Read kinyarwanda Intangiriro 9 Bible Online

Intangiriro 9 - kinyarwanda bible

Intangiriro 9

¹Imana iha Nowa n’abahungu be umugisha, irababwira iti «Mwororoke, mugwire, mwuzure isi.

²Inyamaswa zose z’isi n’inyoni zose zo mu kirere zizabatinya, muzitere ubwoba. Ibikururuka ku isi byose, hamwe n’amafi yose yo mu nyanja, murabigabiwe.

³Ibikururuka byose byifitemo ubuzima, mbibahayeho ikiribwa, kimwe n’ibimera bitohagiye.

⁴Icyakora ntimuzarye inyama ikifitemo ubuzima, ari yo maraso.

⁵Kandi amaraso yanyu, arimo ubuzima bwanyu, sinzabura kuyahorera. Ari inyamaswa, ari umuntu uzaba yayamennye, nzayamuryoza. Buri muntu wese azishyura ubuzima bwa mugenzi we.

⁶Usheshe amaraso y’umuntu, aye azaseswa n’undi muntu, kuko Imana yaremye umuntu imwishushanyije.

⁷Naho mwebwe nimwororoke mugwire, mwuzure isi muyigenge.»

⁸Imana ibwira Nowa n’abahungu be, iti

⁹«Dore ngiranye Isezerano namwe n’urubyaro rwanyu,

¹⁰kimwe n’ibinyabuzima byose muri kumwe: inyoni, n’amatungo n’inyamaswa zose zo ku isi, mbese ibivuye mu bwato byose, ntavanyemo n’inyamaswa z’ishyamba.

¹¹Ngiri rero Isezerano ngiranye namwe: nta kinyamubiri kizongera kurimburwa n’amazi y’umwuzure, kandi nta n’umwuzure uzongera kurimbura isi.»

¹²Imana iravuga iti «Dore ikimenyetso cy’Isezerano ngiranye namwe, n’ibifite ubuzima byose muri kumwe, uko ibisekuruza byanyu bisimburana:

¹³nshyize umukororombya[37] wanjye mu gicu, uzaba ikimenyetso cy’Isezerano ngiranye n’isi.

¹⁴Ninkoranyiriza ibicu hejuru y’isi, mukabona uwo mukororombya,

¹⁵nzibuka Isezerano nagiranye namwe, n’ikinyabuzima cyose; amazi ntazongera kuba umwuzure warimbura ibinyamubiri byose.

¹⁶Umukororombya niwitambika mu bicu, nanjye nzawitegereza nibuke Isezerano rizahoraho jyewe Imana ngiranye n’ikinyamubiri cyose cyo ku isi.»

¹⁷Imana ibwira Nowa, iti «Icyo ni cyo kimenyetso cy’Isezerano ngiranye n’ikinyamubiri cyose cyo ku isi.»

¹⁸Bene Nowa basohotse mu bwato, ni Semu, Kamu na Yafeti; Kamu ni se wa Kanahani.

¹⁹Abo uko ari batatu, ni bo Nowa yabyaye; ni bo bakomotsweho n’abakwiriye ku isi yose.

²⁰Nowa aba umuhinzi, atera imizabibu.

²¹Nuko aza kunywa divayi arasinda, yambara ubusa ari mu ihema rye.

²²Kamu, se wa Kanahani, abona se yambaye ubusa, abibwira abavandimwe be bombi bari hanze.

²³Semu na Yafeti benda igishura cya Nowa, bagishyira ku bitugu byabo, bagenza umugongo, batwikira ubwambure bwa se. Bityo ntibabona se yambaye ubusa.

²⁴Nowa asindutse, amenya ibyo umuhererezi we yamugiriye,

²⁵nuko atera hejuru ati «Kanahani aravumwe, azaba umucakara wa nyuma mu bacakara ba bene se!»

²⁶Arongera ati «Nihasingizwe Uhoraho Imana ya Semu, maze Kanahani azamubere umucakara!

²⁷Yafeti na we, Imana imutoneshe, azature mu mahema ya Semu, maze Kanahani amubere umucakara!»

²⁸Nyuma y’umwuzure, Nowa abaho indi myaka magana atatu na mirongo itanu.

²⁹Iminsi yose Nowa yabayeho ni imyaka magana cyenda na mirongo itanu, nuko arapfa.