Read kinyarwanda Intangiriro 41 Bible Online

Intangiriro 41 - kinyarwanda bible

Intangiriro 41

¹Imyaka ibiri ihise, Farawo na we aza kurota. Arota ahagaze ku ruzi rwa Nili;

²abona inka ndwi nziza zibyibushye zitumburuka ziva muri Nili, zitangira kurishiriza mu rufunzo.

³Hanyuma haza izindi ndwi zizikurikiye na zo ziva muri Nili: zo zari umwaku, zinanutse. Zihagarara iruhande rw’izindi ku nkombe y’Uruzi.

⁴Nuko za nka ndwi zinanutse zadukira za zindi ndwi nziza zibyibushye, ziraziyongobeza. Farawo aribambura.

⁵Arongera aribikira, arota ubwa kabiri, ngo amahundo arindwi yera ku giti kimwe, ahunze neza, aryoheye ijisho.

⁶Maze andi mahundo arindwi y’iminambe, yumishijwe n’umuyaga uturuka iburasirazuba, akurikiraho, arakura.

⁷Ayo mahundo y’iminambe amira ya mahundo ahunze neza, atsitse uko ari arindwi. Farawo aribambura amenya ko zari inzozi.

⁸Mu gitondo Farawo yari yakutse umutima, ahamagaza abapfumu n’abacurabwenge[114] bose bo mu Misiri. Farawo abarotorera inzozi ze, ariko ntihagira n’umwe ushobora kuzimusobanurira.

⁹Ubwo umunyanzoga mukuru abwira Farawo, ati «Uyu munsi ngiye kwirega icyaha cyanjye.

¹⁰Farawo yari yarakariye abagaragu be, maze amfungira mu nzu y’umutware w’abamurinda, jyewe n’umutetsi mukuru w’imigati.

¹¹Tuza kurota mu ijoro rimwe, we nanjye turota inzozi zifite ibisobanuro binyuranye.

¹²Twari kumwe n’umusore w’Umuhebureyi, akaba umugaragu w’umutware w’abarinzi. Tumutekerereza inzozi zacu, arazisobanura; agenda asobanurira buri muntu inzozi ze.

¹³Biza kutugendekera nk’uko yari yabidusobanuriye: jye banshubije ku murimo wanjye w’ubuhereza, we baramumanika.»

¹⁴Farawo aherako atumiza Yozefu. Bihutira kumukura mu buroko. Baramwogosha, ahindura imyambaro, yitaba Farawo.

¹⁵Farawo abwira Yozefu, ati «Narose, maze mbura uwansobanurira inzozi. Nyamara ariko numvise ko ngo inzozi bajya bakurotorera, ushobora kuzisobanura!»

¹⁶Yozefu abwira Farawo, ati «Si jye, ni Imana iri busubize Farawo ijambo ry’amahoro.»

¹⁷Farawo abwira Yozefu, ati «Narose mpagaze ku nkombe y’uruzi rwa Nili.

¹⁸Ngiye kubona, mbona muri Nili hatumburutsemo inka ndwi nziza zibyibushye, zirishiriza mu rufunzo.

¹⁹Nyuma zikurikirwa n’izindi ndwi mbi, zinanutse, zazonzwe. Sinigeze mbona inka mbi nk’izo, mu gihugu cyose cya Misiri.

²⁰Izo nka mbi kandi zinanutse zimiragura za zindi ndwi za mbere nziza zibyibushye.

²¹Zinjira mu nda zazo; nyamara ntawari kumenya ko zinjiye mu gifu cyazo, kuko zakomeje kuba mbi nka mbere. Ubwo ndibambura.

²²Ndongera mbona nanone mu nzozi amahundo arindwi yera ku giti kimwe, ahunze neza, aryoheye ijisho.

²³Ngiye kubona, mbona andi mahundo arindwi y’iminambe, yumishijwe n’umuyaga uturuka iburasirazuba, na yo akurikiraho arakura.

²⁴Ayo mahundo y’iminambe amira ya mahundo ahunze neza uko ari arindwi! Nabirotoreye abapfumu bose, ariko nta muntu n’umwe washoboye kubinsobanurira.»

²⁵Yozefu abwira Farawo, ati «Inzozi za Farawo ni zimwe. Ibyo Imana igiye kugirira Farawo, yabimuhishuriye.

²⁶Za nka ndwi nziza ni imyaka irindwi, na ya mahundo meza arindwi, ni imyaka irindwi: ntaho bitaniye.

²⁷Na za nka mbi ndwi zinanutse zazikurikiye, ni imyaka irindwi, kimwe na ya mahundo arindwi y’iminambe, yumishijwe n’umuyaga w’iburasirazuba: izaba imyaka irindwi y’inzara.

²⁸Ubwo ni bwo butumwa nagombaga kubwira Farawo, kandi icyo Imana igiye gukora, yakigaragarije Farawo.

²⁹Dore mu gihugu cyose cya Misiri hagiye kuza imyaka irindwi y’uburumbuke bwinshi.

³⁰Hanyuma hazakurikiraho imyaka irindwi y’inzara, ubwo burumbuke bwose bwibagirane mu gihugu cya Misiri, inzara iyogoze igihugu.

³¹Uburumbuke bwoye kwibukwa kubera inzara izaza ibukurikiye, kuko izaba ari icyorezo.

³²Kuba izo nzozi zabonekeye Farawo kabiri, ni ikimenyetso cy’uko Imana yabitegetse kandi yiyemeje kubigira vuba.

³³None rero, Farawo nashake umuntu w’umunyabwenge witonda, amugire umutware w’intebe mu gihugu cya Misiri.

³⁴Farawo ashyireho abagenzuzi, bahunikishe igice cya gatanu cy’umusaruro w’igihugu cya Misiri, muri iyo myaka y’uburumbuke uko ari irindwi!

³⁵Bateranye ibihunikwa by’iyo myaka y’uburumbuke igiye gutaha, bahunike ingano mu migi, maze Farawo azirindishe.

³⁶Ibyo bihunitse, bazabizigamire imyaka irindwi y’inzara izatera mu gihugu cya Misiri, bityo abaturage boye kuzarimburwa n’inzara.»

³⁷Iyo nama inyura Farawo n’abagaragu be bose.

³⁸Farawo ni ko kubaza abagaragu be, ati «Umuntu nk’uyu wifitemo umwuka w’Imana azaboneka he?»

³⁹Farawo abwira Yozefu, ati «Ubwo Imana yakweretse ibyo byose, nta muntu w’umunyabwenge witonda kukurusha.

⁴⁰Ni wowe mpaye ubutware bw’urugo rwanjye, kandi imbaga yanjye yose izumvira itegeko ryawe. Icyo nzakurusha gusa ni intebe ya cyami.»

⁴¹Farawo abwira Yozefu, ati «Kuva ubu nkugize umutware w’igihugu cya Misiri cyose.»

⁴²Ni ko gukuramo impeta[115] ye yari yambaye ku rutoki, ayambika Yozefu. Amwambika n’imyambaro myiza ya hariri, n’urunigi rwa zahabu mu ijosi.

⁴³Amushyira ku igari rikururwa n’ifarasi, amugira umwungirije mu butegetsi. Nuko bamurangaza imbere, bakagenda bavuga bati «Nimutange inzira!» Farawo amuha rero ubutegetsi mu gihugu cyose cya Misiri.

⁴⁴Nuko abwira Yozefu, ati «Jyewe ndi Farawo! Ariko nta muntu n’umwe uzarevura mu gihugu cyose cya Misiri, utabimuhereye uruhusa.»

⁴⁵Farawo yita Yozefu irindi zina, amwita Safunati‐Paneya[116], anamushyingira Asinata, umukobwa wa Poti‐Fera, akaba umuherezabitambo wo mu mugi witwa Oni. Nuko Yozefu atambagira igihugu cyose cya Misiri.

⁴⁶Yozefu, ubwo ahawe ubutware na Farawo, umwami wa Misiri, yari mu kigero cy’imyaka mirongo itatu. Yozefu asezera kuri Farawo, ngo atambagire igihugu cyose cya Misiri.

⁴⁷Muri iyo myaka irindwi y’ubukungu, imirima irera cyane.

⁴⁸Yozefu ahunikisha ibiribwa byose by’iyo myaka irindwi y’uburumbuke bwa Misiri. Abihunika mu migi. Buri mugi akawuhunikamo imyaka y’imirima iwukikije.

⁴⁹Yozefu ahunika ingano nyinshi, nyinshi cyane nk’umusenyi wo ku nkombe y’inyanja, ku buryo atongeye kwirushya abara, kuko nta washoboraga kubipima.

⁵⁰Mbere y’uko inzara itera, Yozefu abyara abahungu babiri kuri Asinata umukobwa wa Poti‐Fera, umuherezabitambo wo mu mugi witwa Oni.

⁵¹Uw’imfura Yozefu amwita Manase (bisobanura ngo ’Yanyibagije’), agira ati «mbitewe n’uko Imana yanyibagije umuruho wanjye n’inzu ya data.»

⁵²Uwa kabiri amwita Efurayimu (bisobanura ngo ’Yampaye kororoka’), avuga ati «mbitewe n’uko Imana yampaye kororokera mu gihugu naboneyemo akababaro.»

⁵³Ya myaka irindwi y’uburumbuke mu gihugu cyose cya Misiri irashira.

⁵⁴Hatangira kuza ya yindi irindwi y’inzara, nk’uko Yozefu yari yarabivuze. Inzara itera mu bindi bihugu byose, ariko mu Misiri hose hari ibyo kurya.

⁵⁵Misiri yose imaze kuyogozwa n’inzara, abantu batakira Farawo, bamwaka ibyo kurya. Farawo abwira Abanyamisiri bose, ati «Nimusange Yozefu, mukore icyo abategetse.»

⁵⁶Inzara ikwira igihugu cyose. Yozefu ni ko gukingura ibigega byose yahunitse mu migi, agurisha Abanyamisiri ingano. Inzara iranga irakomera cyane mu gihugu cya Misiri.

⁵⁷Ariko ibindi bihugu biza bigana Misiri ngo bagure na Yozefu ingano. Koko rero, inzara yari yabaye icyago ku isi hose.