Read kinyarwanda Icya kabiri cya Samweli 10 Bible Online

Icya kabiri cya Samweli 10 - kinyarwanda bible

Icya kabiri cya Samweli 10

¹Nyuma y’ibyo, umwami w’Abahamoni aza gupfa, maze umuhungu we Hanuni amusimbura ku ngoma.

²Nuko Dawudi aravuga ati «Sinzahemukira Hanuni mwene Nahashi, nk’uko se na we atampemukiye.» Dawudi ni ko kohereza abagaragu be kumuhoza mu kababaro k’urupfu rwa se. Bityo, abagaragu ba Dawudi bagera mu gihugu cy’Abahamoni.

³Ariko abatware b’Abahamoni babwira umwami wabo Hanuni, bati «Uratekereza ko Dawudi akoherereje abo bantu be kuguhoza ari uko yubashye so? Ntuzi se ko yohereje abagaragu be kwitegereza umugi, kuwutata no kuwutsemba?»

⁴Nuko Hanuni afata abagaragu ba Dawudi, abogosha ubwanwa igice, akeba imyambaro yabo guhera hasi kugera ku matako[29], maze arabasezerera.

⁵Babibwiye Dawudi, yohereza umuntu kubasanganira, kuko bari bakozwe n’ikimwaro. Nuko umwami abatumaho ati «Muhame i Yeriko, kugeza ubwo ubwanwa buzaba bumaze kumera. Ni bwo rero muzabona kugaruka.»

⁶Abahamoni babonye ko basuzuguye Dawudi bikabije, ni ko kohereza abantu ku Baramu b’i Betirehobu n’ab’i Soba kubasaba ngo bisungane; bakaba ingabo ibihumbi makumyabiri zigenza ibirenge. Umwami w’i Maka na we azana abantu igihumbi, naho ab’i Tobu bari abantu ibihumbi cumi na bibiri.

⁷Dawudi arabimenya, yohereza Yowabu n’ingabo zose zimenyereye intambara.

⁸Bukeye, Abahamoni barasohoka barema inteko mu marembo y’umugi wabo, naho Abaramu b’i Soba n’ab’i Rehobu, abantu b’i Tobu n’ab’i Maka, bo bari ukwabo mu gasozi.

⁹Yowabu abona ko yagombaga guturuka urugamba imbere n’inyuma, ni ko gutoranya abantu b’intwari mu ngabo za Israheli, maze abashyira ahateganye n’Abaramu.

¹⁰Abasigaye bose abaha murumuna we Abishayi, maze abahagarika imbere y’Abahamoni.

¹¹Nuko Yowabu abwira Abishayi, ati «Abaramu nibaramuka bandushije imbaraga, uraza kuntabara. Abahamoni kandi na bo nibakurusha imbaraga, ndibuze kugutabara.

¹²Ukomere, tugaragaze ubutwari kubera umuryango wacu n’imigi y’Imana yacu! Kandi Uhoraho arakore uko abishaka.»

¹³Nuko Yowabu n’inteko ye basatira urugamba, kugira ngo barwane n’Abaramu, maze bo barabahunga.

¹⁴Abahamoni ngo babone ko Abaramu bahunze, na bo baherako bahunga Abishayi bataha mu mugi. Yowabu areka atyo kurwana n’Abahamoni, agaruka i Yeruzalemu.

¹⁵Abaramu babonye ko Israheli ibatsinze, bakoranira hamwe bose.

¹⁶Bukeye, Hadadezeri yohereza intumwa ku Baramu bose bo hakurya y’Uruzi. Baraza bagera i Helamu; Shobaki, umugaba w’ingabo za Hadadezeri, abarangaje imbere.

¹⁷Nuko babibwira Dawudi, na we akoranya Israheli yose, bambuka Yorudani, bagera i Helamu. Abaramu bambikana na Dawudi bararwana.

¹⁸Ariko Abaramu baza guhunga Israheli, Dawudi abicamo abanyamagare magana arindwi, n’ibihumbi mirongo ine by’abanyamafarasi. Asogota na Shobaki, umugaba w’ingabo z’Abaramu, amutsinda aho.

¹⁹Nuko abami bose, abagaragu ba Hadadezeri, babonye ko batsinzwe na Israheli baracogora, bayoboka Israheli, barayikorera. Kandi Abaramu batinya kugaruka gutabara Abahamoni.