Read kinyarwanda Intangiriro 48 Bible Online

Intangiriro 48 - kinyarwanda bible

Intangiriro 48

¹[124] Ibyo bimaze kuba, baza kubwira Yozefu, bati «So ararwaye.» Nuko ajyana abahungu be bombi, Manase na Efurayimu.

²Babwiye Yakobo, bati «Dore umwana wawe Yozefu yaje kukureba», Israheli arihangana, yicara ku buriri.

³Yakobo abwira Yozefu, ati «Imana Nyir’ububasha yambonekeye i Luzi mu gihugu cya Kanahani. Yampaye umugisha,

⁴maze irambwira, iti ’Nzaguha kororoka no kugwira, nzaguhindura imbaga y’imiryango. Kandi iki gihugu nzagiha urubyaro rwawe, kibe ubukonde iteka ryose.’

⁵None rero, abahungu bombi wabyariye mu Misiri, mbere yuko ngusanga mu Misiri, ni abanjye. Efurayimu na Manase bazaba abanjye kimwe na Rubeni na Simewoni.

⁶Naho abana wakurikijeho bazaba abawe; bazahabwa umurage wabo babikesheje bakuru babo.

⁷Igihe navaga mu kibaya cya Aramu, nababajwe no gupfusha nyoko Rasheli mu gihugu cya Kanahani, dushigaje gato ngo tugere Efurata. Ni ho namuhambye, iruhande rw’inzira igana Efurata, ari yo Betelehemu.»

⁸Israheli abona abahungu bombi ba Yozefu, maze arabaza ati «Abo ni ba nde?»

⁹Yozefu asubiza se, ati «Ni abahungu Imana yampereye ino.» Na we aramubwira ati «Banyegereze mbahe umugisha.»

¹⁰Ubusaza bwari bwaratumye Israheli ahuma amaso, ntiyari akibona. Yozefu arabamwegereza, undi arabasoma, arabahobera.

¹¹Nuko Israheli abwira Yozefu, ati «Nta bwo nari ngifite icyizere cyo kukubona, nyamara dore Imana impaye no kubona none urubyaro rwawe!»

¹²Yozefu abavana ku bibero bya se, maze aramwunamira.

¹³Yozefu afata abahungu be bombi; Efurayimu amufatisha ukuboko kwe kw’iburyo kugira ngo abe ibumoso bw’Israheli, Manase amufatisha ukw’ibumoso kugira ngo abe iburyo bw’Israheli. Nuko arabamwegereza.

¹⁴Nyamara ariko Israheli aramburira ukuboko kwe kw’iburyo ku mutwe wa Efurayimu wari umuhererezi, aramburira ukuboko kwe kw’ibumoso ku mutwe wa Manase, anyuranyije amaboko. Manase ni we wari imfura.

¹⁵Aha Yozefu umugisha, agira ati «Imana ba sogokuru Abrahamu na Izaki bagenze imbere, Imana yandagiye mu buzima bwanjye bwose kugeza ubu,

¹⁶ikaba ari yo Mumalayika wandinze ibibi byose, nihe aba bahungu umugisha. Maze kubera bo, izina ryanjye risingizwe, kimwe n’aya ba sogokuru Abrahamu na Izaki. Aba bana bazagwire, bakwire igihugu!»

¹⁷Yozefu abonye ko se yari yashyize ikiganza cy’iburyo ku mutwe wa Efurayimu[125], biramubabaza. Afata ikiganza cya se kugira ngo agikure ku mutwe wa Efurayimu, agishyire ku mutwe wa Manase.

¹⁸Ati «Data, wibigenza utyo, kuko uyu ari we mfura. Shyira ikiganza cyawe cy’iburyo ku mutwe we.»

¹⁹Se ariko aranga, ati «Ndabizi, mwana wanjye, ndabizi. Na we azahinduka umuryango, na we azaba igihangange. Nyamara murumuna we azamurusha kuba igihangange, urubyaro rwe ruzaba imiryango myinshi.»

²⁰Nuko uwo munsi abaha umugisha, avuga ati «Dore uko muri Israheli bazifurizanya umugisha: bazavuga bati ’Imana irakakugira nka Efurayimu na Manase.’» Ashyira atyo Efurayimu imbere ya Manase.

²¹Hanyuma Israheli abwira Yozefu, ati «Dore ngiye gupfa, ariko Imana izabana namwe kandi izabasubiza mu gihugu cy’abasokuru.

²²Byongeye, nkuraze umugabane usumba uwa bene so, ari wo Sikemu nanyaze Abahemori, nyibanyagisha inkota n’umuheto.»