Read kinyarwanda Intangiriro 44 Bible Online

Intangiriro 44 - kinyarwanda bible

Intangiriro 44

¹Hanyuma Yozefu ategeka igisonga cye, ati «Uzuza ingano mu mifuka ya bariya bantu, uko bashobora kuyikorera; hanyuma hejuru mu mufuka wa buri wese ushyiremo feza ze.

²Byongeye, hejuru mu mufuka w’umuhererezi ushyiremo inkongoro yanjye ya feza, uyishyiranemo n’ikiguzi cy’ingano ze.» Nuko abigenza uko Yozefu yari yabivuze.

³Igitondo gitangaje, bohereza abo bantu n’indogobe zabo.

⁴Bakiva mu mugi kandi bataragera kure, Yozefu abwira igisonga cye, ati «Haguruka, wiruke ukurikire bariya bantu, ubafate, maze ubabwire uti ’Kuki mwitura inabi ineza?

⁵Mbese icyo mwibye si inkongoro databuja anywesha, kandi akayikoresha aragura. Mwagize nabi rwose.’»

⁶Nuko uwo mugabo amaze kubafata, ababwira ayo magambo.

⁷Baramusubiza bati «Kuki databuja yavuga atyo? Ntibikabe yuko abagaragu bawe bakora ikintu kimeze gityo!

⁸Twakugaruriye feza twasanze mu mifuka yacu y’ingano, tuzikugarurira tuzikuye mu gihugu cya Kanahani; bishoboka bite ko twakwiba mu nzu ya shobuja feza cyangwa zahabu?

⁹Uwo mu bagaragu bawe basangana icyo kintu bamwice! Natwe ubwacu duhinduke abacakara ba databuja!»

¹⁰Arabasubiza ati «Ngaho rero, nibibe uko mwabivuze. Uwo dusangana icyo kintu araba umucakara wanjye, naho mwebwe mube abere.»

¹¹Ako kanya buri muntu ashyira hasi umufuka we w’ingano arawufungura.

¹²Uwo Munyamisiri atangira gusaka ahereye ku uw’imfura, aherukira ku muhererezi; basanga inkongoro mu mufuka wa Benyamini.

¹³Nuko bashishimura imyambaro yabo; bongera guhekesha imitwaro indogobe zabo, buri muntu yongera gukorera indogobe ye, bagaruka mu mugi.

¹⁴Yuda na bene se bageze kwa Yozefu, na we yari agihari, bikubita hasi imbere ye.

¹⁵Yozefu arabatonganya, ati «Mwakoze ibiki? Ntimwari muzi ko umuntu nkanjye aragura?»

¹⁶Nuko Yuda aramusubiza ati «Twabwira iki se databuja? Twavuga iki? Twiregure dute? Ni Imana yagaragaje icyaha cy’abagaragu bawe. Dore turi abacakara ba databuja, twese n’uwo basanganye inkongoro.»

¹⁷Maze ariko Yozefu arabasubiza ati «Gukora ntyo ntibikambeho; umuntu bafatanye inkongoro yanjye ni we uzambera umucakara, naho mwe nimutahe kwa so amahoro.»

¹⁸Nuko Yuda aramwegera, maze aravuga ati «Nyamuneka, shobuja, ndakwinginze ngo wemerere umugaragu wawe agire icyo abwira databuja. Wirakarira umugaragu wawe, n’ubwo uri nka Farawo ubwe.

¹⁹Databuja ubwe yari yabajije abagaragu be, ati ’Mbese muracyafite so n’umuvandimwe wundi?’

²⁰Nuko dusubiza databuja, tuti ’Dufite umukambwe n’agahererezi yabyaye mu busaza bwe; uwo bava inda imwe we yarapfuye. Nta mwene nyina wundi asigaranye kandi data aramukunda.’

²¹Hanyuma wabwiye abagaragu bawe, uti ’Muzamunzanire murebe’.

²²Dusubiza databuja, tuti ’Uwo mwana ntashobora kuva iruhande rwa se; aramutse ahavuye, se yapfa.’

²³Nawe urakomeza ubwira abagaragu bawe, uti ’Umuhererezi wanyu natamanukana namwe, ntimuzongera kumbona.’

²⁴Igihe rero dusubiye kwa data, umugaragu wawe, twamushyikirije ubutumwa bwa databuja.

²⁵Hanyuma data atubwiye ati ’Nimusubireyo, mujye kuduhahira’,

²⁶turamusubiza tuti ’Nta bwo dushobora kumanuka. Icyakora turi kumwe n’umuhererezi wacu, twakwemera tukagenda, naho ubundi ntitwabonana n’uwo muntu, tutari kumwe n’umuhererezi wacu.’

²⁷Nuko umugaragu wawe, data, aratubwira ati ’Muzi ko umugore wanjye twabyaranye abana babiri gusa.

²⁸Umwe naramubuze, hanyuma ndavuga nti: nta kabuza yatanyagujwe n’inyamaswa! Kandi kugeza ubu sindongera kumubona.

²⁹None mwongeye kuntwara n’uyu nguyu! Naramuka agize ibyago, muzatuma imvi zanjye zimanukana ishavu ikuzimu.’

³⁰None ubu ningera imbere y’umugaragu wawe, ari we data, ntari kumwe n’umwana, akabona ntagarukanye umwana umutima we wiziritseho, arahita apfa!

³¹Ubwo rero, abagaragu bawe bazaba bamanuranye ishavu imvi z’umugaragu wawe, data, ikuzimu.

³²Menya ko jyewe, umugaragu wawe, nishingiye uyu mwana imbere ya se, ngira nti ’Niba ntamukugaruriye nzaba ngukoreye icyaha nzagumana iteka’.

³³Noneho emera ko jyewe, umugaragu wawe, nsigara aha, mbe umucakara wa databuja, mu cyimbo cy’umwana, naho we ajyane na bene se!

³⁴Rwose nshobora nte gutunguka imbere ya data ntari hamwe n’umwana? Sinkabone ibyago bizagwira data!»