu ushinze imbere yanjye.

¹⁰Kuri uwo muzabibu hari amashami atatu. Mbona urapfunditse urarabya, imbuto zirera.

¹¹Igikombe cya Farawo nari ngifite mu ntoki, nenda imbuto z’imizabibu nzikamuriramo, mpereza Farawo.»

¹²Yozefu aramubwira ati «Dore uko zisobanurwa. Amashami atatu ni iminsi itatu.

¹³Nihashira iminsi itatu Farawo azakunamura, weguke agusubize ubutware bwawe, wongere ujye guhereza Farawo igikombe cya divayi nk’uko wahoze ubigira.

¹⁴Numara kugira amahirwe, uzibuke ko twabanye: uzangirire ubuntu maze umpakirwe kuri Farawo, ankure muri iyi nzu ndimo.

¹⁵Kuko bankuye mu gihugu cy’Abahebureyi. N’aha ndi, nta cyaha nakoze kugira ngo bamfungire mu buroko.»

¹⁶Umutetsi mukuru w’imigati abonye ko Yozefu yasobanuriye undi inzozi ze neza, na we aramubwira ati «Jyeweho narose nikoreye inkangara eshatu z’imigati y’ifu yera.

¹⁷Mu nkangara yo hejuru, harimo amoko menshi y’utugati Farawo akunda kurya. Ariko inyoni zikaza, zikaturira mu nkangara nari nikoreye.»

¹⁸Yozefu aramubwira ati «Dore igisobanuro: Inkangara eshatu ni iminsi itatu.

¹⁹Nihashira iminsi itatu Farawo azakunamura; ariko azunamura umutwe wawe, akumanike ku giti, maze inyoni zikurye!»

²⁰Nuko hashize iminsi itatu, ku munsi bibukagaho ivuka rye, Farawo agirira abagaragu be bose ibirori n’isangira. Ubwo yibuka umunyanzoga mukuru n’umutetsi mukuru w’imigati, yunamura umutwe wabo.

²¹Umunyanzoga mukuru, Farawo amusubiza ku murimo we, yongera kujya ahereza Farawo igikombe cye;

²²naho umutetsi mukuru w’imigati, aramumanika. Biba nk’uko Yozefu yari yasobanuye inzozi zabo.

²³Ariko wa munyanzoga mukuru ntiyibuka Yozefu, ahubwo aramwibagirwa.