Read kinyarwanda Icya kabiri cya Samweli 16 Bible Online

Icya kabiri cya Samweli 16 - kinyarwanda bible

Icya kabiri cya Samweli 16

¹Dawudi yari amaze kurenga gato impinga y’umusozi, Siba[50] umugaragu wa Mefibosheti aramusanganira n’indogobe ebyiri zihetse imigati magana abiri, amaseri ijana y’imizabibu yumye, imbuto ijana z’umwero n’uruhago rw’uruhu rurimo divayi.

²Umwami abaza Siba, ati «Ibi ni iby’iki?» Siba aramusubiza ati «Indogobe ni izizaheka abo mu rugo rw’umwami; imigati n’imbuto ni ifunguro ry’abahungu bawe, naho divayi ni izamara inyota abazaba bananiriwe mu butayu.»

³Umwami aramubaza ati «Ariko se ye, Mefibosheti, umuhungu wa shobuja ari hehe?» Siba asubiza umwami, ati «Dore asigaye i Yeruzalemu, kuko yibwiraga ati ’Uyu munsi, inzu ya Israheli iransubiza ubwami bwa data!’»

⁴Umwami abwira Siba, ati «Kuva ubu, ibintu byose bya Mefibosheti ni ibyawe.» Nuko Siba aravuga ati «Dore mpfukamye imbere yawe! Nkomeze kukubaho umutoni, mwami mutegetsi wanjye.»

⁵Umwami Dawudi ageze i Bahurimu, hasohoka umugabo wo mu nzu ya Sawuli, witwaga Shimeyi[51] mwene Gera. Uko yasohokaga ni ko yagendaga avumana.

⁶Atera Dawudi n’abagaragu b’umwami bose amabuye, nyamara imbaga yose n’ab’intwari bose bakikiza Dawudi.

⁷Dore ibyo Shimeyi yavugaga muri iyo mivumo ye «Genda, genda, wa mugome we umena amaraso!

⁸Uhoraho yakugaruyeho amaraso yose y’inzu ya Sawuli, wakuye ku ngoma. None Uhoraho yashubije ubwami mu biganza by’umuhungu wawe Abusalomu, naho wowe uri mu byago, kuko uri umuntu w’amaraso.»

⁹Nuko Abishayi mwene Seruya abwira umwami, ati «Ni kuki iriya mbwa yaboze yatuka umwami umutegetsi wanjye? Reka ntambuke, maze muce umutwe.»

¹⁰Umwami aravuga ati «Mpuriye he namwe, bene Seruya? Niba amvuma kandi akaba ari Uhoraho wamubwiye ati ’Genda uvume Dawudi’, ni nde wakubahuka kumubwira ati ’Kuki ukora ibyo ngibyo?’»

¹¹Dawudi abwira Abishayi n’abagaragu be bose, ati «Niba umuhungu wanjye, uwo nibyariye, ashaka kunyica, uriya Mubenyamini we ntiyagombye kurushaho? Nimumureke avumane, niba Uhoraho yabimubwiye.

¹²Ahari Uhoraho yazareba umubabaro wanjye, maze akansubiza ibyishimo mu mwanya w’imivumo y’uyu munsi.»

¹³Nuko Dawudi n’abantu be bakomeza inzira, naho Shimeyi anyura mu ibanga ry’umusozi ahateganye na Dawudi, akomeza kumuvuma no kumutera amabuye, ndetse ari na ko atumura n’imikungugu.

¹⁴Hanyuma umwami n’abantu be bagera aho bananirwa, nuko bararuhuka.

¹⁵Abusalomu n’inteko y’Abayisraheli bari barageze i Yeruzalemu, kandi na Ahitofeli yari kumwe na we.

¹⁶Ubwo Hushayi w’i Aruki, incuti ya Dawudi, agera kwa Abusalomu. Hushayi abwira Abusalomu, ati «Harakabaho umwami! Niharambe umwami!»

¹⁷Abusalomu abaza Hushayi, ati «Mbese burya kwa kudahemuka kwawe ku ncuti yawe, ni aho kugarukiye? Kuki se utajyanye n’incuti yawe?»

¹⁸Hushayi asubiza Abusalomu, ati «Reka da[52]! Ahubwo uwatoranyijwe n’Uhoraho ndetse n’iyi mbaga n’Abayisraheli bose, nanjye ndashaka kuba uwe kandi nkagumana na we!

¹⁹Byongeye kandi, uwo ngiye gukorera ni nde? Si umuhungu we? Nk’uko nabaye umugaragu wa so, ni na ko nawe nzagukorera.»

²⁰Bukeye, Abusalomu abwira Ahitofeli, ati «Nimujye inama y’icyo tugomba gukora.»

²¹Ahitofeli abwira Abusalomu, ati «Taha ku nshoreke za so yasize ku rugo, bityo Abayisraheli bazamenyereho ko wananiye so, maze imbaga yose igushyigikiye igukomereho.»

²²Bashingira Abusalomu ihema ahantu hitaruye, maze Abusalomu ataha kuri za nshoreke za se, Abayisraheli bose babireba[53].

²³Inama za Ahitofeli muri icyo gihe, bazifataga nk’ijambo ry’Imana; uko ni ko inama za Ahitofeli zari ziteye, ari izo yagiraga Dawudi cyangwa Abusalomu.