Read kinyarwanda Intangiriro 45 Bible Online

Intangiriro 45 - kinyarwanda bible

Intangiriro 45

¹Nuko Yozefu ananirwa kwitsinda imbere y’abo bari kumwe bose, arangurura ijwi, ati «Nimusohore abantu bose bambise.» Nuko ntihagira usigara iruhande rwe, igihe Yozefu yibwiraga bene se.

²Maze araboroga arira, nuko Abanyamisiri baramwumva, ndetse n’abo mu ngoro ya Farawo.

³Yozefu abwira bene se, ati «Ndi Yozefu! Data aracyariho?» Nuko bene se ntibashobora kumusubiza, kuko badagadwaga imbere ye.

⁴Maze Yozefu abwira bene se ati «Nimwigire hino.» Nuko baramwegera. Aravuga ati «Ndi Yozefu umuvandimwe wanyu mwaguze mu Misiri.

⁵Noneho nimushire agahinda, kandi mwibabazwa n’uko mwangurishije hano. Ni Imana yanyohereje[118] imbere yanyu kugira ngo ndamire ubuzima bwanyu.

⁶Koko kandi dore inzara imaze imyaka ibiri mu gihugu, kandi hasigaye imyaka itanu batazahinga, ntibasarure.

⁷Imana yanyohereje imbere yanyu, kugira ngo mbahunikire ibiryo mu gihugu, mushobore kubaho, irokore ityo benshi muri mwe.

⁸Maze rero nta bwo ari mwe mwanyohereje hano, ni Imana kandi yangize nka se wa Farawo, ingira umuyobozi w’urugo rwe rwose, n’umutware w’igihugu cyose cya Misiri.

⁹Ngaho nimwihute muzamuke, musange data, maze mumubwire muti ’Dore uko umwana wawe Yozefu avuze: Imana yangize umutware wa Misiri yose, manuka unsange udatinze.

¹⁰Uzatura mu gihugu cya Gosheni[119] kandi uzaba hafi yanjye, wowe ubwawe, abana bawe, abuzukuru bawe, umukumbi n’amashyo yawe, n’ibyo utunze byose.

¹¹Ni ho nzaguteganyiriza ibizagutunga, byatuma udakena, wowe n’urugo rwawe, n’abawe bose, kuko inzara ishigaje imyaka itanu.’

¹²Namwe murareba, kandi na mwene mama Benyamini arirebera ko ari jyewe ubwanjye ubibwirira.

¹³Muzabwire data ikuzo ryose mfite mu Misiri, n’ibyo mwabonye byose, kandi muzihutire kumanukana data hano.»

¹⁴Maze Yozefu agwa mu nda ya mwene nyina Benyamini, asuka amarira. Benyamini na we ararira bahoberana.

¹⁵Ahobera na bene se arira, hanyuma bene se baganira na we.

¹⁶Inkuru igera mu ngoro ya Farawo ngo: Bene se wa Yozefu baje. Nuko Farawo n’abagaba be babyakira neza.

¹⁷Farawo abwira Yozefu, ati «Bwira abo muva inda imwe, uti ’Nimugenze mutya: nimwihutishe indogobe zanyu, musubire mu gihugu cya Kanahani;

¹⁸muzagarukane na so n’umuryango wanyu maze munsange. Nzabaha ameza mu masambu yo mu Misiri, maze muzatungwe n’ibyiza by’igihugu.’

¹⁹Naho wowe, ubategeke uti ’Dore uko muzabigenza: Muzajyane amagare yo mu Misiri kugira ngo abahekere abana n’abagore, na so, hanyuma muze.

²⁰Ntimuzicuze ibyo muzasiga, kuko ibyiza byose byo mu Misiri bizaba ari ibyanyu.’»

²¹Bene Israheli babigenza batyo. Yozefu abaha amagare, abahambirira n’impamba, uko Farawo yabitegetse.

²²Aha buri muntu muri bo, umwenda w’umurimbo, naho Benyamini amuha amasikeli ya feza magana atatu, n’imyenda itanu y’umurimbo.

²³Na se amwoherereza indogobe cumi zikoreye ibyiza byo mu Misiri, hamwe n’indogobe cumi z’ingore bari bakoreye ingano, n’imigati n’impamba yari yageneye se.

²⁴Nuko asezera kuri bene se, ariko abanje kubihanangiriza, ati «Muramenye ntimutonganire mu nzira.»

²⁵Nuko bava mu Misiri, bagera mu gihugu cya Kanahani, kwa se Yakobo.

²⁶Baramubwira bati «Yozefu aracyariho, ndetse ni na we mutware wa Misiri yose!» Maze ariko umutima wa Yakobo urakakara, ntiyabemera.

²⁷Nyamara bamaze gusubira mu magambo yose Yozefu yari yababwiye, amaze no kubona amagare Yozefu yari yamwoherereje kugira ngo amuzane, Yakobo arahembuka.

²⁸Nuko Israheli aravuga ati «Nimurekere aho! Noneho nemeye ko Yozefu umwana wanjye akiriho[120]! Reka njye kumureba, ntarapfa.»