Read kinyarwanda Icya kabiri cya Samweli 22 Bible Online

Icya kabiri cya Samweli 22 - kinyarwanda bible

Icya kabiri cya Samweli 22

¹[73] Dawudi aririmbira Uhoraho indirimbo, umunsi Uhoraho amurokoye ikiganza cy’abanzi be bose n’icya Sawuli.

²Aravuga ati «Uhoraho ni urutare rwanjye, ni we mbaraga zanjye n’Umukiza wanjye.

³Imana ni yo rutare rwanjye n’ingabo inkingira, intwaro yanjye n’inkingi yanjye; ni yo buhungiro bwanjye n’Umukiza wanjye, ni na yo inkiza abanyamaboko.

⁴Uhoraho nahimbazwe! Naramutakambiye, maze ntsinda abanzi banjye.

⁵Imyuzure y’urupfu yarantangatanze, n’ibidendezi bya Beliyali[74] birangota.

⁶Ingoyi z’ikuzimu zarangose, imitego y’urupfu intanga imbere.

⁷Igihe nari mu makuba niyambaje Uhoraho, ntakambira Imana yanjye; mu Ngoro yayo yumvise ijwi ryanjye, ugutakamba kwanjye kugera mu matwi yayo.

⁸Nuko isi iratengurwa, ihinda umushyitsi, imfatiro z’ijuru ziranyeganyega, maze byose bitigiswa n’uburakari bwayo.

⁹Mu mazuru yayo hacucumuka umwotsi, umuriro utwika usohoka mu munwa wayo, n’amakara agurumana.

¹⁰Yunamisha ijuru maze iramanuka, n’igicu kibudika mu nsi y’ibirenge byayo.

¹¹Iza ihetswe n’umukerubimu, igurukira hejuru y’amababa y’umuyaga.

¹²Umwijima iwugira inturo yayo, ikikizwa n’ikirundo cy’amazi n’ibihu hejuru y’ibindi.

¹³Urumuri rutangaje ruyijya imbere, n’amakara aragurumana.

¹⁴Uhoraho ahindisha inkuba mu ijuru, Umusumbabyose yumvikanisha ijwi rye.

¹⁵Arasa imyambi[75] ye atatanya ibicu, yohereza imirabyo irabimenesha.

¹⁶Ubutaka bwo hasi mu nyanja buraboneka, imfatiro z’isi ziragaragara, ku bw’umuhindagano w’Uhoraho, ku bw’inkubi y’umwuka usohoka mu mazuru ye.

¹⁷Aho ari mu ijuru arambura ukuboko aramfata, ankura rwagati mu mazi magari.

¹⁸Andokora umwanzi wanjye w’umunyamaboko, n’abampagurukiye kuko bandusha imbaraga.

¹⁹Barantangatanze ku munsi w’amakuba yanjye, ariko Uhoraho ambera urwishingikirizo.

²⁰Yankuye mu makuba anshyira mu bwisanzure, yarandokoye kuko ankunda.

²¹Uhoraho yanyitayeho akurikije ubutungane bwanjye, n’ubudacumura bw’ibiganza byanjye,

²²kuko natunganyije inzira z’Uhoraho, kandi singarambire Imana yanjye.

²³Amatangazo yahozeho mbere yanjye, n’amategeko yayo sinyavirire;

²⁴nabanaga na yo ntunganye, nirinze gukora icyaha icyo ari cyo cyose.

²⁵Uhoraho yanyituye akurikije ubutungane bwanjye n’ubudahemuka bwanjye yiboneye n’amaso ye.

²⁶Ku badahemuka, uri indahemuka, naho ku ntwari ukaba indatsimburwa.

²⁷Ku ndacumura, uri indacumura, naho ku bagome, ugahana wihanukiriye.

²⁸Umuryango w’insuzugurwa uwuha umutsindo, ariko abikuza, indoro yawe ikabacisha bugufi.

²⁹Ni wowe tara ryanjye, Uhoraho; Uhoraho, ni we umurikira umwijima wanjye,

³⁰Iyo ndi kumwe nawe mbasha gutambuka imikokwe y’abanzi, iyo ndi kumwe n’Imana yanjye, nsimbuka inkike zabo.

³¹Inzira z’iyi Mana ziraboneye; Ijambo ry’Uhoraho ryarigaragaje. Ni ingabo ikingira abamufiteho ubuhungiro.

³²Ni nde Mana itari wowe? Ni nde rutare nk’Imana yacu?

³³Imana ni umwihariko wanjye, kandi inyuza mu nzira iboneye.

³⁴Ihindura ibirenge byanjye nk’iby’imparakazi, ikampagarika ku mpinga z’imisozi;

³⁵yigisha ibiganza byanjye intambara, n’amaboko yanjye gufora umuheto w’umuringa.

³⁶Wampaye ingabo yawe ho agakiza, n’ubugwaneza bwawe bukankomeza;

³⁷intambwe zanjye wazaguriye inzira, ibirenge byanjye ubirinda gutsitara.

³⁸Nakurikiranye abanzi banjye, ndabarimbura, sinagaruka ntamaze kubatsemba;

³⁹narabakubise ntibabasha kweguka, baguye mu nsi y’ibirenge byanjye.

⁴⁰Wankenyeje imbaraga zo kurwana, abahagurukiye kuntera, urabancogoreza;

⁴¹watumye abanzi banjye bantera ibitugu, kugira ngo ndimbure abampagurukiye.

⁴²Baratakambye, ariko ntihagira ubatabara, batakira Uhoraho, ariko ntiyabasubiza;

⁴³nabahinduye umukungugu, ndabanyukanyuka nk’urwondo mu nzira.

⁴⁴Wandokoye ukwivumbagatanya k’umuryango wanjye, ungira umutware w’amahanga; ihanga ntigeze no kumenya rirankorera.

⁴⁵Abanyamahanga baranyobotse, mvuga ijambo rimwe bakanyumvira;

⁴⁶abanyamahanga baracogoye, basohoka mu ngo zabo badagadwa.

⁴⁷Himbazwa Uhoraho! Urutare rwanjye nirusingizwe! Nihatsinde Imana, yo rutare rw’agakiza kanjye!

⁴⁸Iyi Mana yamporeye abanzi banjye, yatumye abanyamahanga, bampfukamira.

⁴⁹Wankijije abanzi banjye, umpa guhashya abampagurukiye, n’abanyamaboko urabangobotora.

⁵⁰Ni cyo gituma ngushimira, Uhoraho, rwagati mu mahanga, kandi ndaririmba ikuzo ry’izina ryawe:

⁵¹Wowe uha umwami wawe imitsindo ikomeye, ntuhemukire uwo wasize amavuta, ari we Dawudi n’urubyaro rwe iteka ryose.»